1 Tif amio꞉ Ablam e ho꞉le ba꞉dakiyo꞉, Yawe eyo꞉ emo꞉wo꞉ a꞉la꞉sio꞉,

2 Ko꞉sega Ablam eyo꞉ to sa꞉lab a꞉no꞉ da꞉da꞉sa꞉ga꞉yo꞉ a꞉la꞉sio꞉, “Wiso꞉, Alan Yawe, ne so꞉walo꞉ma ko꞉lo꞉, ni dabun kelego꞉wo꞉ Eliesa, Damaskas kalu e dia꞉ib. A꞉la꞉fo꞉ko꞉lo꞉ wa꞉l kelego꞉ gilo꞉ nemo꞉lo꞉ dimia꞉no꞉ a꞉no꞉ ni so꞉lo꞉ amio꞉ mo꞉dowa꞉i ha꞉naliki, ne mo꞉asuwa꞉fa꞉ib. 3 Giyo꞉ so꞉wayo꞉ nemo꞉wo꞉ mo꞉dimi ko꞉lo꞉, ni nanogdo꞉ dian kaluwa꞉lo꞉ so꞉wa sa꞉la꞉liab a꞉ma꞉ ni dabuno꞉ dia꞉ib.” 4 Ablam eyo꞉ towo꞉ sa꞉la꞉sa꞉ga꞉ edabiki, Yawe eyo꞉ Ablam emo꞉wo꞉ towo꞉ a꞉la꞉sio꞉, “Kalu a꞉ma꞉yo꞉ dabun gilo꞉wo꞉ mo꞉dia꞉ib. Ko꞉sega go꞉no꞉n ho꞉bo꞉leya a꞉la꞉ta꞉ga꞉lo꞉ sa꞉la꞉liab a꞉ma꞉yo꞉, dabun gilo꞉wo꞉ ene dia꞉ib.” 5  Lom 4.18, Hibu 11.12A꞉la꞉sa꞉la꞉sa꞉ga꞉ dowabiki Gode eyo꞉ Ablam e ha꞉la꞉ya tililia꞉ ha꞉na꞉sa꞉ga꞉ a꞉la꞉sio꞉, “Ge akin halo bo꞉ba. Tamin gego꞉ a꞉no꞉, giyo꞉ agelema꞉no꞉ o꞉liyo꞉? Geya a꞉la꞉ta꞉ga꞉lo꞉ so꞉wa sa꞉la꞉la꞉i ha꞉nab a꞉no꞉, tamin gego꞉ o꞉leo꞉ngo꞉ doma꞉ib,” a꞉la꞉sio꞉. 6  Lom 4.3, Gala 3.6, Ya꞉m 2.23Ablam e Yawe elo꞉ to sa꞉lab a꞉no꞉ hendele tilida꞉dabiki, Yawe eyo꞉ elo꞉ tilida꞉dab a꞉na ba꞉da꞉ga꞉, e digalo꞉ kalu a꞉la꞉bo꞉ a꞉na aloba꞉da꞉sa꞉ga꞉ da꞉feyo꞉. 7 A꞉la꞉ta꞉ga꞉ Yawe eyo꞉ emo꞉wo꞉ wa꞉ka sa꞉laki, “Ne Yawe. Ge Ul amisa꞉n, Kaldia hen a꞉na sabikiyo꞉, niyo꞉ hen we gemo꞉ dimia꞉sa꞉ga꞉ biso꞉wo꞉ ge doma꞉ki, wena tililia꞉ mio꞉.” 8 Ko꞉sega Ablam eyo꞉ towo꞉ a꞉ma꞉la꞉ sa꞉laki, “Wiso꞉ Alan Yawe, hen we biso꞉wo꞉ hendele ne doma꞉no꞉lo꞉b a꞉la꞉bo꞉, waga asuluma꞉no꞉wa꞉le?” 9 A꞉la꞉fo꞉ko꞉lo꞉ Yawe eyo꞉ emo꞉ a꞉ma꞉la꞉ sa꞉laki, “Kelego꞉ nolo꞉ nelo꞉wa dia꞉mena. Kao mala o꞉lia꞉ goudi mala o꞉lia꞉ sibi de o꞉lia꞉ dona otalendo꞉ gulula꞉ a꞉no꞉ a꞉la꞉ta꞉ga꞉ o꞉ba꞉ hi o꞉lia꞉ o꞉ba꞉ susu ha꞉lu o꞉lia꞉yo꞉ nelo꞉wa dia꞉mena,” a꞉la꞉sio꞉. 10 A꞉la꞉sa꞉labiki Ablam eyo꞉ no꞉ a꞉no꞉ elo꞉wa tambo dia꞉ya꞉sa꞉ga꞉, a꞉na noba꞉nela꞉sa꞉ga꞉yo꞉, noba꞉n nodowo꞉ nodo dila꞉, a꞉la꞉ta꞉ga꞉ nodowo꞉ nodo dila꞉. Ko꞉sega o꞉ba꞉ a꞉la꞉ a꞉no꞉ mo꞉noba꞉iyaki, ka dila꞉. 11 No꞉ noba꞉nela꞉ a꞉no꞉ dila꞉sa꞉ga꞉ dowabiki, usulage a꞉ma꞉ ma꞉ni tinda꞉labikiyo꞉, Ablam eyo꞉ o꞉lusanaga꞉fela꞉len.

12  Job 4.13,14Ga꞉lo ofo꞉ tinabiki, Ablam e mada alan alifo꞉len ko꞉lo꞉, sololiya꞉yo꞉ e go꞉lula꞉fo꞉labiki, e tagio꞉ alan dowo꞉. 13  Kis 1.1-14, Ilig 7.6A꞉la꞉fo꞉labiki Yawe eyo꞉ emo꞉wo꞉ a꞉la꞉sio꞉, “To nilo꞉ so꞉lo꞉l we, hendele fa꞉la꞉doma꞉ib a꞉la꞉bo꞉ giyo꞉ mada asululia꞉bi. So꞉wa gilo꞉ sa꞉la꞉la꞉likilo꞉ ha꞉na꞉lab i a꞉no꞉, hen noma꞉lo꞉wa mageso꞉ kalu ko꞉lo꞉ mio꞉ san o꞉ngo꞉ mesa꞉ib. Donayo꞉ 400 a꞉la꞉fo꞉ a꞉na silikiyo꞉, iyo꞉ madali nanog dian kalu dowaki, hendo꞉ biso꞉ iliyo꞉ iyo꞉ dikidi sa꞉ndamela꞉ib. 14  Kis 12.40-41, Ilig 7.7Ko꞉sega tif amio꞉, ilo꞉ madali nanog dima꞉kilo꞉ ta꞉fo꞉ kalu i a꞉no꞉ niyo꞉ falasila꞉ma꞉no꞉. A꞉ma꞉ fa꞉s amio꞉ so꞉wa gililo꞉ sa꞉la꞉la꞉i ane a꞉no꞉ a꞉ma꞉la꞉ yakiyo꞉, kelego꞉wo꞉ modo꞉ dia꞉mia꞉ib. 15 Ko꞉sega Ablam, ge ha꞉fa꞉nolo ta꞉i ha꞉na꞉la꞉ga꞉, anaso꞉ dota꞉ga꞉, ge a꞉na sowaliki dali alifa꞉ib. 16 Ko꞉sega Amol kaluka꞉isale hen wenamilo꞉ sab i a꞉ma꞉lo꞉ mogago꞉ dimida꞉len a꞉no꞉ alano꞉ semo꞉fa꞉la꞉dowo꞉ ko꞉lo꞉, i wa꞉dema꞉no꞉ ho꞉lendeyo꞉ semo꞉fa꞉la꞉dowab. A꞉la꞉fo꞉ko꞉lo꞉ so꞉wa gilo꞉ sa꞉la꞉la꞉i ane a꞉no꞉ a꞉ma꞉la꞉bo꞉ bo꞉bo꞉gebo꞉ mo꞉mia꞉ib.* Ablama꞉ ene so꞉lo꞉wo꞉ Ka꞉ina꞉n hena a꞉ma꞉la꞉ a꞉fa꞉la꞉dowalikiyo꞉, iliyo꞉ kaluka꞉isale Ka꞉ina꞉n hen amilo꞉ sen a꞉no꞉ o꞉lusa꞉ndaliki, Gode eyo꞉ iyo꞉ a꞉na falasilaki, wa꞉lo꞉ dimia꞉ib. So꞉lo꞉ ha꞉nab agelo꞉wo꞉ fa꞉la꞉da꞉in dowa꞉sa꞉ga꞉, iyo꞉ a꞉namio꞉ a꞉ma꞉la꞉yo꞉ a꞉na mia꞉ib.” Yawe eyo꞉ a꞉la꞉dinali saefa꞉.

17 Ofo꞉ tina꞉sa꞉ga꞉ sololiabiki, no꞉lo꞉ noba꞉nela꞉ dila꞉ us a꞉namio꞉, go꞉fo꞉ amilo꞉ de ho꞉mo꞉ndo꞉ dowo꞉ a꞉no꞉lia꞉, gele ho꞉ a꞉no꞉lia꞉ handalota꞉ga꞉, us a꞉na tinia꞉li ane. 18  Ilig 7.5O꞉g a꞉namio꞉, Yawe eyo꞉ Ablam o꞉lia꞉ towo꞉ dinali saetaki a꞉la꞉sio꞉, “Hen we so꞉wa gilo꞉ sa꞉la꞉la꞉i ha꞉nab o꞉mo꞉ dimi ko꞉lo꞉, hen we Isib ho꞉n a꞉na mo꞉mo꞉dalia꞉sa꞉ga꞉, eda꞉li aneyo꞉ ho꞉n alan Yufuletisdo꞉ a꞉lab a꞉na fa꞉la꞉dowo꞉. 19 Hen a꞉namilo꞉ kaluka꞉isale o꞉gdo꞉ sabo꞉ we. Kin kaluwo꞉, Kenas kaluwo꞉, Katmon kaluwo꞉, 20 Hit kaluwo꞉, Beles kaluwo꞉, Lefa kaluwo꞉, 21 Amol kaluwo꞉, Ka꞉ina꞉n kaluwo꞉, Giligas kaluwo꞉ a꞉la꞉ta꞉ga꞉ Ya꞉bus kaluwo꞉. Hen a꞉no꞉ so꞉wa gilo꞉mo꞉ dimi.” Yawe eyo꞉ a꞉la꞉dinali saefa꞉.