Loum.
9.
Epedeme na꞉ye Keliso dulu dla halemama ikadepe kokoye wua꞉ watle atlema. Epame na꞉ye isikimi pomala-atlasema. Hela꞉dle Sokotapo na꞉ye dokopala depo hallati na꞉tapo wua꞉ watle atlemama na꞉ opa Isalael so yilo sikemte dupa kolle natima. Adipalati, yia꞉tapo Godta solotamale kokoye podolumasema. Epapedeme na꞉tapo yia꞉ yilo Godta kasilamale dulu dla tloweye mo-dinapopo halapo. 
Epapele dulu dla Isalael so opa iwoloye Godtapo ya꞉ akimlala ikadepe duwapo. Epame ya꞉tapo yia꞉ watle ya꞉ta hela꞉dle nati-iwapo. Epame ya꞉tapo Isalael so mate yu itiyapo himili dulu dla yia꞉ye ya꞉ta sesalemale so depo ha꞉ha꞉lati aiyalma koko ma yia꞉ watle hamiwapo. Epame yia꞉ watle ikadepe api tle ya꞉ hi di dla ta꞉demama ya꞉ watle siyele hamilowe koko ma imuwapo. Epame yia꞉ watle Kelisota alotle puluwe koko ma atlamuwapo. 
Epapele dulu dla yia꞉ mamaduloye A꞉iblaham mate epo Aisek mate epo Yokob matepo. Epedeme Keliso mape opa iwolo yia꞉ asiya dulu tle oplami moto hapame ta꞉lamo hema puwapo. Epapedeme Kelisoye Godpo. Epedeme ka꞉dena, opa hapulomatapo ya꞉ dla kokó siyele ta꞉demha꞉ha꞉loweye. Adipalati, ya꞉tapo alisisi hapuloma yia꞉ God halapo. Eye ikadepepo. 
Epedeme Godtapo Isalael so mate yu itiyapo himiwaye ma-hauwokokomuwa? Hao, pe-epapena. Adipalati, Isalael so dulu dla opa opiye pase Isalael so opa ikadepe. 
Epame A꞉iblaham ya꞉ mamadulo dulu dla opa opiye pase A꞉iblaham ya꞉ mamadulo ikadepe. Adipalati, Godtapo A꞉iblaham watle epo atluwapo, “Wa꞉ mamadulo ikadepeye hatlo wa꞉ maseyemala ikadepe Aisek tle pulupe,” duwapo. 
Epapedeme koko itapo epo nati-ipo, A꞉iblaham ya꞉ mamadulo dulu dla opa opiye pase God ya꞉ akimlala ikadepe. Amasiyama God ya꞉ akimlala ikadepeye yu itiyapo himili maseyemala Aisekta hatitimale sopo. 
Adipalati, Godtapo A꞉iblaham mate yu itiyapo himimama epo atluwapo, “Na꞉tapo sokomoko hale dla ma ilame pulupiye, Selatapo maseyemala hamelepe,” duwapo. 
Epapedeme maseyemala iye di mama Aisekpo. Ya꞉ta ta꞉po a꞉ya Lebeka hauwapo. Epame ya꞉llu Lebeka eta mopapo polopame akimlala dapiyamte hohomuwapo. 
Epapele dulu dla yimlala dapiyamte iye ala pohohomalalo hallati Godtapo Lebeka watle epo atluwapo, “Wa꞉ maseyemala patotapo ya꞉ ei yemala yu dla heodepo salladepo sela꞉lepe,” duwapo. Epedeme Godtapo yia꞉ta dapiyamteta koko halomolowe ala yeitapo ha꞉ha꞉lati yu i tatle ma-atluwapo. Epedeme dita Godta ya꞉ opa sesalemhala koko dla natiye, ya꞉ dita koko halomha꞉ha꞉ dla natipo po-apesema. Amasiyama ya꞉ isikimi meyelo malapame dinapele tle sesalemhalapo. 
Epapedeme God yu bukata epo atlapo, “Na꞉ Yokob tlo sikemte malamama asiyama Iso tlo alimduwa,” depo. 
Epapele dulu dla di adipo atlepa꞉? Godye isikimi seme tiyape tlo gadlalo Godta꞉? Hao, ya꞉ pe-epapesemde. 
Adipalati, Godtapo Moses watle epo atluwapo, “Na꞉ na꞉ta sesalemale so dla polowamale koko mate epo bokotiyapo malamale koko mate nati-imdepo,” duwapo. 
Epedeme Godta hulumale kokoye opata solotamale tle epo yia꞉ta koko halomde koko tle natipo po-apesemde. Amasiyama Godta isikimi meyelo bokotiyapo malamale tle oplamiye hulumhalapo. 
Epapedeme Godtapo Isip so yia꞉ dokopala oplami dla epo atluwapo, “Na꞉tapo wa꞉ watle dokopala hi hamiwapo, isikimi wa꞉ tle na꞉ta itiyamaleye opa hapuloma dla botomastlowedeme. Epame na꞉ hi mape opa hapulomata dlalemtlepo depo botomastlowedeme,” duwapo. 
Epapele dulu dla di natipo, Godye ya꞉ta sesalemale so dla polowamale koko mate epo bokotiyapo malamale koko mate himhalemdepo. Amasiyama ma opa opi dla mikadepe dlowe dla dupa kokalalimolowe kokoye hapimhalapo. 
Epedeme oplami haletapo na꞉ watle ipo atlanatilowe sepena, “Godtapo meyelo opa opi dla mikadepe dlowe dla dupa kokalalimolowe koko hapimhalema dlepiye, ya꞉ ma adipammama opa ewoloye batalimale so depa꞉?” 
Amasiyama namkale, wa꞉ta ipapele atlanatili God dla atloweye poka꞉dena. Ame adipalati, wa꞉ye isikimi ta꞉la oplamipo. Epedeme nasama yu ipo. Dulitapo yo duli tilalo a꞉ya watle atlemama, “Wa꞉ adipalati na꞉ye ipo tima꞉?” dlowe poka꞉dena. 
Adipalati, duli tilalo a꞉ya yo dla itiyamale elapo, ya꞉tapo duli hale tlo isikimi alila hapuloma dulu dla asiyamta demsela꞉lowe timama asiyama duli hale tlo isikimi koko dla tamama asiyamta demsela꞉lowe tiloweye. 
Epapele dulu dla God ma epamhalapo. Ya꞉ dla itiyamale elapo, ya꞉ta siyaladle mate itiyamale mate opa dla nati-iliweye. Epapele tlope ya꞉tapo ya꞉ta alilalo sota mo-polowe api dla tamha꞉ha꞉lati natipame hapele yia꞉ batalimale asiyama pohamilalo, sadle mate yia꞉ye me-omhalapo. 
Epame ya꞉ dla itiyamale me-elapo, ya꞉tapo ya꞉ta bokotiyapo malamalalo so dla ya꞉ta hela꞉dle koko nati-iliweye. Ame adipalati, opa ewoloye ya꞉ meyelo ma-sesalemuwapo, ya꞉ta hela꞉dle dla ulatumellepo depame. 
Epapedeme Godtapo opaye ya꞉ta hela꞉dle dla ulatumellepo depame sesalemama hatlo Yu so siyapo tlo posesalemana. Amasiyama ya꞉ po-Yu so opa mape sesalemuwapo. Epedeme ya꞉ta sesalemale so opa ewoloye dia꞉po. 
Godtapo po-Yu so koko dla Hoseya buka dla epo atluwapo, “Na꞉tapo ka꞉yapa pona꞉ opa dlalo haluwa opa ewoloye watapo ma na꞉ta na꞉ opa dlowepo. Epame opa anawoloye na꞉ta pobokotiyapo malamalalo haluwa opa ewoloye ma watapo na꞉ta bokotiyapo malamolowepo,” duwapo. 
Ka꞉yapa Godtapo yia꞉ watle atlemama, “Wua꞉ye pona꞉ opa ikadepe,” duwapo. Amasiyama ma ya꞉tapo yia꞉ watle atlemama, “Wua꞉ye pasakalo hallalo God ya꞉ akimlala dlepe.” 
Epame Aisayatapo Isalael so koko dla ma epo atluwapo, “Isalael sota sikemte pasatamama asila some hallepe. Amasiyama dulu edla isikimi opihatatapo pasakalo gadle halepe. 
Ame adipalati, Lodtapo ta꞉lamo hema ya꞉ta hali depo atlale kokoye woloma ma-halepe, ya꞉ powelilowa.” 
Epame Aisayatapo mamisika꞉ Isalael so koko dla epo atluwapo, “Itiyamale Lodtapo dia꞉ dulu dla opi pogadlalo wekematiye, dia꞉ye Sodom mo mate epo Gomola mo mate dlapata hamdemama opa hapuloma poyuli epapelemla.” 
Epapedeme na꞉ta atlamale yu ya꞉ dulu kokoye ipo elema. Po-Yu so opatapo yia꞉ta God mila꞉pi tle ullu pa꞉po ha꞉ha꞉lowe kokoye pototamana. Amasiyama miyelo yia꞉ta mikadepe dle koko tle Godtapo yia꞉ye ya꞉ mila꞉pi tle ullu pa꞉talo so duwapo. 
Amasiyama Isalael sotapo God mila꞉pi tle ullu pa꞉talo so depo ha꞉ha꞉lowe kokoye totamama yia꞉ aiyalma koko tlo sikemte dolumha꞉ha꞉uwapo. Amasiyama koko etapo yia꞉ye po-ullu pa꞉talo so dena. 
Adipalati, yia꞉tapo mikadepe dle pa꞉le, isikimi miyelo itiyamale tle God mila꞉pi tle ullu pa꞉talo so dlowedeme apuwapo. Epele koko tle yia꞉tapo opata kustamtame teteyulalo ewala dla kustamtame teteyumha꞉ha꞉uwapo. 
Adipalati, God yu bukata ipo atlapo, “Na꞉tapo Sayon mo dla ewalaye pamellowepo. Ewala edla opatapo kustamtame teteyumha꞉ha꞉lepe. Amasiyama oplami antapo ya꞉ dla mikadepe dlepiye, ya꞉ wota꞉le ponatimhallowa.”