1 Inh kanhkã', kãnhmar jagnẽ mỹ: “sỹ ã kanhrãn há tóg tĩ, ã tỹ kygnẽ to,” he tũg nĩ. Ẽg kar vỹ kygnẽg tĩ. Kỹ Topẽ vỹ ẽg tỹ kygnẽ to ẽg vóg kónãn mág mũ, ẽg tỹ kãnhmar ẽg mré Jesus ki ge kỹ nỹtĩ ag kanhrãn sór kỹ.

2 Ẽg kar vỹ kygnẽ (ka)mẽ nỹtĩ. Ũ tỹ ã vĩ ki kygnẽg tũ pẽ nĩn kỹ tóg kuryj kar nĩ sir. Ẽg pi(jé) ne ki kygnẽg tĩ', ẽg tỹ ẽg vĩ ki kygnẽg tũ nĩn kỹ. 3 Cavalo to jykrén nĩ. Freio tỹ ẽg tóg ti jẽn kãra fig tĩ. Kỹ ẽg tóg tỹ ti vóg tĩ sir, cavalo ti, kỹ tóg ã tĩg ke ẽn ra tĩ mũ sir, ũ tỹ cavalo kri nĩ ẽn ti. 4 Kỹ canoa mág to jykrén nĩ gé. Éhé tóg nỹ, hã ra kãka vỹ ti tĩn tĩ. Kỹ ag tóg ti vóg jafã tỹ ti vóg tĩ. Kỹ tóg ag mỹ ki ke tĩ. Ti vóg mũ ag mũnh ke ra tóg tĩ mũ sir. Ti vóg jafã sĩ ra tóg ki ke mũ, canoa mág ti. 5 Ge tóg nĩ, ẽg nũnẽ ti. Sĩ ti nĩ (mỹr), hã ra ẽg tóg tỹ vĩ mág han tĩ gé.

Pĩ ri ke tóg nĩ. Ti sĩ ra tóg kejẽn vãnh pũn tĩ (mỹr), nẽn kar ti. 6 Ẽn ri ke tóg nĩ, ẽg nũnẽ ti. Tỹ ẽg tóg vẽnh jykre pãno tó tĩ. Kỹ ẽg tóg ẽg vĩ tag to kavéj kar nỹtĩ, ẽg tỹ ẽg vĩ tag to ti vĩ mranh kỹ. Ẽg kãsir nỹtĩ ra ẽg tóg vẽnh jykre pãno tó tĩ, ẽg sanh há nỹtĩ ra ke gé, ẽg kófa ra ke gé. Japo tỹ ẽg krĩn hã vẽ, ẽg tỹ ẽg vĩ ki Topẽ vĩ mranh jé.

7 Ha mẽ, bicho kar vỹ tỹ ẽg mẽg nỹtĩ. Ũ ag vỹ mĩg tỹ mẽg nỹtĩ, kỹ ũ ag vỹ sẽsĩ tỹ mẽg nỹtĩ, ũ ag vỹ pỹn tỹ mẽg nỹtĩ, ũ ag vỹ goj ki ke kar tỹ mẽg nỹtĩ gé. Ti kar kanhrãn ẽg tóg tĩ mỹr, ha mẽ. 8 Hã ra ẽg pi(jé) ẽg nũnẽ kanhrãn tĩ'. Ti kanhrãn ki kagtĩg ẽg nỹtĩ. Vẽnh jykre pãno tãvĩ tó sór ẽg tóg tĩ. Kỹ tóg veneno ri ke nĩ, ẽg vĩ ti. Tỹ ẽg tóg jagnẽ kãgtén ri ke han tĩ, ẽg nũnẽ tỹ, jagnẽ mỹ vĩ kónãn kỹ. 9 Tỹ ẽg tóg Topẽ mỹ vĩ há han tĩ, ẽg jóg mág mỹ, ẽg nũnẽ tỹ. Kỹ ẽg tóg tỹ ẽprã ke ag mỹ vĩ kónãn tĩ gé. Hã ra Topẽ tóg ẽg han, ẽg tỹ ti ri ke nỹtĩ jé. Kỹ ẽg tỹ jagnẽ mỹ vĩ kónãn kỹ ẽg tỹ Topẽ mỹ vĩ kónãn ri ke vẽ sir. 10 Ẽg jẽn kãtá tóg kãkutẽ tĩ, ẽg vĩ há ti, ẽg vĩ kónãn ti ke gé. Pir ti nĩ, ẽg jẽnky ti, hã ra ẽg tóg tỹ vĩ régre han tĩ. Tag vỹ kórég tãvĩ nĩ, inh kanhkã'. 11 Goj tỹ vẽnh kanẽ to jykrén nĩ, ẽganẽ to. Ti há nĩn kỹ tóg há nĩ, goj ti. Ti kajã nĩn kỹ tóg kajã nĩ. Ti pi(jé) tỹ goj régre nĩ', goj tỹ ẽg kanẽ ti. Pir tóg nĩ. 12 Kỹ ka kanẽ to jykrén nĩ gé. Ka tỹ pẽnva ki ẽg tóg jymi vég tũ nĩgtĩ (mỹr). Kỹ ẽg tóg vãnh tỹ jóhó ki pẽnva vég tũ nĩgtĩ gé. Pir ti nĩ, ka kanẽ ti. Ge ti nĩ gé, goj ti. Ti kajã nĩn kỹ tóg kajã nĩ gé. Kỹ gemnĩ gé, ãjag nũnẽ tỹ. Vĩ pir han nĩ.

13 Ãjag mỹ krĩ há nỹtĩ'? Ãjag mỹ Topẽ vĩ ki kanhró nỹtĩ'? Kỹ tóg há tĩ. Kỹ vẽnh jykre há kar han kỹ nỹtĩmnĩ. Hã ki vẽnh kar vỹ ãjag krĩ há venh ke mũ sir. Hã ra tỹ vĩ mág han tũg nĩ. Tỹ vẽnh kãfór han tũg nĩ gé.

14 Ãjag tỹ ũ to fe kórég nĩn kỹ tóg tỹ ũ nỹ jãvo, ãjag tỹ jagnẽ kãfór nỹtĩ sór kỹ, jagnẽ to jũ (ka)mẽ nỹtĩn kỹ, ãjag tỹ vẽsỹ ũn mág han sór kỹ. Ãjag tỹ tag han kỹ vẽso: “krĩ há inh nĩ, Topẽ vĩ ki kanhró inh nĩ,” he tũg nĩ. Vẽnh ó vẽ, tag ti. 15 Topẽ tỹ ẽg kanhrãn ja pijé', ẽg tỹ ũ to fe kórég nĩ ti, jagnẽ kãfór han sór mũ ti, jagnẽ to jũ (ka)mẽ ti ke gé. Ẽprã vẽnh jykre vẽ (mỹr), Topẽ kato tẽ ti. Japo jykre vẽ (mỹr), ẽg fe jũ tag ti. 16 Ẽg tỹ jagnẽ kãfór han sór kỹ ẽg tóg jagnẽ kato tẽgtẽ mũ sir, ẽg tỹ vẽsỹ ũn mág han sór kỹ. Kỹ ẽg tóg vĩ mẽ han kỹ jagnẽ to vẽnh jykre pãno han kãn mũ sir.

17 Ẽg tỹ hã ra Topẽ tỹ ẽg kanhrãn mũ han kỹ ẽg tóg tag han tĩ, ha mẽ: jãnhkri ẽg nỹtĩ, kavéj tũ (mỹr). Jagnẽ to ẽg tóg krĩ kusa nỹtĩ. Jagnẽ mỹ ẽg tóg komẽr hã vĩ tĩ gé. Ũ tỹ ẽg mré vĩn kỹ ẽg tóg ti vĩ mẽnh mũ, ti vĩ há nĩn kỹ. Jagnẽ jagãgtãn ẽg tĩ sir. Nén kar há han ẽg tĩ. Topẽ vĩ to ẽg tar nỹtĩ. Jykre régre tũ ẽg nỹtĩ. 18 Ẽg tỹ ti jykre tag han kỹ ẽg tóg jagnẽ krĩ kuprãg mũ sir, ẽg tỹ jykre kuryj nỹtĩ jé sir, ha mẽ.