8
Bag-o Na Kasugtanan Na Atag Ta Dyos Paagi Ki Jesus
1 Yi beet ambalen ta ake na paambal: May anen ki na pinakadatas na pari na igo gid ta ate na kinanglan. Naan ta langit, kanen an gamungko naan tengnged ta truno ta Makagagaem Na Dyos naan dapit ta tuo.* May pasaysay parti daw ino beet ambalen ta pagpungko naan tengnged ta Dyos naan dapit ta tuo na pwidi nyo mabasa naan ta ‘footnote’ ta Hebreo 1:3. 2 Gasirbi kanen an ta Dyos naan ta langit anduni bilang pinakadatas na pari para ki kiten daw yon man na lugar pabilang na matuod na turda na para ta pagsimba naan ta Dyos daw patindeg man ta Dyos, dili patindeg ta mga ittaw paryo ta turda na patindeg danen Moises anay pa sa.
3 Ubra ya ta kada pinakadatas na pari mag-alad ta mga atag na pasalamat naan ta Dyos daw mga ayep man na alad na para ta mga sala, gani Cristo an na ate na pinakadatas na pari, kinanglan man na mag-alad. 4 Alimbawa, daw anay pa sa Cristo an anen di en ta kalibutan i, dili kanen magsirbi bilang pari tenged may mga pari en na gaalad na sunod ta Mga Sinulat Moises. 5 Piro, nlaman ta na mga pari gasirbi naan ta turda na para ta pagsimba na pasunod nang daw simbulo nang man ta langit na naan dya Dyos an. Na magpatindeg en Moises ya ta turda na para ta pagsimba naan ta Dyos, gambal Dyos an ki kanen, “Kinanglan na sunuron no gid mga papakita ko an ki kaon na imo na sunuran na naan ka ta bukid.”† Exodo 25:40 6 Nlaman ta na tenged Cristo an gasirbi bilang pari naan tengnged ta Dyos, katengdanan din an mas datas kaysa ta katengdanan ta mga pari na gasirbi naan ta turda na para ta pagsimba anay pa sa. Iling man tan, mas dayad bag-o na kasugtanan na manugpatengnga an na gapalig-en ta kasugtanan, Jesus an, kaysa ta una na kasugtanan tenged mas miad mga pangako na basian ta bag-o kaysa ta una. 7 Mas dayad bag-o na kasugtanan tenged kulang una ya na kasugtanan. Nyan na kinanglan pangarwa an na kasugtanan. 8 Pamatuuran ta Dyos na kulang pagsunod an ta mga ittaw ta una ya na kasugtanan paagi ta iya na ambal na iling ti,
“Naan ta mabot na timpo
yaken mag-atag ta bag-o na kasugtanan
naan ta mga ittaw ta Israel daw Juda.
9 Bag-o na kasugtanan dili paryo ta kasugtanan
na paatag ko anay pa sa ta iran na alinan na mga kaapuan
naan ta timpo na iran na alinan na mga kaapuan padala ko mwa alin ta Egipto.
Iran na alinan na mga kaapuan ula gatuman ta ake na kasugtanan.
Gani, ula ko danen an paintindia.
Yon ambal ta Ginuo Dyos.
10 Ambal pa ta Ginuo Dyos,
Yi bag-o na kasugtanan na iatag ko ta mga ittaw ta Israel
naan ta mabot na timpo:
Ake i na mga sugo ibetang ko naan ta iran na isip
daw naan ta iran na tagipusuon aged terek iran na pagsunod.
Yaken iran na Dyos
daw danen an ake na mga ittaw.
11 Dili en kinanglan na bisan kino ki danen
magtudlo naan ta mga paryo danen na ittaw
o mag-ambal naan ta iran na mga utod
na dapat kalaen a danen bilang iran na Dyos
tak ta pag-abot ta timpo na iatag ko
bag-o na kasugtanan,
danen tanan na mga tagan ko,
alin ta mga kebes gid ta tanan
asta ta mga bantog gid ta tanan,
kalaen a danen na iran na Dyos.
12 Patawaren ko danen an
ta iran na mga buat na malain
daw dili ko man en demdemen
iran na mga sala.”‡ Jeremias 31:31-34
13 Ta pag-ambal ta Dyos na may bag-o na kasugtanan, pabilang din una ya na kasugtanan na dili en kinanglan. Nlaman ta na bisan ino na betang na daan en daw ula man en pagamit, marwad nang en.