1 Kin.
5.
Mapo warere Dawid inawaa wandia walamawe me nuawadawada sowaida ipa warere Iram, me bola debama Taire apanawa oniamodie. Tane warere Iram, Dawid otopa Solomon Israel apanawa warereu sanaa enena umanawa etene nolawa apanawa waaubamono anton me auwasapua baiwa. 
Ita warere Solomon gagalo wanaubeno leulene warere Iram mampe alen me wanase, 
“E ateiten ambi ne mamana Dawid uwa daitada uaraia enane panane do onantoie. Sa baiwa me mai rua ita wadaposi duwa wadapona Iawe God wadaposisampa baiwa. Me Iawe God oniedie emalawoa apana bauta aimopie nanamopio tauma me God wadaposisampa duwa wadepi. 
Tane tauma Iawe ne Godna wanwan euda obasa nen bola uduudu bedewe ita ne onana eneia apanawa dia do empuempu dia. 
Sa baiwa ne tauma insedina wadapos duwa wadapa Iawe Godna wadaposisapina baiwa. Ne mamana Dawid diena rua, me wanase, ‘Ne ando e otoa dewasapo e aupaa wadepie warerelepi. Ita me ne ebona wadaposisampa duwa wadepi.’ 
Sa baiwa e nolaa wadeia apanawa waubamowo Lebanon tawowa bedewe antopue ia badowa eboa sida waia tomopu ne baina ita nolana wadeia apanawa do awodea nolantopu. No atenten e apanaa bola debama Saidon bedewe waimoia ia totowa atendewanton, mai no Israelwa ruamba. Sa baiwa e ne dianea mane ambi rua e nolaa apana wanamopa ita rua ne malesamopa.”