RI UKABꞌ WUJ RI XUTZꞌIBꞌAJ RI PABLO CHIKE RI KOJONELABꞌ AꞌJ CORINTO
Majibꞌal re
Ri nabꞌe uwuj ri Pablo ri xutaq chike ri aꞌj Corinto kukꞌut jubꞌiqꞌ chiqawach jas tajin kubꞌan areꞌ kukꞌ ri e tereneꞌl taq re ri Jesús.
Ri ukabꞌ wuj re Corintios kukꞌut chiqawach ri chꞌekoj xuqujeꞌ ri kꞌaxkꞌolal ri kariqitajik are kuriq ribꞌ ri kꞌaslemal re kamik rukꞌ ri kꞌaslemal re ri ajawarem re ri Dios.
Waral kaqilo jas kubꞌan ri Pablo chusukꞌumaxik ri riqoj ibꞌ, kutzijoj jas rajawaxik kabꞌanik are keꞌ chi jun pa juleꞌ taq leꞌaj chik, xuqujeꞌ kil apanoq jas kabꞌan chumulixik ri tobꞌanik rech ketoꞌ ri kojonelabꞌ pa ri tinimit Jerusalén, kubꞌij chikipalaj ri winaq ri e kꞌamal taq bꞌe jachin riꞌ ri taqoꞌn ri qas nim ubꞌanik rumal cher ri ojer taq taqoꞌn kakibꞌij chi aꞌreꞌ e nimaq taq taqoꞌn.
Pa ri kajibꞌ nimaq taq qꞌat rech ri wuj, kikajichal kakichapleꞌj ubꞌixik ubꞌiꞌ jun kꞌolibꞌal.
Ri kutzijoj rij waral are chi ri Dios kujutoꞌ qonojel pa ronojel kꞌaxkꞌolal ri kujikꞌow wi xuqujeꞌ rajawaxik kaqaya we kuꞌlibꞌal kꞌuꞌx riꞌ chike nikꞌaj chik.
We riꞌ kukꞌutuꞌ ri ukꞌaslemal ri Jesús chi nabꞌe xuriq kꞌax kꞌa te riꞌ xyaꞌtaj uchuqꞌabꞌ.
Jacha ta ne are xrip ri Mesías, man kꞌo ta qachuqꞌabꞌ xaq pa rech wi.
Pune jeriꞌ uj kꞌo pa ri ukwinem ri Dios.
Pa ri kꞌisbꞌal qꞌat, ri Pablo kubꞌan chike ri aꞌj Corinto chi qas kuꞌl pa ri kichomanik, rech qas kakil ri tajin kakꞌulmataj kukꞌ, xuqujeꞌ kukꞌis utzaꞌm ri wuj kubꞌij chike ri winaq chi rajawaxik keꞌkiꞌkot pa ri utoqꞌobꞌ ri Dios, pa ri uloqꞌanik xuqujeꞌ pa ri riqoj ibꞌ rukꞌ Areꞌ.
1
1 Ri Pablo taqoꞌn rech ri Cristo Jesús xa rumal ri urayibꞌal kuꞌx ri Dios, rachiꞌl ri alaxik Timoteo, kakitaq rutzil kiwach konojel ri e kojonelabꞌ ri e kꞌo pa ri tinimit Corinto pa Acaya: 2 Are ri Dios xuqujeꞌ ri Tataxel rech ri Ajawxel Jesucristo kiya jaꞌmaril xuqujeꞌ toqꞌobꞌ piꞌwanimaꞌ.
Are ri Dios kakubꞌisan kikꞌuꞌx ri kojonelabꞌ
3 Qꞌijilaꞌtal ri Dios Tataxel rech ri Ajawxel Jesucristo, bꞌanal toqꞌobꞌ xuqujeꞌ yaꞌl kuꞌlibꞌal kꞌuꞌx. 4 Areꞌ kakubꞌisan qakꞌuꞌx pa ronojel taq ri kꞌaxkꞌolal ri kaqariqo, rech jeriꞌ kujkwinik kaqakubꞌisaj kikꞌuꞌx konojel ri kakiriq kꞌax. 5 Rumal cher jacha ri unimal ri kꞌaxkꞌolal kaqariqo jeriꞌ xuqujeꞌ na unimal ri kuꞌlibꞌal kuꞌx kaqariqo. 6 We uj kaqarik kꞌax, kaqariqo, rech ix kiriq kuꞌlibꞌal kuꞌx xuqujeꞌ koltajem. We kakubꞌisax qakꞌuꞌx uj, jewaꞌ kabꞌanik rech kakubꞌiꞌ xuqujeꞌ ikꞌuꞌx ix rech kiqꞌiꞌo rukꞌ ayeꞌnik ri kꞌaxkꞌolal ri kaqarik uj. 7 Kuꞌl qakꞌuꞌx chiꞌwij rumal qetaꞌm chi jacha ri ix ix qachiꞌl pa ri kꞌaxkꞌolal, ix qachiꞌl xuqujeꞌ chuyaꞌik kuꞌlibꞌal kuꞌx.
8 Qachalal, man kaqaj taj chi mat kiwetaꞌmaj ri kꞌaxkꞌolal ri xqarik pa Asia. Sibꞌalaj xkꞌistaj qakꞌuꞌx, pa qakꞌuꞌx chi man uj kꞌas ta chik kujel la chilaꞌ. 9 Xqanaꞌo chi jer xqꞌat tzij pa qawiꞌ rech kujkamisaxik. Jeriꞌ xkꞌulmatajik rech makakubꞌiꞌ taj qakꞌuꞌx chibꞌil qibꞌ uj xane kakubꞌiꞌ qakꞌuꞌx chirij ri Dios ri kuꞌkꞌastajisaj kaminaqibꞌ. 10 Ri Dios xujutoꞌo jeriꞌ man xujkam taj. Chirij areꞌ jeqel wi qakꞌuꞌx, are kujtoꞌwik. 11 Ri ix kꞌut chujitoꞌ rukꞌ ri ichꞌawem pa qawiꞌ. Rech jeriꞌ sibꞌalaj e kꞌi ketyoxin che ri Dios rumal ri sipanik ri xyaꞌtaj chaqe rumal xtzalitaj uwach ri qachꞌawem.
Ri Pablo xukꞌex uchomanik chirij ri ubꞌenam pa ri tinimit Corinto
12 Are ri qaqꞌalajisanik kayoꞌw kiꞌkotemal chaqe: utz xujnoꞌjin pa ri uwachulew xuqujeꞌ iwukꞌ ix, qas rukꞌ rutzil qanimaꞌ xuqujeꞌ man rukꞌ ta etzelal, man are ta xqakoj ketaꞌmabꞌal achyabꞌ xane are xqakoj ri utoqꞌobꞌ ri Dios. 13 Jeriꞌ rumal cher man tajin ta kaqatzꞌibꞌaj jun jastaq ri mat kisikꞌij uwach xuqujeꞌ ri mat kichꞌobꞌo. Kurayij ri wanimaꞌ chikichomaj ronojel. 14 Iwetaꞌm chik chi utz kinaꞌ nimal rumal qe, xuqujeꞌ uj kaqanaꞌ na nimal rumal iwe pa ri uqꞌijal ri Ajawxel Jesús.
15 Rumal riꞌ xwaj xixinsolij ix nabꞌe rech kikꞌamawaꞌj jun ukabꞌ tewechibꞌal. 16 Iwumal iwe kinikꞌow bꞌik pa ri tinimit Macedonia, are kineꞌ pa Corinto xuqujeꞌ kinikꞌow chi loq junmul iwukꞌ are kintzalij loq. Rech jeriꞌ kinitoꞌo kintzalij pa ri tinimit Judea. 17 Are xinbꞌij we riꞌ chibꞌil wibꞌ ¿Teꞌq piꞌkꞌuꞌx chi xaq aninaq xinchomalaꞌ xinbꞌij jeꞌ kinbꞌan we riꞌ, kꞌa te riꞌ kinbꞌij chik man kinbꞌan taj? 18 Ri Dios kꞌut retaꞌm chi man nabꞌe taj kaqabꞌij chiꞌwe chi jeꞌ, je laꞌ, kꞌa te riꞌ kaqabꞌij man je taj. Ri uj kujtakꞌiꞌ pa qatzij.
19 Rumal cher ri Ukꞌojol ri Dios ri Jesucristo, ri kaqatzijoj in, ri Silvano, xuqujeꞌ ri Timoteo, man kukꞌexmayila taj ribꞌ xane qas takꞌal wi ri kubꞌij. 20 Rumal cher ronojel ri ubꞌim loq ri Dios tzi je wi riꞌ xuqujeꞌ jeriꞌ pa Cristo, rumal riꞌ kaqabꞌij uj jeriꞌ, rech kaqaqꞌijilaꞌj ri ubꞌiꞌ ri Dios. 21 Are ri Dios kajeqebꞌan qakꞌuꞌx xuqujeꞌ ikꞌuꞌx ix pa Cristo, rumal cher are xujchoꞌwik. 22 Xukoj qetal pa qanimaꞌ rukꞌ ri Uxlabꞌixel, kꞌutbꞌal rech chi qas tzij kubꞌan na ri ubꞌim loq chaqe.
23 Qas cho ri Dios kinbꞌij chi man inbꞌenaq ta pa ri tinimit Corinto rech man kixeꞌn yaja taj. 24 Man xa ta kaqaj kabꞌan qe pa iwiꞌ, xane are kaqaj kujchakun iwukꞌ rumal kaqaj kixqatoꞌo rech kakꞌiy ri ikiꞌkotemal, rumal cher are ri ikojobꞌal kabꞌanow chiꞌwe chi ko kixkꞌojiꞌk.