Kabikona.
35.
Tovanama Yakobo i fakwafakwa Fadana-anami atu i makaviniya Beteni nenei, Guyau i kenokikinomana-savaviniya keta i sawanuwagabubuwiya. 
I bwaduwa, “Ka wava Yakobo atu muka yota sina weneu Yakobo. Kimoki keta i niniya ka wava Isineni.” Eketa i weniya Isineni. 
Yota i bwaduwa, “Iyau Guyau Tofiwanaonaona. Kuna vinatunasiwasiwaḡa keta kuna yagwana. Susukwau ina nakatamoka. Fasekwa dawanisi yota tufomu sina kikinomana kwaḡa neneweu. 
Fwayafwayanama a bwadudabedabiya Ebenaamu be Aisake nenesiyai, kwaḡa ana veniwa. Yota susukwau nenesiyai nofe fwayafwayanama ana venisiya.” 
Guyau tovanama Yakobo nenei i nusifufukooḡa, i teweiya. 
Kabainama nenei Guyau i nusifufuwiya, gabana i vimisiniiya keta etanei waini i siwaiya yana bwanaose yota muniyai bubu i siwaiya. 
Eketa Guyau nokomai i nusifufuwiya fasinei, kabainama i weniya Beteni. 
Muniyai Yakobo yana sabu nukusi Beteni si teweiya. Keta yawane Efanati kedawanau, Neiseno i vibutusiya atu si nisaiya daunina. 
Si vibaiiya eatu kuvavana i gimunusiya nenei, kasi toosiwaḡa si sawakatevatusiya si bwaduwa, “Muka kwana matuta. Natumi namoḡa kana vinuwa i tufuwa.” 
Tovanama ayona yawasisi i kakakaviya nenei, si weniya Benoni eatu amana i weniya Beniyamina. 
Tovanama Neiseno si vidawana, ketanama i niniya Efanati (nofe tova o Beteniyema), kafakainei si odewadewisiya. 
Eketa Yakobo gabana i vimisiniiya kasi manawa etanei. Gabaninama Neiseno kasi manawa nenei nofe tova i fakwafakwa. Yakobo natunatuna namoḡa kasi 12. 
Neya natunatusi namoḡa o Nubeni, Yakobo natuna kotokikinuna. Muninei o Simiyoni, Nebi, Yuda, Isaka, Sebunoni. 
Neiseno natunatusi namoḡa o Yosefa keta Beniyamina. 
Neiseno kasi kaetoḡa Binaa natunatusi namoḡa o Dani keta Nafatanai. 
Neya kasi kaetoḡa Dinufa natunatusi namoḡa o Gada keta Asa. Yakobo kakawana nofemaise natunatuna namoḡa si vinatunisiya Fadana-anami nenei. 
Eketa Yakobo i makaviniya amana Aisake nenei, Kiniyati-aba (nofe tova o Ebinoni) niniunei menana Mamene nenei. Nofe menaninama Ebenaamu i fakwiiya muninei yota Aisake i fakwiiya maise teneyauyauna. 
Aisake i fakwa kana manamana 180. 
I sobuwa i vigwadimonamonamoka yo muniyai yawasina i kakaviya keta waḡawaḡana i tuyanomwanisiya. Eketa natunatuna namoḡa Isowa be Yakobo si odewadewiya.