RI WUJ RI XUTZꞌIBꞌAJ RI PABLO CHIKE RI KOJONELABꞌ AꞌJ ROMA
Majibꞌal re
Ri Pablo kutzꞌibꞌaj we wuj riꞌ chike ri kojonelabꞌ ri e kꞌo pa ri tinimit Roma, man kꞌo ta jun wuj ri tzꞌibꞌatalik ri kajunumataj rukꞌ. We wuj riꞌ xtzꞌibꞌaxik pa taq ri junabꞌ 56-57 are alaxinaq chi ri Cristo.
Pa we wuj riꞌ ri Pablo kuta tobꞌanik chike ri tereneꞌl taq re ri Jesús ri e kꞌo chuxeꞌ ri utaqanik ri César, kubꞌij chike chi rajawaxik katzijox ri utz laj tzij je laꞌ pa ri nima tinimit Roma.
Ri Pablo taqoꞌn re ri Jesucristo apanoq chutzijoxik ri terenem chirij ri Jesús. Ri uchomanik ri Dios xqꞌalajisaxik pa ri rijaꞌl ri nim taqanel David, are waꞌ ri Jesús ri Mesías.
We tzij riꞌ kukꞌutu chi ri Dios qas xubꞌan wi ri xubꞌij kukꞌ ri utinimit Israel. Ri wuj kutzijoj rij ri xkꞌulmatajik kukꞌ ri tinimit Israel ojer jas xbꞌan chike are xoꞌk che patanijelabꞌ xuqujeꞌ jas xbꞌan che kikolik loq.
Ri winaq ri e kꞌo cho ri uwachulew e qꞌattal apanoq rumal che ri xok loq ri makaj xuqujeꞌ ri kamikal kukꞌ, ri taqanik man kakwin ta kꞌut kukꞌam loq kꞌaslemal rumal riꞌ xpe ri Dios xutaq loq ri Jesús rech rumal ri ukamikal xuqujeꞌ ri kꞌastajibꞌal uwach xuꞌlukolo ri winaq aꞌj Israel xuqujeꞌ ri man aꞌj Israel taj, che riꞌ xtiktaj loq jun kꞌakꞌ wok winaq.
Ri kojonem che ri Jesús kutukij ri uchuqꞌabꞌ ri itzel xuqujeꞌ kukꞌam loq kiritajem. Ri Tyoxalaj Uxlabꞌixel kukꞌam ubꞌe ri winaq ri kꞌo kꞌakꞌ ukꞌaslemal, are waꞌ ri kꞌakꞌ tikoꞌn.
Pune e kꞌi winaq aꞌj Israel man e kojoninaq ta che ri Jesús, ri xubꞌan ri Jesús xukꞌam loq kꞌaslemal chike konojel ri winaq cho ri uwachulew.
Kamik ri Jesús xaq jeꞌ kutzuj ri jun kꞌakꞌ kꞌaslemal, pune jeriꞌ pa ri kꞌisbꞌal qꞌij re utoqꞌobꞌ ri Dios kachꞌeken na puꞌwiꞌ ri qꞌatoj tzij.
Ri kꞌisbꞌal re we wuj riꞌ kutzijoj jas jeꞌ rajawaxik kenoꞌjin ri kꞌo jun alik kikꞌaslemal.
1
1 Ri Pablo patanil re ri Jesucristo, sikꞌital apanoq rech kux jun taqoꞌn, tzijol re ri utz laj taq tzij rech ri Dios.
2 Ri ubꞌim loq ojer xuqujeꞌ kitzijom loq ri qꞌalajisal taq utzij ri Dios pa ri tyoxalaj taq tzꞌibꞌatalik. 3 We utz laj tzij katzijon chrij ri Ukꞌojol ri Dios, Jesucristo Rijaꞌl ri David pa ri tyoꞌjal,* 1:3 Pa ri Ojer Tyoxalaj Wuj kubꞌij chi ri Cristo jun rijaꞌl ri nim taqanel David, Ezequiel 34:23, 24; 37:24, 25; Oseas 3:5. Are kubꞌij chi ri Jesús rijaꞌl ri David, xuqujeꞌ kubꞌij chi ri Cristo are Mesías. 4 pa ri Uxlabꞌal ri katyoxirisanik, xqꞌalajisaxik chi are Ukꞌojol ri Dios, jeriꞌ rumal xkꞌastaj chikixoꞌl ri kaminaqibꞌ. Are waꞌ ri Jesucristo ri Ajawxel. 5 Xa rumal rech areꞌ, xuqujeꞌ rumal rech ri ubꞌiꞌ, xyaꞌtaj ri sipanik rech taqoꞌn chaqe rech kujkwinik keꞌqataqchiꞌj konojel ri tinimit ri e kꞌo cho ri uwachulew xa jeriꞌ keniman che ri kojobꞌal. 6 Chikixoꞌl taq we tinimit riꞌ, ix kꞌo ix, ri ixusikꞌim apanoq ri Jesucristo.
7 Kintzꞌibꞌaj we wuj riꞌ chiꞌwe ix, ri sibꞌalaj ixuloqꞌ ri Dios ri ix kꞌo pa ri tinimit Roma, ri ix sikꞌital apanoq rech kixux tyoxalaj taq winaq. Are ri Dios ri qaTat xuqujeꞌ ri Ajawxel Jesucristo, cheyoꞌw toqꞌobꞌ xuqujeꞌ jaꞌmaril chiꞌwe.
Ri Pablo karaj kuꞌsolij ri tinimit Roma
8 Nabꞌe, kintyoxin rumal iwe che ri nuDios pa Jesucristo, rumal cher utz kabꞌan chutzijoxik ri ikojobꞌal pa ronojel ri uwachulew. 9 Qas karil ri Dios ri kinpatanij rukꞌ ronojel wanimaꞌ, xuqujeꞌ kintzijoj ri utz laj utzij ri uKꞌojol, chi qas kixnaꞌtaj wi chwe ronojel qꞌij. 10 Ronojel qꞌij kinta che ri Dios chi we are rayibꞌal ukꞌuꞌx Areꞌ, chuya bꞌe chwe kineꞌ chiꞌsolixik. 11 Sibꞌalaj kurayij wanimaꞌ kixeꞌnwilaꞌ rech jeriꞌ kinbꞌij chiꞌwe jas ubꞌanik ri sipanik pa ri Uxlabꞌixel xa jeriꞌ kikꞌamawaꞌj ichuqꞌabꞌ. 12 Rech jeriꞌ kaqataqchiꞌla qibꞌ chiqajujunal pa ri xa jun qakojobꞌal.
13 Wachalal, kawaj kiwetaꞌmaj chi man inkwininaq taj ixnusolim, pune jeriꞌ nurayim isolixik rech keꞌnkꞌama loq we ri iwachinik, jacha ta ne ri ix ikꞌamom loq iwe kukꞌ ri winaq ri man aꞌj Israel taj. 14 In kꞌo pa kꞌasaj iwukꞌ iwonojel ta kꞌu kꞌo iwetaꞌmabꞌal ta kꞌu maj iwetaꞌmabꞌal, we ix aj Grecia o pune man ix aj Grecia taj.† 1:14 Ri Pablo kutzꞌibꞌaj chike ri griegos xuqujeꞌ ri man e griegos taj ri kel kubꞌij ri winaq ri kꞌo ketaꞌmabꞌal xuqujeꞌ maj ketaꞌmabꞌal. 15 Qas kurayij na kꞌuꞌx kintzijoj ri utz laj tzij chiꞌwe ix ri kixel pa ri tinimit Roma.
Ri ukwinem ri utz laj taq tzij
16 Qas tzij man kinkꞌixibꞌej taj uqꞌalajisaxik ri utz laj tzij rumal are ukwinem ri Dios rech jeriꞌ kekolotaj konojel ri kekojonik: nabꞌe na ri winaq aꞌj Israel kꞌa te riꞌ ri winaq ri man aꞌj Israel taj. 17 Pa ri utz laj tzij kaqꞌalajisax wi chi ri usukꞌal ri Dios kukꞌut ribꞌ rumal kojobꞌal xuqujeꞌ pa kojobꞌal: Jetaq ri kubꞌij ri Tzꞌibꞌatalik ri sukꞌ rumal kojobꞌal kakꞌasiꞌ na.
Jas che kape royawal ri Dios pa kiwiꞌ ri winaq ✡ 1:18 Habacuc 2:4.
18 Qas tzij wi, ri royawal ri Dios kape chilaꞌ pa ri kaj kukꞌut ribꞌ pa kiwiꞌ konojel ri winaq ri kakiqꞌatej rukꞌ etzelal ri qas tzij. 19 Ri rajawaxik ketaꞌmax che ri Dios sibꞌalaj qꞌalaj, jeriꞌ rumal cher tzi are ri Dios xkꞌutuw chikiwach ri winaq. 20 Jeriꞌ rumal cher are xtiktaj loq ri uwachulew, ri jastaq ri man kilitaj taj che ri Dios, ri ukwinem ri maj umajitajik loq xuqujeꞌ maj ukꞌisik xuqujeꞌ ri kuxik ri Areꞌ, xilitajik pa ronojel ri xutiko, rech jeriꞌ maj jun kubꞌij chi man retaꞌm taj uwach ri Dios. 21 Pune xketaꞌmaj uwach ri Dios, man xkiya taj uqꞌij ri Dios jetaq ri taqal che, xane xesach pa taq ri kichomanik ri maj kutayij, xuqujeꞌ xqꞌeqar ri kanimaꞌ. 22 Pune kakibꞌij chi kꞌo ketaꞌmabꞌal xuꞌx kꞌut e kon taq winaq. 23 Xkikꞌex ri ujuluwem ri Dios ri man kakam taj, choch ri upalaj ri achi ri kamel, xuqujeꞌ kipalaj taq aꞌwaj ri kerapinik, ri kajibꞌ kichakalibꞌal xuqujeꞌ ri kakijururej kibꞌ cho ri uwachulew.
24 Rumal riꞌ xejach rumal ri Dios pa taq ri itzel taq kichomabꞌal rech ri kanimaꞌ ri kuꞌkꞌam bꞌik pa ri makunem kukꞌ taq achyabꞌ xuqujeꞌ ixoqibꞌ, jeriꞌ xkitukij ri kityoꞌjal chi kijujunal. 25 Xkikꞌex ri qas tzij re ri Dios cho ri bꞌanoj tzij, xeꞌkiqꞌijilaꞌj xuqujeꞌ xeꞌkipatanij ri e jastaq ri xa e tiktalik, man xkiqꞌijilaꞌj taj ri Dios ri xetikowik, areꞌ ri Dios yaꞌtal uqꞌij chibꞌe qꞌij saq.
26 Rumal ri xkibꞌano, ri Dios xuꞌjach pa ri kꞌixibꞌal ubꞌanik. Ri ixoqibꞌ xkikꞌex ri yaꞌtal ubꞌanik cho ri man yaꞌtal taj ubꞌanik. 27 Xuqujeꞌ ri achyabꞌ xkitzaq ubꞌanik ri riqoj ibꞌ rukꞌ ri ixoq, are xkichapleꞌj ubꞌanik mak achyabꞌ kukꞌ kech taq achyabꞌ xkibꞌan ri kꞌixibꞌal ubꞌanik, xuqujeꞌ xkikꞌamawaꞌj pa ke wi ri qꞌatoj tzij ri taqal chike.
28 Xuqujeꞌ xkichomaj chi man taqal taj kakikoj pa kwenta ri retaꞌmabꞌal ri Dios, rumal riꞌ ri Dios xuꞌjach pa ri tontoꞌil rech jeriꞌ xkibꞌano ri man taqal taj kakibꞌano. 29 Xkibꞌan ronojel uwach makaj, jiqꞌjatem, xuqujeꞌ tontoꞌil. Xenoj che tiꞌtatem, kamisanik, kojoj taq chꞌoꞌj, subꞌunik, etzelal, xuqujeꞌ tzijtaꞌlik. 30 E bꞌanal taq tzij, uꞌkꞌulel ri Dios, man kakinimaj ta kibꞌ. Kakibꞌan nimal, kakinimarisaj kibꞌ e wokol taq etzelal, man keꞌkinimaj taj ri kitat kinan. 31 Maj ketaꞌmabꞌal, man sukꞌ taj ri kakibꞌano, man kꞌo taj kinaꞌoj, man je ta kenoꞌjin winaq. 32 Qas iwetaꞌm ri kubꞌij ri sukꞌ laj utaqanik ri Dios, ri jewaꞌ kenoꞌjinik taqal chike kekamik; jeriꞌ rumal man xwi ta jeriꞌ kenoꞌjinik, xane kakibꞌij chike ri jeriꞌ kenoꞌjinik chi utz ri tajin kakibꞌano.
*1:3 1:3 Pa ri Ojer Tyoxalaj Wuj kubꞌij chi ri Cristo jun rijaꞌl ri nim taqanel David, Ezequiel 34:23, 24; 37:24, 25; Oseas 3:5. Are kubꞌij chi ri Jesús rijaꞌl ri David, xuqujeꞌ kubꞌij chi ri Cristo are Mesías.
†1:14 1:14 Ri Pablo kutzꞌibꞌaj chike ri griegos xuqujeꞌ ri man e griegos taj ri kel kubꞌij ri winaq ri kꞌo ketaꞌmabꞌal xuqujeꞌ maj ketaꞌmabꞌal.
✡1:17 1:18 Habacuc 2:4.