1 Ho꞉len no amio꞉, Fa꞉lisi kalu nolo꞉lo꞉ a꞉la꞉ta꞉ga꞉ elelo꞉ wida꞉sen kalu nol o꞉lia꞉yo꞉, Ya꞉lusalem a꞉la꞉ta꞉ga꞉ yakiyo꞉, iyo꞉ Ya꞉sulo꞉wa ya꞉sa꞉ga꞉yo꞉, e o꞉lia꞉ towa꞉ kegakiyo꞉ a꞉la꞉sio꞉. 2 “Gilo꞉ tili wida꞉sen kalu iliyo꞉ ma꞉no꞉ ma꞉nikiyo꞉, dagiyo꞉ tamin amio꞉ mo꞉to꞉go꞉dab ko꞉lo꞉, nili ma꞉muwa꞉ mano꞉ ili mo꞉kudu ha꞉nab a꞉no꞉ mo꞉wo꞉ ha꞉?” 3 A꞉la꞉sa꞉labiki Ya꞉su eyo꞉lo꞉ to o꞉leauka imo꞉wo꞉ a꞉ma꞉la꞉bo꞉ a꞉la꞉sio꞉, “Giliyo꞉ gi ma꞉muwa꞉lo꞉ dimidan man a꞉no꞉ ka kudu ha꞉naki, ko꞉sega Godeya꞉ ele difa꞉ a꞉no꞉ gililo꞉ o꞉go꞉sa꞉lab ko mo꞉wo꞉ ha꞉? 4  Kis 20.12, 21.17, Lo 5.16Gode eyo꞉ ele we saefa꞉, ‘Gio꞉ go꞉lo꞉ go꞉wo꞉ alano꞉ o꞉m a꞉la꞉asulaki, ili ha꞉ga dowa꞉lubi.’ A꞉la꞉ta꞉ga꞉ ele nowo꞉ we, ‘So꞉wa abeyo꞉ iyalia꞉ anolia꞉mo꞉wo꞉ to mogago꞉wo꞉ sa꞉lalega, e mada sana sowa꞉bi,’ a꞉la꞉saefa꞉. 5-6 Ko꞉sega giliyo꞉ towo꞉ a꞉la꞉sa꞉la꞉sen, ‘Kalu abeyo꞉ iyalia꞉ anolia꞉mo꞉ sa꞉lakiyo꞉, “Kelego꞉ we gemo꞉ dimia꞉no꞉ ko꞉sega, niyo꞉ kelego꞉ we Godemo꞉ dimia꞉no꞉ da꞉fe alifa꞉ ko꞉lo꞉ ge mo꞉asuwa꞉fa꞉no꞉,” towo꞉ o꞉leo꞉ngo꞉ sa꞉lalega, kalu iyayo꞉ mo꞉wabudaki gab a꞉no꞉ giliyo꞉ o꞉ligab a꞉la꞉sa꞉la꞉sen. Gilido꞉ a꞉la꞉do꞉ ga꞉lab a꞉na ilikiyo꞉, Godeya꞉ ele a꞉no꞉ anilakiyo꞉ o꞉ngo꞉malo꞉ngo꞉ ta꞉taki, gi ma꞉muwa꞉ man a꞉no꞉ wabudaki wa꞉la꞉bo꞉ a꞉no꞉ ko꞉lo꞉ ta꞉lisab. 7 To mosowa꞉lo꞉ widan kaluwo꞉ gi we. Dinali sa꞉lan kalu Aisaya eyo꞉ man gilido꞉ a꞉no꞉ hendele da꞉feakiyo꞉, to we a꞉na dinali saefa꞉,

10 A꞉la꞉gabiki, Ya꞉suwa꞉yo꞉ kaluka꞉isaleyo꞉ elo꞉wa mena꞉ki ho꞉ida꞉sa꞉ga꞉yo꞉, towo꞉ imo꞉wo꞉ a꞉la꞉sio꞉. “Gio꞉ to we dinafa da꞉da꞉sa꞉ga꞉ asula꞉bi. 11  Madi 12.34Kelego꞉ kaluwa꞉ mego꞉f amilo꞉ ti ha꞉nab a꞉ma꞉yo꞉, Godeya꞉ siwa꞉l amio꞉ e heyo꞉wo꞉ doma꞉kiyo꞉ mo꞉dimidama꞉ib. Ko꞉sega kalu a꞉ma꞉ ene mego꞉fa a꞉la꞉ta꞉ga꞉lo꞉ handalowab a꞉ma꞉yo꞉sa, e heyo꞉wo꞉ doma꞉ki ta꞉fa꞉ib,” a꞉la꞉sio꞉.

12 Tif amio꞉ Ya꞉suwa꞉lo꞉ tili wida꞉sen kalu iyo꞉ elo꞉wa ya꞉ga꞉yo꞉ emo꞉wo꞉ a꞉la꞉sio꞉, “Fa꞉lisi kalu iyo꞉ to gilo꞉ sio꞉ a꞉no꞉ da꞉da꞉likiyo꞉, iyo꞉ to a꞉ma꞉yo꞉ gemo꞉wo꞉ mo꞉bea꞉sa꞉ga꞉, gola ba꞉daki gab, a꞉la꞉bo꞉ ge asulaya꞉le?” 13-14  Luk 6.39, Lom 2.19Ya꞉su eyo꞉ a꞉ma꞉la꞉yo꞉ a꞉la꞉sio꞉, “Giliyo꞉ a꞉no꞉ asula꞉so꞉bo. Ini kabi ta꞉ta꞉bi. Ni Do Hebenelo꞉ a꞉lab a꞉ma꞉yo꞉, fo enedo꞉ mo꞉gelo꞉ a꞉no꞉ tambo dugula꞉ma꞉ib. Fa꞉lisi kalu iliyo꞉ kaluka꞉isaleyo꞉ tililia꞉ ha꞉naki bo꞉fo꞉mela꞉no꞉ asulab ko꞉sega, iyo꞉ siyo꞉ ko꞉n kalu o꞉ngo꞉ dowab. Siyo꞉ ko꞉n kalu noma꞉yo꞉, siyo꞉ ko꞉n kalu nowo꞉ tililia꞉ ha꞉nalega, a꞉la꞉yo꞉ ida꞉niase daido꞉wa mada ho꞉lufa꞉ib.”

15 Ko꞉sega Bidaya꞉ emo꞉ sa꞉laki, “Giyo꞉ bale sio꞉ we nimo꞉wo꞉ fanda sama.” 16 Ya꞉su eyo꞉ imo꞉wo꞉ a꞉la꞉sio꞉, “Gio꞉ o꞉semo꞉ asulo꞉wo꞉? 17 Kelego꞉ o꞉ba꞉le mego꞉f amilo꞉ ti ha꞉nab a꞉no꞉ tambo kufa꞉ usamio꞉ ti ha꞉na꞉sa꞉ga꞉, a꞉ma꞉la꞉ baya ha꞉na꞉sen. Giliyo꞉ a꞉la꞉bo꞉ mo꞉asulo꞉wa꞉le? 18 Ko꞉sega kelego꞉ asulo꞉wa a꞉la꞉ta꞉ga꞉lo꞉ mego꞉f amilo꞉ fa꞉la꞉dowab a꞉ma꞉yo꞉, kaluwo꞉ heyo꞉wo꞉ doma꞉ki ta꞉ta꞉sen. 19 Mo꞉wo꞉ kaluwa꞉ asulo꞉ usamilo꞉ mogago꞉ ko꞉lilo꞉ fa꞉la꞉dowa꞉lab a꞉no꞉ we. Asulo꞉ mogago꞉wo꞉, kalu sana soma꞉no꞉ mano꞉, kalu galeso꞉ o꞉lia꞉ ga indo꞉ o꞉lia꞉ma꞉lo꞉ afa dian mano꞉, uwo꞉ dian mano꞉, afa dian mano꞉, nowo꞉mbo꞉lo꞉ diga꞉li sa꞉lan mano꞉, a꞉la꞉ta꞉ga꞉ sada꞉dan mano꞉ o꞉m. 20 Godeya꞉ siwa꞉l amio꞉ kaluwo꞉ heyo꞉lo꞉ dowa꞉labo꞉ man wema꞉ gelab. Ko꞉sega dagiyo꞉ mo꞉to꞉go꞉dakilo꞉ mano꞉ nan man a꞉ma꞉yo꞉, e amio꞉ heyo꞉wo꞉ mada mo꞉doma꞉ib.”

21 A꞉la꞉ta꞉ga꞉ Ya꞉suwo꞉ hen a꞉no꞉ ta꞉ta꞉sa꞉ga꞉, e Taya o꞉lia꞉ Saido꞉n hen a꞉namida꞉ ha꞉na꞉ni ane. 22 Ka꞉ina꞉n ga* Isolael kaluka꞉isaleyo꞉ Ka꞉ina꞉n hen a꞉namio꞉ semo꞉ fa꞉la꞉dowo꞉ amio꞉, kaluka꞉isale hen a꞉namilo꞉ sen a꞉no꞉ Ka꞉ina꞉n kalu a꞉la꞉sa꞉la꞉sen. Ga we, Isolael gama. E Ka꞉ina꞉n so꞉lo꞉wa a꞉la꞉ta꞉ga꞉ fa꞉la꞉dowo꞉. nowo꞉ a꞉na elen. Ga a꞉no꞉, Isolael gama ko꞉sega e Ya꞉sulo꞉wa yakiyo꞉, emo꞉wo꞉ halale sa꞉laki a꞉la꞉sio꞉, “Kalu Alan, Da꞉ibida꞉ so꞉wa, giyo꞉ ne nofolaki asuwa꞉foma. Ni na꞉la꞉yo꞉ mama mogago꞉ dowaki mada mogagila꞉lab,” a꞉la꞉sio꞉. 23 Ko꞉sega Ya꞉su eyo꞉ a꞉ma꞉la꞉yo꞉ to nowo꞉ emo꞉wo꞉ mada mo꞉sio꞉. Enedo꞉ tili wida꞉sen kalu iyo꞉ elo꞉wa ya꞉sa꞉ga꞉, emo꞉wo꞉ towo꞉ susiaki a꞉la꞉sio꞉, “Ga we nili fa꞉sa yakiyo꞉ towo꞉ halale sa꞉la꞉i yab ko꞉lo꞉, e a꞉ma꞉la꞉ iliga꞉foma.” 24  Madi 10.6Ya꞉su eyo꞉ towo꞉ a꞉ma꞉la꞉yo꞉ a꞉la꞉sio꞉, “Isolael kaluka꞉isaleyo꞉ sibi sulu ane o꞉ngo꞉ ko꞉lo꞉, i a꞉no꞉ko꞉ asuwa꞉foma꞉ki, ne a꞉na iliga꞉fo꞉.” 25 Ko꞉sega ga a꞉no꞉ Ya꞉sulo꞉wa ya꞉sa꞉ga꞉ gulalu misa꞉fu alilakiyo꞉, emo꞉wo꞉ a꞉la꞉sio꞉, “Kalu Alan, giyo꞉ ne asuwa꞉foma.” 26 Ya꞉su eyo꞉ towo꞉ a꞉ma꞉la꞉ sa꞉lakiyo꞉ a꞉la꞉sio꞉, “So꞉wagalina꞉ ma꞉no꞉wo꞉ asulia꞉ga꞉yo꞉, gasamo꞉ sandifa꞉no꞉wo꞉ mada mo꞉ililo꞉.” 27 A꞉la꞉sa꞉labiki ga a꞉ma꞉ sa꞉lakiyo꞉, “Kalu Alan, gilo꞉ to sa꞉lab ko mada hendele. Ko꞉sega gasalo꞉ biso꞉wa꞉ i fofodo꞉ ha꞉g ami siliki, ma꞉n muda꞉yo꞉ sudufelab a꞉no꞉ ko꞉lo꞉ na꞉sen.” 28 Ya꞉su eyo꞉ to a꞉no꞉ da꞉da꞉sa꞉ga꞉yo꞉, emo꞉wo꞉ a꞉la꞉sio꞉, “Ga ge, tili dabu gilo꞉wo꞉ mada alan ko꞉lo꞉, kelego꞉ gilo꞉ fa꞉la꞉domabesa꞉ a꞉la꞉do꞉ asulab a꞉no꞉, hendele fa꞉la꞉doma꞉ki ta꞉to꞉l.” A꞉la꞉ta꞉ga꞉ wigibo a꞉naka gaya꞉ ida꞉yo꞉ hendele falelab.

29 Ya꞉suwo꞉ hen a꞉no꞉ ta꞉ta꞉sa꞉ga꞉, Ga꞉lili ho꞉n golo꞉ anib a꞉na ha꞉na꞉ni ane. A꞉na ha꞉nakiyo꞉, Ya꞉su e misio꞉wa fa꞉la꞉ ha꞉na꞉sa꞉ga꞉ a꞉na mesa꞉ni ane. 30 A꞉la꞉ta꞉ga꞉ kaluka꞉isaleyo꞉ modo꞉ ko꞉lo꞉ elo꞉wa mio꞉. Iliyo꞉ ko꞉go꞉neli kaluka꞉isaleyo꞉lo꞉, siyo꞉ ko꞉no꞉lo꞉, giligisen kaluka꞉isaleyo꞉lo꞉, mego꞉fo꞉ do꞉fo꞉fo꞉lo꞉, a꞉la꞉ta꞉ga꞉ walaf kalu nolo꞉lo꞉ modo꞉ tililia꞉ga꞉, Ya꞉suwa꞉ gib anib a꞉na ta꞉felabikiyo꞉, eyo꞉ i a꞉na falele alifelo꞉. 31  Mak 7.37A꞉la꞉fo꞉ko꞉lo꞉ mego꞉fo꞉ do꞉fo꞉f dowo꞉wo꞉ tola꞉b, a꞉la꞉ta꞉ga꞉ giligiseno꞉lo꞉ o꞉li dowa꞉b, gibo꞉ ko꞉go꞉neliyo꞉lo꞉ o꞉li ha꞉na꞉b, a꞉la꞉ta꞉ga꞉ siyo꞉ ko꞉no꞉lo꞉ wa꞉ka a꞉ba꞉da꞉b a꞉la꞉gabiki kaluka꞉isale iyo꞉ dimidab a꞉no꞉ ba꞉dakiyo꞉, iyo꞉ mo꞉lo꞉ asulaki, Isolael kaluwa꞉ Gode inido꞉ a꞉ma꞉ wiyo꞉ ko꞉lo꞉ wabudaki dulugu sio꞉.

32  Madi 14.14Ya꞉su eyo꞉ enedo꞉ tili wida꞉sen kaluwo꞉ elo꞉wa mena꞉ki ho꞉ida꞉sa꞉ga꞉yo꞉, eyo꞉ imo꞉wo꞉ a꞉la꞉sio꞉, “Ne kaluka꞉isale kegeo꞉ i we mada nofolab. Iyo꞉ ho꞉len otaleno꞉ ne o꞉lia꞉ wena sen ko꞉lo꞉, o꞉go꞉ ma꞉no꞉ ma꞉no꞉wo꞉ aundo꞉ma dowabiki, iyo꞉ maiyo꞉wo꞉ alan dowab. Iyo꞉ kilo꞉ma dowaki toga tulu alilabena꞉kiyo꞉, niyo꞉ mo꞉iliga꞉fa꞉no꞉ a꞉la꞉asulo꞉.” 33 Enedo꞉ tili wida꞉sen kalu iliyo꞉ emo꞉wo꞉ a꞉la꞉sio꞉, “Nio꞉ ma꞉no꞉loma hena so꞉l a꞉la꞉ta꞉ga꞉ kalu kegeo꞉wo꞉ modo꞉lo꞉biki, ma꞉no꞉ modo꞉wo꞉ o꞉bami dia꞉sa꞉ga꞉ maiya꞉ki dimia꞉no꞉wa꞉le?” 34 Ya꞉su eyo꞉ imo꞉wo꞉ a꞉la꞉dabu ba꞉ba꞉, “Falawa dowo꞉fa꞉yo꞉ giliyo꞉ o꞉biba꞉s da꞉laba?” Iliyo꞉ emo꞉ a꞉ma꞉la꞉ sa꞉lakiyo꞉, “Dom a꞉la꞉fo꞉ a꞉la꞉ta꞉ga꞉ ka꞉ galin nolo꞉lo꞉ da꞉lab,” a꞉la꞉sio꞉. 35-36 Ya꞉su eyo꞉ kaluka꞉isale kegeo꞉ a꞉no꞉ hena mesea꞉ki sa꞉la꞉sa꞉ga꞉yo꞉, eyo꞉ falawa dowo꞉fa꞉ dom a꞉la꞉fo꞉ o꞉lia꞉ ka꞉ o꞉lia꞉yo꞉ dia꞉sa꞉ga꞉, Godemo꞉ mada o꞉m a꞉la꞉sio꞉. Dulugu sa꞉la꞉sa꞉ga꞉yo꞉, ma꞉no꞉wo꞉ goda꞉sa꞉ga꞉, enedo꞉ tili wida꞉sen kalumo꞉ dimiabiki, iliyo꞉ kaluka꞉isale kegeo꞉ o꞉mo꞉wo꞉ a꞉na so꞉go꞉. 37 Kaluka꞉isale iyo꞉ ma꞉no꞉wo꞉ na꞉la꞉ga꞉ o꞉li dowabiki, ma꞉no꞉ heb ta꞉felo꞉ a꞉no꞉ ko꞉lo꞉ kegeo꞉wo꞉, fafowo꞉ dom a꞉la꞉fo꞉ wa꞉li tandeo꞉. 38 Ma꞉no꞉ o꞉lo꞉ mo꞉no꞉wo꞉, kalule agelo꞉wo꞉ daosen fa꞉la꞉da꞉in ko꞉lo꞉ sen (4,000.) Ko꞉sega ka꞉isale o꞉lia꞉ so꞉wagalin o꞉lia꞉yo꞉ mo꞉agelo꞉.

39 A꞉la꞉ta꞉ga꞉ Ya꞉su eyo꞉ kaluka꞉isale kegeo꞉ a꞉no꞉ iliga꞉takiyo꞉, e ho꞉n ko꞉suwa disa꞉la꞉sa꞉ga꞉, Magadan hen a꞉na ane.