36
Iawe God apanawa sanaamopia umanawa wade
16 Iawe God ne mainawo wane wanase, 17 “E apanaida, Israel apanawa muba tawou osowe waimoie dewau ita eueuwau kadiwa daitada dewamoia mampe bolau miramirasane kadiidasaiena. Ne emanawo kadi sa ipa i uaboa wadepio miramiralepia rua. 18 Mo apana epaboiamoiena ita do god lagawau wadaposimoiena mampe tawo ema kadisaiena, sa baiwa ne nuasigasigana debama mo osouwo memepaaubepa. 19 Ne mo matangelamona ipawa mo kadiwa daitada dewasaiena baiwa. Ita do dewamono antone tawo daitada apanawa do waimoie. 20 Mo sape waimoie laia asiasi apana ne ebona kakaiwa wakadisasaie waiase,
‘Ema ipa Iawe God apanawaida, me ipa oauara sa baiwa mo emono bolauida ene bola daitada bedeuwointa waimoie lai. Mo epe waia mampe ne ebona kakaiwa wakadisasaie mala osowe ituiena.’
21 Ne menanedia apana ne ebona kakaiwa wiwirawantoipe waimoipona, tane Israel apanawa sa antone bola daitadauwo waimoia mala osonawo itui.
22 Sa baiwa Israel apanawa ema epe diamoa,
‘Warere Iawe God ema epe wade: E mai dewala da euda baiwa ne leulepo bolalawo wilena, dia. Tane ne neba ebona kakaiwa wiwirawa asiasi epe dewasapa, ebo ipa sa e tawo daitada bedeuwo wainile mala osowe itulana 23 Ne apana mampo sabamosapa ne ebona ipa mukamukaua kakaiwa, ebo ipa sa e tawo daitada apanawa emauwo mala osowe itulana. E Israel apanawa bedelawoe ne tawo daitada apanawa mampo sabamonteapo ateineapu ne ipa kakaiwa. Ne epe dewasapo uwa daitada apanawa atentopu ne ipa Iawe God. Ne Warere Iawe God ema epe wadina. 24 Ne e tawo daitada bedeuwo wainilana otalepe leulepo bolalawo wilena.
25 Ita ne e euitana baiwa esa eudida mampe nuala mitapa, e god lagawau wawoitile ita kadiwa daitada dewasale miramiraitena bedewe euitana. 26 Ne e nua sanaa enalepa ita do aleu sanaa bedelawo itupa. Ne e nuala badowa seu rua aia etadabuala winedia wadapaubepa ita nuala bibia tekateka bedelawo itupo ne aiana etonune ruawaitonuna. 27 Ne aleuna e bedelawo itupo ita ne waeuwana wiwirawaitonuna ita anaanana deaitopa ruawaitonuna.’ ”