Ekesedes.
34.
Godta Moses watle ma epo atlaiyo, “Na꞉ta ka꞉yapa aiyalma kokoye ewala dapiyamte dla hatitipo hapilati wa꞉ta hauwokokomuwa epapele ewalaye ma amko mimita꞉pene. Epalati ma na꞉tapo aiyalma hatlo meye monolo hatitimolowepo. 
Epapedeme wa꞉ iyela utulalati ewala dapiyamte e halopame Sainai tamali di dla na꞉ hala dla matelepe. 
Epele dulu dla oplami haletapo wa꞉ mate pomatlowa. Epame opa mate alinepi mateta tamali mateka꞉pi dla populuwa,” diyo. 
Epalati Mosestapo Godta atlale yu e dolumama ewala dapiyamte mimita꞉pame halopo utulalati ikadepe Sainai tamali di dla hetaiyo. 
Epalati Godtapo wuala dulu dla malame Moses mate halemama ya꞉ hi ikadepe semama na꞉ye Godpo diyo. 
Epame ya꞉tapo Mosesye me-hallati tla꞉mtamama epo atlaiyo, “Na꞉ye Godpo. Na꞉ dla polowamale koko mate epo sadle koko mate epo bokotiyapo malamale koko mate hutiyepo. Epapele dulu dla na꞉ na꞉ta yu itiyapo hatitimale hapulomaye pohauwokokomasemde. 
Na꞉ opa hapulomaye bokotiyapo malamama yia꞉ bobtalimaleye hiyotipo welimdepo. Epapele tlope na꞉tapo batalimale walle oplami dla asiyama pohamilalo powekesemde. Epedeme adulo yia꞉ bobtalimale asiyama dla na꞉tapo yia꞉ yimlala dla epo yia꞉ mamadulo dla asiyama wotiyalle hapimdepo,” diyo. 
Mosesta alumata ta꞉la dla akukulumpolomama God dla heodepo epo atlaiyo, 
“Na꞉ God, wa꞉ta ikadepe na꞉ dla siyemhalema dlepiye, di saliyome tamiya. Na꞉malamana, opa iwoloye wa꞉ yu dolumolowe dla pta dupa kokalalimale so. Amasiyama epapele tlope di bobtalimaleye wa꞉tapo hiyostepo welipame ma wa꞉ opa ikadepe dene,” diyo. 
Epalati Godta epo atlaiyo, “Na꞉tapo yu itiyapo himma, Isalael sotapo ikadepe na꞉ta sesalemale so depo ha꞉ha꞉loweye. Epapedeme na꞉tapo yia꞉ mila꞉pi tle ulugiyemale koko patoto ta꞉lamo hema pohalalo wekele kokoye halomolowepo. Yia꞉tapo na꞉ta wa꞉ yilo itiyamale pato mate wa꞉ gademhala kokoye natipame yiyellepe. 
Epapedeme na꞉tapo Amoli so mate epo Keinan so mate epo Hitai so mate epo Pelisi so mate epo Hibai so mate epo Yebusi so mateye na꞉ta wua꞉ watle hamilowe mo tle alikili a꞉ma dodolomsallowepo. Amasiyama na꞉ta epapelepo depame wua꞉tapo na꞉ta atla yu hema dolumha꞉ha꞉iya. 
Eye, wua꞉tapo mo edla ha꞉ha꞉lalo so opa mate namkale demha꞉ha꞉miya. Wua꞉ta yia꞉ mate namkale demha꞉ha꞉lepiye, yia꞉tapo wua꞉ye batalimale koko dla elemtullupe. 
Amasiyama wua꞉tapo yia꞉ta alinepi poyupo yia꞉ god dla ha꞉lalo tile hapulomaye dodokotimaiya. Epame yia꞉ aiyalma ewalaye susupolatipame ma yia꞉ aiyalma daliye hauwokokomaiya. 
Epame wua꞉ hatlo na꞉ dla heodemha꞉ha꞉mama god opi dla mikadepe demha꞉ha꞉miya. Adipalati, na꞉tapo wua꞉ yilo hahamalalo God halapo. 
Epedeme wua꞉ wolomape! Mo edla ha꞉ha꞉lalo so opa mate namkale depo ha꞉ha꞉miya. Adipalati, yia꞉tapo wua꞉ye na꞉ tle eleme ma yia꞉ biskapa god dla sisiyemama yia꞉ dla hapili daya ma dlomlala. 
Epedeme wua꞉tapo wua꞉ akimlala dla edla ha꞉ha꞉lalo mo so wola꞉ halopimiya. Adipalati, yia꞉tapo wua꞉ akimlalaye eleme yia꞉ biskapa god dla sisiyelowe dla tullala. 
Epedeme biskapa godye dlopi dota mimita꞉miya. 
Sokomoko hapuloma dulu dla Abib mama umulati alila 7 dulu dla wua꞉ yimkata alupame daya dele demama palawa daya yist mate podukumalalo wekele dlomha꞉ha꞉iya. Adipalati, Abib mama dulu dla alila oloma iye na꞉tapo wua꞉ye Isip mo tle alikili dla eleme woyamuwapo. 
Wua꞉ akimlala itapu hohomale soye na꞉ watle hohopo iya. Epame wua꞉ aliya halo patetalo itapo usulli mape na꞉ watle hohopo iya. 
Amasiyama wa꞉ donki aliya tlo na꞉ watle hamili hallepiye, wa꞉ e tlo ma ilame hammama asiyama sipi aliya amkota꞉le tlo yumpame na꞉ watle hamilipe. Amasiyama epapele dulu dla wa꞉ sipi aliya yumuluwe allipiye, donki aliya tlo tumuku kestlepe. Epapedeme wua꞉ akimlala itapu hohomale na꞉ watle hohopo iliye ma asiyama mate na꞉ tle ilame hohomelepe. Oplami haleta namkale dle alisisi dimi na꞉ hala dla populuwa. 
Alila 6 dulu dla wua꞉ oko dla ha꞉ha꞉lepe. Amasiyama alila 7ye wua꞉ta hedepo popa꞉lowe alilapo. Epele dulu dla wua꞉ dlowe alisisi emolowe alila mate epo hauwallowe alila mate dla alila ita woyamelepiye, aseka mepapele hedlepe. 
Witi dayata ma-namalati hauwalepame yimkata alupo daya pato de demha꞉ha꞉lepe. Epame Kotiyopa alila dla Kimna꞉ya daya dele demama yimkata alupo daya pato de demha꞉ha꞉lepe. 
Epapedeme sokomoko hatlo dulu dla wua꞉ opa hapulomatapo dapahatlo oloma dla na꞉ mila꞉pi tle hetame alumademha꞉ha꞉lepe. Adipalati, na꞉ye Isalael so wua꞉ Lod Godpo. 
Amasiyama wua꞉ta ta꞉la halowedeme ha꞉ha꞉ mo edla ha꞉ha꞉lalo soye na꞉tapo dodolomsalepame ma ta꞉la eye popolalepo mellowepo. Epalati wua꞉ta mo edla ha꞉ha꞉mama sokomoko hatlo dulu dla alumale dapahatlope i halomha꞉ha꞉lati opa ewolotapo ma ilampuame wua꞉ ta꞉la halowedeme wua꞉ye pokotlomolowa. 
Wua꞉tapo na꞉ watle alinepi poyupo hapimha꞉ha꞉mama wua꞉ yist mate dukumale alisisiye pohapimha꞉ha꞉lowa. Epame wua꞉tapo Namilatale daya dele dla daya pomelleye pohatitimha꞉ha꞉lowa, dlapa dla mistemha꞉ha꞉lepe. 
Na꞉ye wua꞉ Lod Godpo. Epedeme wua꞉ta emale alisisitapo ka꞉yapa milimale alisisiye hauwalepame na꞉ aiyalma aya dla halopo pua demha꞉ha꞉lepe. Epame gaut aliya yemalaye ya꞉ya memeko mate hatlo dukupo ha꞉miya.” 
Epame God matle Moses watle epo atlaiyo, “Yu iye buka dla hatitimane. Adipalati, na꞉tapo wa꞉ dla epo Isalael so dla yu itiyapo himiwa ya꞉ asiyamaye wua꞉tapo na꞉ta imuwa koko hapuloma iye woloma dolumha꞉ha꞉lepe,” diyo. 
Mosestapo tamali di dla 40 alila mate epo utula꞉la mate dulu dla God mate halemama daya mate epo yú mate podlalo halaiyo. Epame Godta ewala dapiyamte dla aiyalma koko 10ye hatitimaiyo. 
Mosestapo Sainai tamali di dla God mate yukamhalepo depame ewala dapiyamte dla aiyalma koko hatitimaleye halopo malaiyo. Amasiyama ya꞉ malemama ya꞉ta God mate yukamhalale koko tle ya꞉ mila꞉pita usiyemale mate halaleye ya꞉skamu pomalanatiyo. 
Oloma edla A꞉lon mate epo Isalael so mate Moses mila꞉pitapo hela꞉demama usiyemale mate hallati natipame wowota꞉mama ya꞉ hala dla kulume potumulaiyo. 
Amasiyama Mosestapo yia꞉ sisilamaiyo. Epalati A꞉lontapo Isalael opa yia꞉ dokopala so eleme Moses hala dla tulati ya꞉tapo yia꞉ mate yukamhalaiyo. 
Epame alotle Isalael so opa hapulomatapo puame ya꞉ hala dla alumalati ya꞉tapo Sainai tamali di dla Godta ya꞉ watle aiyalma koko hamiliye ma yia꞉ watle imhalaiyo. 
Mosestapo yia꞉ mate yukamhalepo gudepame ya꞉ mila꞉piye tluka mate bopudiyo. Adipalati, ya꞉ mila꞉pitapo ala me-sikemte usiyemhalaiyo. 
Epalati Mosestapo kimna꞉ya dla tame God mate yukamolowedeme ya꞉ mila꞉pi bopudlalo tlukaye alikili dla himimdiyo. Epame Godta atlamale kokoye ma Isalael so watle atlamolowedeme halemama ya꞉ mila꞉pi ma bopudemdiyo. Adipalati, yia꞉ta natilati Moses ya꞉ mila꞉pitapo sikemte usiyemale mate halemdiyo.