RI WUJ RI XUTZꞌIBꞌAJ RI PABLO CHE RI FILEMÓN
Majibꞌal re
Ri Pablo xuchaꞌ jun achi chujachik ri uwuj re Colosenses rachiꞌl Efesios, ri ubꞌiꞌ we achi riꞌ are Onésimo. Ri Onésimo aj Colosas. Pune jeriꞌ ri Pablo xrilo chi choqꞌaqꞌ wi kutzꞌibꞌaj jun wuj xaq che ri Onésimo rumal cher ri Onésimo xux kanoq jun patanil rech jun qꞌinom achi aj Colosas ubꞌiꞌnam Filemón, pa rachoch we Filemón kakimulij wi kibꞌ ri kojonelabꞌ.
Ri Onésimo xanimaj bꞌik xel bꞌik rukꞌ ri Filemón, are xopan pa Roma xuriq ri Pablo xuqujeꞌ xkojon che ri Jesús, xuchapleꞌj utoꞌik ri Pablo. Ri Pablo xuchomaj chi are utz we katzalij ri Onésimo pa Colosas.
Ri Pablo karaj chi man xwi ta kakꞌamawaꞌx ri Onésimo rumal ri Filemón xane kakꞌamawaꞌxik jacha jun alaxik man jacha ta chi jun ajchak.
Ri kꞌin laj nitzꞌ uwuj ri Pablo kubꞌij jas ri kꞌexen pa ri ukꞌaslemal ri Onésimo, ri ubꞌiꞌ ri Onésimo pa griego kel kubꞌij sibꞌalaj kꞌo kutayij. Ri Pablo kubꞌij che ri Filemón pune maj xutayij kan ri Onésimo nabꞌe, kamik kꞌo chi kutayij chike kikobꞌchal.
Ri Pablo man kuya ta jun eqaꞌn chirij ri Filemón xane kuta che chi kaya uqꞌij ri sukꞌal rech kusukꞌumaj ribꞌ pa areꞌ wi.
Pa ri ukꞌaslemal ri Onésimo keqilo jun kꞌutbꞌal re ronojel ri kꞌaslemal ri xekꞌexetajik rumal ri utzij ri Dios ri xtzijox pa ri nimalaj tinimit Roma.
1
Majibꞌal re ri uwuj ri Pablo
1 Ri Pablo, tzꞌapil pa cheꞌ rumal ri Cristo Jesús, xuqujeꞌ ri alaxik Timoteo, che ri loqꞌalaj Filemón, toꞌl qe, 2 xuqujeꞌ che ri alaxik Apia, ri alaxik Arquipo, e qachiꞌl pa ri chꞌoꞌj, xuqujeꞌ ri komontyox ri kakimulij kibꞌ cho awachoch: 3 Toqꞌobꞌ, jaꞌmaril rech ri qaDios Tataxel xuqujeꞌ rech ri Ajawxel Jesucristo chiꞌwe.
Tyoxinik xuqujeꞌ toj jastaq che ri Dios
4 Kintyoxin che ri Dios, amaqꞌel katnaꞌtaj chwe pa ri nuchꞌawem. 5 Rumal cher nutom ri aloqꞌanik xuqujeꞌ ri akojobꞌal ri kꞌo che ri Ajawxel Jesús, xuqujeꞌ kukꞌ konojel ri tyoxalaj taq winaq. 6 Kinta che ri Dios chi ri riqoj ibꞌ ri kakꞌiy pa ri akojobꞌal, qas kꞌo kutayij pa Cristo, rumal rech ri etaꞌmanik rech ri utzilal, ri qetaꞌmam junam awukꞌ. 7 Rumal cher kꞌo qakiꞌkotemal xuqujeꞌ kuꞌlibꞌal qakꞌuꞌx pa ri aloqꞌanik, rumal cher ri tyoxalaj taq winaq xkikꞌamawaꞌj kichuqꞌabꞌ rumal awe.
Kachꞌaw ri Pablo puꞌwiꞌ ri Onésimo
8 Rumal riꞌ, pune pa Cristo kinkwinik kintaqan paꞌwiꞌ, rech kabꞌan ri rajawaxik kabꞌano, 9 xa kinta toqꞌobꞌ chawe pa ri loqꞌanik. In in Pablo, in nima winaq chik, xuqujeꞌ in tzꞌapital pa cheꞌ rumal rech ri Cristo Jesús, 10 kinta chawe puꞌwiꞌ ri nukꞌojol Onésimo, ri xux nukꞌojol are in tzꞌapital pa cheꞌ.* 10 Onésimo pa ri tzijobꞌal griego kel kubꞌij Sibꞌalaj kꞌo kutayij.
11 Ojer maj kutayij waꞌ chawe, kamik kꞌut kꞌo kutayij chawe at xuqujeꞌ chwe in. 12 Kintaq bꞌik rech katzalij awukꞌ, chakꞌamawaꞌj kꞌut, je ta ne tzi in kinopan awukꞌ. 13 Are ta ne kawaj in kakanaj wukꞌ che akꞌaxel rech kinupatanij pa we cheꞌ ri in tzꞌapital wi rumal re ri utz laj tzij. 14 Man xwaj ta kꞌut xinbꞌan jun jastaq ri man awetaꞌm taj, rech man kabꞌantaj rumal cher in kinbꞌinik xane are ri qas kape pa awanimaꞌ. 15 Wine rumal waꞌ xel loq awukꞌ najtir, rech kamik kakꞌamawaꞌj amaqꞌel. 16 Man kakꞌamawaꞌj taj jacha jun patanil awe, xane chakꞌamawaꞌj jeꞌ jas jun loqꞌalaj alaxik, sibꞌalaj nim ubꞌanik chinuwach in, nim ubꞌanik chawach at rumal cher jun winaq xuqujeꞌ jun alaxik pa ri Ajawxel.
17 Xaq jeriꞌ, we in awachiꞌl, chakꞌamawaꞌj tzi jacha ta ne ri in. 18 We ubꞌanom jun kꞌax chawe o kꞌo ukꞌas awukꞌ, chaya pa ri nukwenta. 19 In in Pablo, rukꞌ ri nuqꞌabꞌ kintzꞌibꞌaj: Kintoj na chawe, naꞌtaj chawe chi kꞌo akꞌas wukꞌ che ri katux kamik. 20 Jeꞌ wachalal, chikinkꞌamawaꞌj jun toqꞌobꞌ chawe at. Chaya uchuqꞌabꞌ ri wanimaꞌ pa Cristo.
21 Xintzꞌibꞌaj bꞌi waꞌ chawe, kuꞌl na kꞌuꞌx chi katnimanik, xuqujeꞌ wetaꞌm chi kꞌo na ri kabꞌano choch ri kinta chawe. 22 Xuqujeꞌ chasukꞌumaj apanoq ri ja ri kineꞌkꞌol wi, rumal cher kuꞌl na kꞌuꞌx chirij ri Dios kinopan chi na iwukꞌ, rumal ri ichꞌawem.
23 Kakitaq rutzil awach ri Epafras, wachiꞌl pa Cristo Jesús, uj kꞌo pa cheꞌ, 24 xuqujeꞌ ri Marcos, ri Aristarco, ri Demas, ri Lucas, e toꞌl taq we.
25 Are ri utoqꞌobꞌ ri Ajawxel Jesucristo, kakanaj kan pa awanimaꞌ. Jeriꞌ.