Mo꞉fo꞉s We Fo꞉l Eyo꞉
Filemon
Emo꞉ Sa꞉sa꞉liga꞉fo꞉
Asuluma꞉no꞉ towo꞉ we
Mo꞉fo꞉s we Fo꞉l eyo꞉ Keliso kalu nowo꞉ Filemon emo꞉ sa꞉sa꞉liga꞉fo꞉. Filemona꞉ ene madali nanogdo꞉ dian kalu nowo꞉, Onesimus e tamin amio꞉ Filemono꞉ ta꞉ta꞉ga꞉ nai ane. E nai ha꞉na꞉ga꞉, amisa꞉n nowa elena, Fo꞉l e o꞉lia꞉ dibolo aya galili. Onesimus e Fo꞉l o꞉lia꞉ silikiyo꞉, e Keliso dota꞉ga꞉, Folo꞉ a꞉na asuwa꞉ta꞉len.
Fo꞉l e dibolowa silikiyo꞉, mo꞉fo꞉s we Filemonbo꞉ sa꞉sa꞉liga꞉fo꞉. Filemon eyo꞉ Onesimuso꞉ a꞉ma꞉la꞉ dia꞉sa꞉ga꞉, ha꞉fo꞉ disa꞉laki, aole o꞉ngo꞉ doma꞉ki, mo꞉fo꞉s we a꞉na sa꞉sa꞉liga꞉fo꞉.
1
1-2 Kolo 4.17, 2Tim 2.3Fo꞉l, ne Ya꞉su Kelisowa꞉ wiya a꞉la꞉ta꞉ga꞉lo꞉ dibolo amilo꞉ so꞉l ne o꞉lia꞉ nao Timoti naino꞉ sagalo꞉ towo꞉ gemo꞉ sa꞉sa꞉liga꞉to꞉l.
To we nili mili nafa nanogo꞉ negelelo꞉ dia꞉seno꞉, Filemon, ge o꞉lia꞉ nado Abia o꞉lia꞉ negelelo꞉ nanogo꞉ halaido꞉lo꞉ dia꞉seno꞉ Akibus o꞉lia꞉ Keliso kaluka꞉isale gi ayamilo꞉ Godeya꞉ mando꞉ da꞉ba꞉ ya꞉lab o꞉lia꞉mo꞉wo꞉, mo꞉fo꞉s we gimo꞉ sa꞉sa꞉liga꞉to꞉l.
3 Do Gode o꞉lia꞉ nili Alan Ya꞉su Keliso o꞉lia꞉ma꞉yo꞉ ini ha꞉fo꞉ disa꞉lan man o꞉lia꞉ ha꞉salo꞉ mesa꞉no꞉ man a꞉no꞉lia꞉yo꞉ gi o꞉lia꞉ dofo꞉melea꞉ki, Godemo꞉ dulugu so꞉lo꞉l.
Filemon elo꞉ man nafale dimido꞉wo꞉ we
4-5 Gilo꞉ Ya꞉su Alan amilo꞉ tilidabu a꞉no꞉lia꞉, Godeya꞉ ene malilo꞉ kaluka꞉isalemo꞉lo꞉ ha꞉fo꞉ disa꞉ man a꞉no꞉lia꞉yo꞉ ne da꞉da꞉sen ko꞉lo꞉, niyo꞉ nili Godemo꞉ dulugu sa꞉la꞉likiyo꞉, ge asulufo꞉liki mada o꞉m a꞉la꞉sa꞉la꞉sen. 6 Gilo꞉ tilidabu a꞉no꞉ nolbo꞉wo꞉ wida꞉lalikiyo꞉, giyo꞉ Ya꞉su Kelisowa dowab amilo꞉ kelego꞉ nafale nimo꞉lo꞉ dimi a꞉no꞉ go꞉no꞉no꞉ fanda asululima꞉ki, niyo꞉ ge Godemo꞉ dulugu so꞉lo꞉l. 7 2Kol 7.4Ni nao, giyo꞉ Keliso kaluka꞉isale nolo꞉ sagale alifela꞉sen ko꞉lo꞉, gilo꞉ ha꞉fo꞉ disa꞉lan man a꞉ma꞉yo꞉ ne ko꞉lo꞉ halale alitaki, sagale alifa꞉.
Onesimuso꞉ asuwa꞉foma꞉ki, Filemonbo꞉ sio꞉
8 A꞉la꞉fo꞉ko꞉lo꞉ Filemon, gilo꞉ dimidama꞉no꞉wo꞉ nowo꞉ da꞉lab ko꞉lo꞉, giyo꞉ dimidama꞉ki, Ya꞉suwa꞉lo꞉ iliga꞉felo꞉ kalu niyo꞉ to halaido꞉wo꞉ gemo꞉wo꞉ o꞉li sa꞉ma꞉no꞉. 9 Ko꞉sega Keliso kaluka꞉isalemo꞉lo꞉ ha꞉fo꞉ disa꞉la꞉sen man gilo꞉wo꞉ ne asulo꞉ ko꞉lo꞉ to halaido꞉wo꞉ gemo꞉wo꞉ mo꞉sa꞉laki, go꞉no꞉n asulo꞉wa꞉ dimidama꞉ki, asulo꞉l. Ne anaso꞉le dowakiyo꞉, Ya꞉su Kelisowa꞉ wiya a꞉la꞉ta꞉ga꞉ dibolowa so꞉l. 10 1Kol 4.15, Kolo 4.9Ne dibolo ayamilo꞉ so꞉l wenamio꞉, Onesimuso꞉ Keliso dowabikiyo꞉, e ni so꞉wa o꞉ngo꞉ fa꞉la꞉dowo꞉. A꞉la꞉fo꞉ko꞉lo꞉ giyo꞉ Onesimus e o꞉lia꞉yo꞉ ha꞉fo꞉ disa꞉ma꞉kiyo꞉, gemo꞉ dabu bo꞉do꞉l. 11 Tamin amio꞉ Onesimus* Onesimus a꞉la꞉do꞉ sa꞉lab a꞉ma꞉ ha꞉go꞉ we, asuwa꞉ta꞉sen. eyo꞉ ge mo꞉asuwa꞉ta꞉sen ko꞉sega o꞉go꞉ eyo꞉ na꞉no꞉ o꞉li asuwa꞉fa꞉ib. 12 Ne Onesimus o꞉lia꞉yo꞉ asulo꞉wo꞉ imilig dowaki, e o꞉lia꞉ ha꞉fo꞉ disa꞉lakiyo꞉, niyo꞉ e gelo꞉wa a꞉ma꞉la꞉ iliga꞉to꞉l. 13 Niyo꞉ e mo꞉hamana꞉kiyo꞉ ka꞉la꞉sa꞉ga꞉, ne o꞉lia꞉ dowai kibo꞉bowo꞉, ne Ya꞉suwa꞉ to nafaya a꞉la꞉ta꞉ga꞉lo꞉ dibolowa so꞉l wenamio꞉, gilo꞉ asuwa꞉tan aumbo꞉, eyo꞉ ne o꞉li asuwa꞉ta꞉liki melebabe. 14 Niyo꞉ a꞉la꞉asulo꞉ ko꞉sega, na꞉no꞉ towo꞉ semo꞉saefa꞉ amio꞉, a꞉la꞉bo꞉ mo꞉dimidama꞉no꞉. Mo꞉wo꞉ gilo꞉ ne asuwa꞉fa꞉no꞉wo꞉, niyo꞉ mo꞉dibodama꞉no꞉, go꞉no꞉n asulo꞉wa a꞉la꞉ta꞉ga꞉ dimidama꞉ki asulab. 15 Ge o꞉lia꞉ Onesimus o꞉lia꞉yo꞉ ho꞉len abol no amio꞉lo꞉ aloba꞉da꞉sa꞉ga꞉ ane a꞉no꞉ mo꞉wo꞉ ha꞉? Ga꞉gdo꞉ alobo꞉no꞉ a꞉ma꞉yo꞉, e gelo꞉wa a꞉ma꞉la꞉ ya꞉sa꞉ga꞉yo꞉, ge o꞉lia꞉yo꞉ mela꞉no꞉ mela꞉no꞉ dofo꞉ melea꞉ki go꞉wa꞉le? 16 1Tim 6.2Onesimus e gelo꞉wa a꞉ma꞉la꞉ fa꞉la꞉dowalikiyo꞉, e gi madali nanogdo꞉ dian kalu dowaki, giyo꞉ e madali nanogdo꞉ dian kalule a꞉dowab a꞉la꞉bo꞉ asula꞉so꞉bo. Niyo꞉ Onesimuso꞉ mada asulab ko꞉sega, e gi nanog dialikiyo꞉, Alana꞉ wi amio꞉ e gaoleyo꞉ o꞉ngo꞉ dowaliki, giyo꞉ e mada alan asuluma꞉ib.
17 A꞉la꞉fo꞉ko꞉lo꞉ giyo꞉ ne gi milile a꞉la꞉asulalega, Onesimus e gelo꞉wa fa꞉la꞉dowalikiyo꞉, giyo꞉ ne yab amilo꞉ sagalo꞉ dowa꞉sen o꞉leaumbo꞉, emo꞉wo꞉lo꞉ a꞉la꞉ka sagala꞉bi. 18 Onesimus eyo꞉ gemo꞉wo꞉ halabo꞉ dimido꞉lalikiyo꞉, wa꞉lo꞉ dimia꞉no꞉wo꞉ dowo꞉lalega, gemo꞉wo꞉ wa꞉lo꞉ no꞉no꞉n dugumia꞉no꞉ ko꞉lo꞉ nemo꞉ sa꞉la꞉bi. 19 Ne Fo꞉l, to we no꞉no꞉n dagileya꞉ sa꞉sa꞉lo꞉l, “Wa꞉l a꞉no꞉ niyo꞉ hendele gemo꞉wo꞉ dugumia꞉no꞉” a꞉la꞉li sa꞉sa꞉lo꞉. Ko꞉sega ge to we asuluma. Gilo꞉ mela꞉no꞉ ho꞉gi di a꞉namio꞉, nemo꞉lo꞉ wa꞉l mea꞉no꞉wo꞉ da꞉lab. 20 Na꞉no꞉ Keliso amio꞉ naole dowo꞉ ko꞉lo꞉, giyo꞉ man nafa we nemo꞉wo꞉ dimidama꞉ki asulab. Kelisowa꞉ man nafa gilo꞉ dimidama꞉no꞉ a꞉ma꞉yo꞉, ni asulo꞉wo꞉ sagale alifa꞉ib.
21 Nilo꞉ gemo꞉lo꞉ dabu bo꞉do꞉l we, giyo꞉ hendele dimidakiyo꞉, man nafa nolo꞉lo꞉ a꞉dimidama꞉ib a꞉la꞉asulaki, mo꞉fo꞉s we gemo꞉wo꞉ a꞉na sa꞉sa꞉lo꞉l. 22 Fili 1.25, 2.24A꞉la꞉ta꞉ga꞉ nowo꞉ we. Gilo꞉ Godemo꞉lo꞉ dulugu sa꞉la꞉len aumbo꞉ dimidaliki, ne gelo꞉ amio꞉ ko꞉na꞉ma mia꞉no꞉ a꞉la꞉asulab ko꞉lo꞉ giyo꞉ uwo꞉b nowo꞉ nino꞉ ta꞉fo꞉lubi.
Giyo꞉ ne gelo꞉wa mena꞉ki Godemo꞉ dulugu sa꞉la꞉len ko꞉lo꞉, ne gelo꞉ amio꞉ ko꞉na꞉ma mia꞉no꞉ a꞉la꞉asulo꞉ ko꞉lo꞉, giyo꞉ uwo꞉b nowo꞉ nino꞉ ta꞉fo꞉lubi.
Sagalo꞉ towo꞉ saga꞉fo꞉
23 Kolo 1.7Ya꞉su Kelisowa꞉ wiya a꞉la꞉ta꞉ga꞉lo꞉ dibolo amilo꞉ sab nowo꞉ Ebafelas, e ne o꞉lia꞉ wena siliki, eyo꞉ sagalo꞉ towo꞉ gemo꞉ saga꞉tab. 24 Kolo 4.10-14A꞉la꞉ta꞉ga꞉ negelelo꞉ nanog dian kalu nolo꞉ Mak, Alistakus, Demas o꞉lia꞉ Luk iliyo꞉lo꞉ mada o꞉m a꞉la꞉bo꞉ saga꞉tab.
25 Alan Ya꞉su Kelisowa꞉ ha꞉fo꞉ disa꞉lan man a꞉no꞉ gi mama o꞉lia꞉ dowa꞉biyo꞉.