RI UTZ LAJ TZIJ RE RI JESÚS RI XUTZꞌIBꞌAJ RI LUCAS
Majibꞌal re
Ri wuj re Lucas rachiꞌl ri wuj re Hechos xa jun winaq xtzꞌibꞌanik (chawilampe ri sikꞌinik ri kabꞌanik pa ri majibꞌal rech ri Hechos). Ukobꞌchal ri wuj kakitzijoj jas xubꞌan ri Dios chikisikꞌixik ri tinimit Israel xuqujeꞌ chikisikꞌixik kojonel ri winaq rech jeriꞌ kakitereneꞌj ri Jesús. Pa ri nabꞌe wuj ri waꞌkatem kachapleꞌtaj bꞌik pa ri tinimit Jerusalén, ri ukꞌuꞌx ri kikꞌaslemal ri winaq aꞌj Israel. Ri ukabꞌ kachapleꞌtaj bꞌik pa ri tinimit Jerusalén, kopan kꞌa pa taq juleꞌ taq tinimit chik, kakꞌis utzaꞌm rukꞌ ri Pablo are kutzijoj ri utzij ri Dios pa ri tinimit Roma, ukꞌuꞌx ri sibꞌalaj kꞌi tinimit. Ri Lucas kutaq bꞌik ri xutzꞌibꞌaj che ri nimalaj reqeleꞌn achi ubꞌiꞌnam Teófilo, we tataꞌ ri wine jun nim kꞌamal bꞌe ke ri ajchꞌoꞌjabꞌ je laꞌ pa ri tinimit Roma. Ri xutzꞌibꞌaj qꞌattal pa jaljoj taq qꞌat jacha taq ri wuj, ri naj tzijonem, bꞌix, jastaq ri xkꞌulmatajik, kꞌaxkꞌolal, xuqujeꞌ kꞌambꞌejabꞌal taq noꞌj. Ri xraj ri Lucas are chi xukꞌutu chi qas tzꞌaqat xubꞌan ri Dios chukꞌamik loq ri utunal cho ri uwachulew kukꞌ ri winaq aꞌj Israel. Ri e nabꞌe taq tereneꞌl re ri Jesús xkikꞌamawaꞌj ri sikꞌinik ri xbꞌan chike xkichapleꞌj utzijoxik chike konojel ri winaq cho ri uwachulew chi ri Jesús xchꞌeken puꞌwiꞌ ri maj xuqujeꞌ ri kamikal.
Nabꞌe, ri Jesús kubꞌan ri uchak pa Galilea, je laꞌ pa ri uxukut kaj re ri tinimit Israel.
Ukabꞌ, ri Jesús kubꞌan jun nimalaj bꞌinem keꞌ pa Jerusalén xuqujeꞌ kuya sikꞌinik chike ri winaq rech koꞌk pa ri rajawarem ri Dios je xuqujeꞌ kuya kꞌutuꞌn chike chirij ri ajawarem.
Urox, ri Lucas kutzijoj jas xubꞌan ri Jesús chujachik ri ukꞌaslemal je laꞌ pa ri tinimit Jerusalén xuqujeꞌ jas xubꞌano are xkꞌastaj loq chikixoꞌl ri kaminaqibꞌ rech jeriꞌ xukꞌut ribꞌ chi are Ajawxel xuqujeꞌ Taqanel puꞌwiꞌ ri uwachulew.
1
1 Loqꞌalaj Teófilo: E kꞌi ri winaq ri xkaj xkitzꞌibꞌaj pa cholaj ri tzijobꞌelil chrij ri qas xkꞌulmataj waral chiqaxoꞌl. 2 Are waꞌ ri xkikꞌut loq chiqawach ri qas xiꞌlow ronojel ri xkꞌulmatajik pa ri majibꞌal re, ri e tzijol taq re ri utz laj tzij. 3 Ri in xuqujeꞌ sibꞌalaj utz rilik xuqujeꞌ usolixik xinbꞌano rech xinwetaꞌmaj ronojel ri ucholajil ri jastaq ri xkꞌulmatajik qas pa ri majibꞌal rech. Rumal waꞌ xinchomaj utzꞌibꞌaxik chawe pa ucholajil, nimalaj Teófilo, 4 rech kawetaꞌmaj ri qas tzij chrij ri kꞌutuꞌn ri yaꞌom chawe.
Katzijox ri alaxibꞌal rech ri Juan
5 Pa taq ri qꞌij che riꞌ are taqanel ri Herodes pa ri Judea, kꞌo jun chꞌawenel cho ri Dios ubꞌiꞌ Zacarías jun chike ri wok e rijaꞌl ri Abías, ri rixoqil are ri Elisabet, rijaꞌl ri Aarón. 6 Kikꞌulajal e utz laj taq winaq, sukꞌ kanimaꞌ cho ri Dios. Xeniman che ronojel ri utaqanik ri Dios. Man kꞌo ta etzelal xkibꞌano. 7 Maj kꞌu e kal rumal cher ri Elisabet man kakwin taj kuya ral pa ri uwachulew xuqujeꞌ e nimaq taq winaq chik.
8 Jun qꞌijal ri Zacarías are tajin kapatanij pa ri Templo rech ri Dios rumal cher xuriq ri qꞌij are kapatanik ri uwo kaj. 9 Jacha ri kubꞌij ri naqꞌatajibꞌal kech ri chꞌawenelabꞌ cho ri Dios pa kiwiꞌ ri winaq, kakikꞌyaq rij jachin ri chꞌawenel kok bꞌik pa utemplo ri Dios chutzujik ri incienso. 10 Are tajin kaporox ri incienso, ri winaq ri kimulim kibꞌ tajin kakibꞌan apanoq chꞌawem cho ri Templo rech ri Dios. 11 Are tajin kuporoj incienso ri Zacarías xukꞌut ribꞌ jun ángel choch, xtakꞌiꞌ pa ri wiqiqꞌabꞌ rech ri tzujbꞌal sipanik jaw ri kaporox wi ri incienso. 12 Are xril ri Zacarías ri ángel, xkꞌaxir ranimaꞌ, sibꞌalaj xuxiꞌj ribꞌ.
13 Ri ángel xubꞌij che: Man kaxiꞌj ta awibꞌ. Ri achꞌawem xtataj rumal ri Dios. Kakꞌojiꞌ na jun akꞌojol rukꞌ ri awixoqil Elisabet, Juan kakoj che ubꞌiꞌ. 14 Sibꞌalaj katkiꞌkot na rumal rech ri akꞌal, xuqujeꞌ e kꞌi winaq kekiꞌkot na we xkil uwach. 15 Jeriꞌ rumal cher nim na uqꞌij cho ri Dios. Man kutij ta wi vino xuqujeꞌ tzam. Kanojisax na che ri Tyoxalaj Uxlabꞌixel are kꞌo chupam ri unan. 16 E kꞌi winaq aꞌj Israel ketzalij na rukꞌ ri Ajawxel ri kiDios rumal rech areꞌ. 17 Kanabꞌej na cho ri Ajawxel rukꞌ chuqꞌabꞌ xuqujeꞌ kwinem jetaq ri xya che ri Elías, kubꞌan na chi kesukꞌiꞌ ri tat nan kukꞌ ri alkꞌwaꞌlaxelabꞌ xuqujeꞌ kubꞌan na chi ri man keniman taj kakikꞌamawaꞌj ketaꞌmabꞌal chike ri sukꞌ taq winaq. Rech jeriꞌ ri winaq kakisukꞌumaj apanoq kibꞌ chirayeꞌxik ri Ajawxel.
18 Ri Zacarías xubꞌij che ri ángel: ¿Jas kinbꞌan chi retaꞌmaxik chi qas kakꞌulmataj na we jastaq riꞌ? In in riꞌj achi chik, ri wixoqil xuqujeꞌ bꞌenaq chi ri ujunabꞌ.
19 Ri ángel xubꞌij: In in Gabriel, in kꞌo cho ri Dios chanim, areꞌ xintaqow loq chubꞌixik we utz laj taq tzij riꞌ chawe. 20 Rumal kꞌu cher man xakoj ta ri xinbꞌij chawe, katmemar kan chanim, man katkwin taj katchꞌawik, ka chi kꞌol na ri akꞌal kꞌa te riꞌ kajaqataj ri achꞌabꞌal. Kakꞌulmataj na ri nutzij pa ri qꞌotaj ri kajawatajik.
21 Ri winaq ri aꞌyeninaq ri Zacarías xemayijanik rumal cher maj ri kel loq. 22 Are xel loq, man kakwin ta chik kachꞌawik. Xaq pa memal tzij chik xtzijon kukꞌ, xkichomaj kꞌut chi xa xril jun kꞌutbꞌal pa ri Tyoxalaj kꞌolibꞌal.
23 Are xtoꞌtaj ri Zacarías che ri patanijik pa ri Templo, xtzalij cho rachoch. 24 Ikꞌowinaq chi jun janipa qꞌij, ri Elisabet rixoqil ri Zacarías xkanaj yawabꞌ ixoq. Ri Elisabet jobꞌ ikꞌ xaq cho rachoch xkꞌojiꞌ wi.
25 Sibꞌalaj utz ri wAjaw, xinresaj pa ri nukꞌixibꞌal rech man kinkiyoqꞌ ta chi ri winaq, xcha ri Elisabet.
Katzijox ri alaxibꞌal rech ri Jesús
26 Pa ri uwaq ikꞌ rech ri uyawajik ri Elisabet, xtaq loq ri ángel Gabriel pa Nazaret, jun leꞌaj ri kꞌo pa Galilea. 27 Xopan rukꞌ jun qꞌapoj ali, ubꞌiꞌ María, ri tzꞌonom chik rumal jun achi ubꞌiꞌ José, jun rijaꞌl ri Taqanel David. 28 Ri Gabriel xukꞌut ribꞌ choch ri María, xubꞌij che: ¡Rutzil awach, at jun ixoq chaꞌtalik, ri Ajawxel kꞌo awukꞌ!
29 Ri María xsach ukꞌuꞌx, xkꞌaxkꞌobꞌ ranimaꞌ, xuchomaj rij ri kubꞌij ri ángel. 30 Ri ángel xubꞌij che: ¡Man kaxiꞌj ta awibꞌ María, at chaꞌtal rumal ri Dios! 31 Katiktaj na jun akꞌal chawe, kalax na, kakoj Jesús che ubꞌiꞌ. 32 Kanimar na uqꞌij, kabꞌix na ukꞌojol ri Nimalaj Dios che. Ri Ajawxel Dios kukoj na che nim taqanel jetaq ri qamam David. 33 Amaqꞌel kataqan na puꞌwiꞌ ri tinimit Israel, ri utaqanik maj ukꞌisik.
34 Ri María xubꞌij: ¿Jamo riꞌ kakꞌulmataj we riꞌ? Man in kꞌolinaq ta in rukꞌ achi.
35 Ri ángel xubꞌij che: Ri Tyoxalaj Uxlabꞌixel kaqaj na loq paꞌwiꞌ. Ri ukwinem ri nimalaj Dios katuchꞌuq na. Rumal riꞌ, ri neꞌ riꞌ ri kakꞌojiꞌ na, jun Tyoxalaj akꞌal, xuqujeꞌ kubꞌiꞌnaꞌj na Ralkꞌwaꞌl ri Dios. 36 Ri Elisabet ri awachalal xkanaj yawabꞌ winaq pa ri uriꞌjobꞌnaqil. Waqibꞌ ikꞌ chik yawabꞌ winaq pune xbꞌix che kumal ri winaq chi man kakwin taj kuꞌya ral pa ri uwachulew. 37 Maj jun jastaq ri mat kakwin ri Dios che ubꞌanik.
38 Ri María xubꞌij: In patanil rech ri Ajawxel. Kꞌulmataj wukꞌ ronojel ri xabꞌij.
Ri ángel xtzalijik.
Ri María kopan chusolixik ri Elisabet
39 Kebꞌ oxibꞌ qꞌij chik ikꞌowinaq we kꞌulmatajem riꞌ, ri María xeꞌ pa taq ri juyubꞌ pa ri tinimit rech Judea. 40 Are xopan chilaꞌ, xok bꞌik pa ri rachoch ri Zacarías, xuya rutzil uwach ri Elisabet. 41 Are xuta ri Elisabet ri rutzil wach ri xya rumal ri María, xchꞌoplaj ri ral chupam, xnoj kꞌut che ri Tyoxalaj Uxlabꞌixel. 42 Ri Elisabet xuraq uchiꞌ chech kiꞌkotemal, xubꞌij che ri María: Sibꞌalaj at tewchiꞌtalik chikiwach konojel ri ixoqibꞌ. Xuqujeꞌ tewchiꞌtal ri awal. 43 ¿Jas che xya bꞌe chwe, kinulusolij ri unan ri Wajaw? 44 Are xinta ri rutzil nuwach xuyaꞌo, xchꞌoplaj ri nuneꞌ ri kꞌo chinupam xchꞌoplaj che kiꞌkotemal. 45 Sibꞌalaj at tewchiꞌtalik rumal cher xakojo chi ri Ajawxel kubꞌan ri xuchiꞌj chawe.
Ri ubꞌix ri María
46 Ri María xubꞌij:
Ri wanimaꞌ sibꞌalaj kuqꞌijilaꞌj ri Ajawxel. 47 Sibꞌalaj kakiꞌkot ri wanimaꞌ pa ri nuDios, nukolonel. 48 Xel ukꞌuꞌx che we patanijel rech ri man nim ta uqꞌij.
Konojel kꞌu ri winaq kakibꞌij na riꞌ chwe chi in tewchiꞌtalik. 49 Jeriꞌ rumal cher ri Tyox xuqujeꞌ kwinel laj Dios xubꞌan nimalaj taq jastaq wukꞌ. 50 Kutoqꞌobꞌisaj kiwach konojel ri winaq ri e kꞌolik xuqujeꞌ ri kekꞌojiꞌ na.
Ri winaq kakimochꞌ kibꞌ choch. 51 Rukꞌ ri utelebꞌ xubꞌan nimalaj taq jastaq,
xusach kiwach ri winaq ri nimal chike
xuqujeꞌ ri kakinimarisaj kibꞌ. 52 Xresaj ri taqanik pa kiqꞌabꞌ ri nimaꞌq kibꞌanik,
xuya kiqꞌij ri winaq ri nim taj kiqꞌij. 53 Xuya jastaq kech ri kenumik,
maj ke ri qꞌinomabꞌ xuyaꞌo. 54 Xutoꞌ ri utinimit Israel,
man xsachan ta che ubꞌanik ri utzilal kukꞌ. 55 Jeriꞌ xubꞌano rumal cher xuchiꞌj kan che ri qamam Abraham
xuqujeꞌ amaqꞌel chike ri e rijaꞌl chi jewaꞌ kubꞌan na.
56 Ri María xkanaj kan oxibꞌ ikꞌ rukꞌ ri Elisabet kꞌa te riꞌ xtzalij cho rachoch.
Kalax ri Juan Bꞌanal qasanaꞌ
57 Are xopan ri qꞌij, kakꞌojiꞌ ri ral ri Elisabet, xalax ri ral, ala ri ral. 58 Ri ukꞌulja ri Elisabet xuqujeꞌ ri e rachalal xekiꞌkotik are xketaꞌmaj chi ri Dios sibꞌalaj xutoqꞌobꞌisaj uwach ri Elisabet. 59 Are xtzꞌaqat wajxaqibꞌ uqꞌij ri neꞌ, xkimulij kibꞌ rech kakilo kakoj retal, xkaj kꞌut xkikoj Zacarías che ubꞌiꞌ, jetaq ri ubꞌiꞌ ri utat. 60 Ri Elisabet kꞌut xubꞌij: ¡Man je ta riꞌ! Juan kubꞌiꞌnaꞌj we akꞌal riꞌ.
61 ¿Jas che? xecha ri winaq. Man kꞌo ta jun chike ri awachalal jeriꞌ ubꞌiꞌ.
62 Pa memal tzij kꞌut xkita che ri utat ri akꞌal jas ubꞌiꞌ ri ukꞌojol kukojo. 63 Ri Zacarías xuta jun chꞌaqaꞌp tzꞌalam chike rech kutzꞌibꞌaj choch jas ri bꞌiꞌaj. Sibꞌalaj xemayijan kꞌut are xkilo ri xutzꞌibꞌaj “Juan ubꞌiꞌ.” 64 Aninaq xjaqataj ri uchꞌabꞌal ri Zacarías, xuchapleꞌj uqꞌijilaꞌxik ri Dios. 65 Xtzijox kꞌu ronojel we kꞌulmatajem riꞌ pa taq ri tinimit ri kꞌo pa taq ri juyubꞌ rech Judea, konojel ri e kuꞌl ja xkixiꞌj kibꞌ. 66 Konojel ri winaq ri xetowik kakitatabꞌela chibꞌil taq kibꞌ: ¿Jas kux we akꞌal ri?
Jeꞌ xkibꞌij waꞌ rumal qꞌalaj chi ri Ajawxel Dios kꞌo rukꞌ ri akꞌal.
Ri ubꞌix ri Zacarías
67 Ri Zacarías, ri utat ri akꞌal, xnoj che ri Uxlabꞌixel, xubꞌij: 68 Chiqꞌijilaꞌj ri Ajawxel, ri Dios rech ri tinimit Israel,
xusolij ri utinimit, xutoꞌo pa ri qꞌoxom. 69 Xutaq loq jun kwinel laj kolonel rijaꞌl ri patanil rech, David. 70 Are waꞌ ri xuchiꞌj loq ri Dios
chi kichiꞌ ri tyoxalaj taq qꞌalajisal taq rech ri utzij, ojer. 71 Kujutoꞌ na pa kiqꞌabꞌ ri e qakꞌulel,
xuqujeꞌ pa kiqꞌabꞌ ri kaketzelaj qawach. 72 Rech kutoqꞌobꞌisaj kiwach ri e qamam rumal cher xnaꞌtaj che ri chꞌekom tzij ri xubꞌano. 73 Are waꞌ ri chꞌekom tzij xubꞌan kan
rukꞌ ri qamam Abraham. 74 Xujesax na pa kiqꞌabꞌ ri qakꞌulel
rech kaqapatanij ri Dios man rukꞌ ta xibꞌin ibꞌ, 75 rukꞌ jun tyoxalaj kꞌaslemal xuqujeꞌ sukꞌal,
pa ronojel qꞌij rech ri qakꞌaslemal. 76 At, nukꞌojol, kabꞌix na qꞌalajisal rech ri utzij ri nimalaj Dios chawe,
kasukꞌumaj na apanoq ri ubꞌe ri Ajawxel. 77 Katzijoj na jas kakibꞌan ri winaq rech kekolotajik
xuqujeꞌ kekuyutaj che ri kimak. 78 Tyox che ri utoqꞌobꞌ ri Dios,
katunan na ri tunal rech pa ri kaj, chiqaxoꞌl. 79 Kuꞌtunaj na ri e kꞌo pa ri qꞌequꞌmal,
pa ri uqꞌequꞌmal ri kamikal,
xuqujeꞌ kukꞌam na qabꞌe pa ri ubꞌeal ri jaꞌmaril.
80 Xkꞌiy kꞌu ri Juan, sibꞌalaj xpe uchuqꞌabꞌ pa ri ranimaꞌ. Xkꞌojiꞌ pa ri katzꞌinow ulew kꞌa pa ri qꞌij are xukꞌut ribꞌ chkiwach ri winaq aꞌj Israel.