1 A꞉la꞉dimido꞉ ko꞉sega, Gode eyo꞉ Noayo꞉ a꞉la꞉ta꞉ga꞉ no꞉ ilaboda꞉ sano꞉lo꞉, no꞉ fofano꞉lo꞉, ho꞉n ko꞉su usamilo꞉ e o꞉lia꞉lo꞉ sen a꞉no꞉ tambo o꞉asulo꞉ka꞉. A꞉la꞉fo꞉ko꞉lo꞉ Gode eyo꞉ fa꞉fa꞉so꞉ henfelo꞉ amio꞉ fofa꞉sa꞉ melea꞉ki ta꞉fo꞉, ko꞉lo꞉ fa꞉fa꞉so꞉ folabikiyo꞉, ho꞉no꞉ a꞉ma꞉la꞉ mo꞉mo꞉da tugula꞉i tiane. 2 Ho꞉n hena꞉ ha꞉g amilo꞉ deleno꞉ togolia꞉ga꞉lo꞉ ya꞉len a꞉no꞉ kalitaki, a꞉la꞉ta꞉ga꞉ ho꞉n akin halomilo꞉ tinda꞉len a꞉no꞉lo꞉ kalifa꞉. 3 A꞉la꞉gabiki ho꞉no꞉ a꞉ma꞉la꞉ elo꞉ delena ha꞉nabikiyo꞉, ololo tugula꞉i tiane. Ho꞉no꞉ tugula꞉likilo꞉ ti ha꞉na꞉leno꞉, ho꞉leno꞉ 150 a꞉la꞉fo꞉ us a꞉namio꞉ ho꞉no꞉ tugula꞉li tiane. 4 Ho꞉len a꞉no꞉ kedeta꞉ga꞉yo꞉ ele dom amio꞉, ho꞉len agelo꞉wo꞉ do꞉la꞉ta꞉ga꞉ dom amio꞉, ho꞉n ko꞉su a꞉no꞉ tinda꞉ga꞉, Alalat misio꞉wa ti ali. 5 A꞉la꞉ta꞉ga꞉ ho꞉no꞉ ele otaleno꞉ o꞉tugula꞉i tina꞉len ko꞉lo꞉, ele do a꞉na ho꞉len agel amio꞉ hen misio꞉ nolo꞉ kalaba fa꞉la꞉dowabi ba꞉ba꞉.

6-7 A꞉la꞉ta꞉ga꞉ misio꞉wo꞉ ba꞉da꞉ga꞉lo꞉ yasiseno꞉, ho꞉len do꞉la꞉fo꞉ fa꞉la꞉da꞉ino꞉ ta꞉ta꞉ga꞉, Noa eyo꞉ ho꞉n ko꞉su amilo꞉ ho꞉ ko꞉lo꞉ tamin amilo꞉ gulu a꞉no꞉ koda꞉sa꞉ga꞉, salage nowo꞉ iliga꞉fo꞉. O꞉ba꞉ a꞉no꞉ ho꞉n ko꞉su amio꞉ a꞉ma꞉la꞉yo꞉ mo꞉yaki, ho꞉no꞉ semo꞉ suguli amio꞉ e iwalu ha꞉lelia꞉ sia꞉len. 8 A꞉la꞉ta꞉ga꞉ a꞉ma꞉ fa꞉s amio꞉, Noa eyo꞉ ho꞉no꞉ henfelo꞉ amio꞉ mada suguliya꞉le a꞉la꞉bo꞉ asuluma꞉ni, o꞉ba꞉ hiyo꞉ a꞉na iliga꞉fo꞉. 9 Ko꞉sega henfelo꞉ wiyo꞉ ho꞉no꞉ o꞉delen ko꞉lo꞉, o꞉ba꞉ hi a꞉no꞉ elo꞉ mesa꞉no꞉wo꞉ mo꞉ba꞉dabiki, Noalo꞉wa a꞉ma꞉la꞉ yabiki, Noaya꞉ dagiyo꞉ tandola꞉sa꞉ga꞉, o꞉ba꞉ hiyo꞉ ta꞉ulia꞉ga꞉, ko꞉su usa a꞉ta꞉fo꞉. 10 A꞉la꞉fo꞉ko꞉lo꞉ Noayo꞉ ho꞉len dom a꞉la꞉fo꞉wo꞉ o꞉yasisa꞉ga꞉, o꞉ba꞉ hi a꞉no꞉ wa꞉ka iliga꞉fo꞉. 11 Ga꞉lowo꞉ o꞉ba꞉ hi a꞉no꞉ a꞉ma꞉la꞉ dalolia꞉ yakiyo꞉, o꞉lif i fo꞉s hondo꞉wo꞉ ma꞉lifo꞉ mio꞉ ko꞉lo꞉, Noa eyo꞉ ho꞉no꞉ henfelo꞉ amio꞉ sugulilo꞉b a꞉la꞉asulo꞉. 12 A꞉la꞉ta꞉ga꞉ Noa e ho꞉leno꞉ doma꞉la꞉fo꞉ o꞉yasisa꞉ga꞉, o꞉ba꞉ hi a꞉no꞉ wa꞉ka iliga꞉fo꞉ ko꞉sega, o꞉ba꞉ a꞉no꞉ a꞉ma꞉la꞉bo꞉ wa꞉kabiyo꞉ mo꞉mio꞉.

13 Noa e donayo꞉ 601 ta꞉ta꞉sa꞉ga꞉, ele agel a꞉na, ho꞉len agela꞉ dowabiki, henfelo꞉ amio꞉ ho꞉no꞉ suguli ko꞉lo꞉, Noa eyo꞉ ho꞉n ko꞉su wa꞉l amilo꞉ go꞉lo꞉wo꞉ hugula꞉sa꞉ga ba꞉ba꞉ amio꞉, ho꞉no꞉ hendele suguliya ba꞉ba꞉. 14 Ele andeb amilo꞉ ho꞉len agelo꞉wo꞉ do꞉la꞉fo꞉ a꞉la꞉ a꞉la꞉ta꞉ga꞉ dom a꞉la꞉fo꞉ a꞉namio꞉ heno꞉ kalalilia꞉sa꞉ga꞉, halaido꞉ fa꞉la꞉dowo꞉. 15-16 Gode eyo꞉ Noamo꞉wo꞉ a꞉la꞉sio꞉, “Ga꞉ ga o꞉lia꞉, ga꞉ so꞉wa otaleno꞉ a꞉la꞉ta꞉ga꞉ ingala꞉la꞉yo꞉, gio꞉ tambo ha꞉la꞉ya hamana. 17 Mela꞉no꞉lo꞉ a꞉lab kelego꞉ ho꞉n ko꞉su amilo꞉ disa꞉ a꞉no꞉ tambo, o꞉ba꞉yo꞉lo꞉, no꞉ fofano꞉lo꞉, no꞉ ilaboda꞉ sano꞉lo꞉, no꞉ kelego꞉ galin hen amilo꞉ dalolia꞉ ha꞉nano꞉lo꞉, ge o꞉lia꞉ a꞉ma꞉la꞉ ha꞉la꞉ya tililia꞉ga꞉ handaloma. A꞉la꞉do꞉ dimido꞉ a꞉ma꞉yo꞉, iyo꞉ henfelo꞉wa ha꞉na꞉sia꞉sa꞉ga꞉, inso꞉wo꞉ mo꞉lilo꞉ sugusula꞉i ha꞉naki, henfelo꞉ we ililila꞉ma꞉ki go꞉.” Godeya꞉ a꞉la꞉sio꞉. 18 A꞉la꞉sa꞉labiki Noayo꞉, ingayo꞉, inso꞉ otaleno꞉ a꞉la꞉ta꞉ga꞉ inso꞉wa꞉ ingala꞉la꞉yo꞉ ha꞉la꞉ya ua handalowo꞉. 19 A꞉la꞉ta꞉ga꞉ no꞉ henfelo꞉ amilo꞉ dalale san a꞉no꞉ tambo, no꞉ fofano꞉lo꞉, no꞉ ilaboda꞉ sano꞉lo꞉, no꞉ kelego꞉ galin hen amilo꞉ dalolia꞉ ha꞉nano꞉lo꞉, o꞉ba꞉yo꞉lo꞉, tambo ho꞉n ko꞉suwa a꞉la꞉ta꞉ga꞉ inin misili alifelo꞉ a꞉no꞉ ua ele handalowo꞉.

20 A꞉la꞉dimida꞉sa꞉ga꞉yo꞉, Noa eyo꞉ Yaweya꞉ ene wi duludaki boba so꞉kugulu mea꞉nikiyo꞉, uwo꞉ dibida꞉i fa꞉la꞉nda꞉sa꞉ga꞉, imili alifa꞉. No꞉ o꞉lia꞉ o꞉ba꞉ o꞉lia꞉, kaluwa꞉lo꞉ o꞉li nan i a꞉no꞉ imilida꞉lo꞉wo꞉ dia꞉sa꞉ga꞉, u wa꞉l ami Yawemo꞉ so꞉kugulu me. 21 No꞉ mundo꞉ nafa ko꞉lo꞉ kugulu so꞉da꞉lab a꞉no꞉ Yawe eyo꞉ da꞉da꞉sa꞉ga꞉, ene asulo꞉ amio꞉ towo꞉ a꞉la꞉dinali sa꞉laki, “Ho꞉leno꞉ tambowo꞉ kaluka꞉isaleyo꞉ o꞉so꞉waya a꞉la꞉ta꞉ga꞉ ha꞉nakiyo꞉, asulo꞉ inido꞉ma꞉yo꞉ mogago꞉le dimida꞉mela꞉no꞉ asula꞉sen. Ko꞉sega kaluwa꞉lo꞉ mogago꞉ dimido꞉ a꞉no꞉ wa꞉deakiyo꞉, henfelo꞉ we wa꞉kabiyo꞉ mo꞉mogagila꞉ma꞉no꞉. A꞉la꞉ta꞉ga꞉ nilo꞉ o꞉gdo꞉ mela꞉no꞉lo꞉ a꞉labo꞉ tambo yasala꞉ aumbo꞉, wa꞉kabiyo꞉ mada mo꞉dimidama꞉no꞉.