1 YisasiꞋa tuelufuꞋa (12) anagaꞋamofe ke higeꞋya ageno mukiꞋa Kefo AvamuꞋyagama veaꞋmogami amakusafiti amanatitalesaya tokiyaene kalima aliꞋya kanale humatesaya tokiyaene amamine. 2 Amamiteno Anumaya KotiꞋma kava yagaisia yafe hamapaigahe kalima hamaemainea yana aliꞋya kanale humatesayafe humatene. 3 HuneꞋamateno mage huno hamapaiye “Kama visayafena ayopatamiene kutamiene mayatamiene monetamiene alitama oꞋviho. Tole kena oꞋaliho. Alu nopi alu nopi faelitetama ohiho. 4 Nago nopima hai falenutamahena ani nopi faetama maitama amataletama alu kumatela viho. Faelitetama ohiho. 5 NagoꞋa kumate veaꞋmoꞋya falu falama huotamatesagetamahena ani kumala neꞋataletama ‘Havi kava hae.’ hutama tamaiyafima hanesia kugukege yana aifopo huneꞋataletama viho.” huno hamapaimaine. 6 HamapaitegeꞋya alu kumate kumate neꞋuꞋya mukiꞋa kumatela Anumaya Kotina kanale keꞋa hamanepaiꞋya kaliꞋamia aliꞋya kanale huneꞋamateꞋya humainae.

7-8 Ani kanafina HelotiꞋa sauve kanogino YisasiꞋa mukiꞋama humainea kavaꞋmo avagema haviana nagoꞋa veaꞋmoꞋya ani yana ageteꞋya “YoniꞋa falimainefiti ago hetimaine.” huꞋya hageꞋya nagoꞋa veaꞋmoꞋya “IlaiyaꞋa eteno falote humaine.” huꞋya hageꞋya nagoꞋa veaꞋmoꞋya “Nayoma Anumaya Kotina aune kanoꞋa falimainefiti hetimaine.” huꞋya haya yafe HelotiꞋa ani kea haviteno agu agesamoꞋa anilega vigeno “Hana veaꞋmogami kemo tamagea nehafi?” huno humaine. 9 Huteno HelotiꞋa mage hie “Nagaya aliꞋya vayaꞋniꞋa humatogeꞋya Yonina ageꞋya ago fakalitalageno falimaine. NaꞋa maꞋa kava nehie huꞋya avagema humainaya kanoa taꞋe?” huno nehuno Yisasima agesia kafena ati ayemaine.

10 Aposolo anagala eteꞋya “NaꞋa maꞋa kava huteta neꞋone.” huꞋya Yisasina me hapaigeno YisasiꞋa haviteno ani anagaꞋa amavaleno Petesaita kumatega ugahe katega umainae. 11 NeꞋvageꞋya mukiꞋa veaꞋmoꞋya haviteꞋya akave agaitega ageno YisasiꞋa falu fala humateteno Anumaya KotiꞋma kava yagaisia yafe hamapaiteno kalima neꞋaliya veala alino kanale humatene.

12 Une kigeꞋya tuelufuꞋa (12) anagaꞋamoꞋya Yisasite mage me hae “Tagaya vaya omai kaiyaga mainonafe mukiꞋa veaꞋmogamina humatesanageꞋya hanesia kumateꞋene noma hanesilegaene ute ete huꞋya faesaya nofeꞋene nesaya yafeꞋene atiyesae.” huꞋya humainae. 13 Hageno YisasiꞋa mage huno hamapaiye “Tamakaitami kavela amamiho.” huno hamapaigeꞋya mage hae “Utama mukiꞋa mainaya veaꞋmogami kavela miya hiho huka nehano? Tagaipina osi kave kanoꞋa hane faefuꞋa (5) mayaene tole noyame kanoꞋagi huno hane.” huꞋya hae.

14 Anifima mainaya vayala faefu tauseniꞋa (5,000) vayaꞋyaga mainayanagi YisasiꞋa agaiꞋenema tokaeꞋya nemaiya anagaꞋamogamife mage huno hamapaiye “HamapaigeꞋya fifitiꞋa (50) veaꞋne ‘Alitalu hutama maite maite hutama mopale maiho.’ hutama hamapaiho.” huno humaine. 15 HamapaigeꞋya aniꞋa hute hute huꞋya mopale mainae. 16 YisasiꞋa faefuꞋa (5) maya neꞋalino tole noyamene neꞋalino huteno ikapinaga agesaga huno Anumaya Kotitega huno muse huteno ani mayaene noyamene koliteno agaiꞋenema tokaeꞋya nemaiya anagaꞋa amamigeꞋya mukiꞋa veala amamite amamite humainae. 17 Amamite amamite hageꞋya mukiꞋa nageno amamu higeꞋya atalaya atupatapaꞋa aliꞋya tuelufuꞋa (12) kula aihavatemainae.

18 Nago yupa YisasiꞋa agaiꞋage Anumaya Kotitega havinegegeꞋya agaiꞋenema tokaeꞋya nemaiya anagaꞋamoꞋya avate mainageno mage huno hamavige “VeaꞋmoꞋya nagaifena taꞋe huꞋya nehae?” huno hamavige. 19 HamavigegeꞋya kenonaꞋa mage huꞋya hae “NagoꞋa veaꞋmoꞋya kagaifena ‘Ti faleneꞋamatea Yoni maine.’ huꞋya hageꞋya nagoꞋa veaꞋmoꞋya kagaifena ‘Ilaiya maine.’ huꞋya hageꞋya nagoꞋa veaꞋmoꞋya ‘Anumaya Koti aune kanoa nayo ago falimainea kano falimainefiti eteno hetimaine.’ huꞋya nehae.” huꞋya hapaimainae. 20 Hapaigeno YisasiꞋa amakaifena mage huno hamavige “Tamakaya nagaifena taꞋe hutama nehae?” huno hamavigegeno PitaꞋa mage huno hie “Kagaya Kalaisigae Anumaya KotiꞋa taugafa aligatigahe hugatenea kano mainane.” huno hie. 21 Higeno YisasiꞋa tokiyaꞋage ke huno “Mani kea nagoꞋa veala hamaopaiho.” huno humaine.

22 YisasiꞋa mage huno hamapaiye “Soka vayaꞋene mono note kava vayaꞋene kahegi kema havilinaya anagaꞋene nagaila ikapinagati emainoa kanoa vayaꞋmo natenea kanomonihena ‘KahaoteꞋyakae.’ huꞋya hunatesageno tusiꞋa nagata aisigeꞋya nahaesageꞋna faligahue. FalisugeꞋya komufi hevainatesageꞋna tole yupa maiꞋna tagufa kanale falimainesufiti hetigahue.” huno humaine.

23 Alitalu humaiya veaꞋnene agaiꞋaene tokaeꞋya nemaiya anagaꞋenefe mage huno hie “NagoꞋa veaꞋmoꞋya nagai nakaveꞋma visaya amakesa havinuꞋyahena amaugafama aliꞋya hai yana amakaveꞋno huteteꞋya nakaiꞋma nagata aisigeꞋna falisua kava hisaya amakesa haviteꞋya yafaga yosa kanaꞋaene kanaꞋaene kofiꞋya nakave aliꞋya visae. 24 Nagola veaꞋmoꞋya maiyaꞋamima atafa huꞋya ali talakoma hulisayana maiyaꞋamimoꞋa falino afaya hapaegahigi nagoꞋa veaꞋmoꞋyama nagaifema hamainageꞋya maiyaꞋamima atalesaya veaꞋmoꞋya maiyaꞋamia aligatisugeꞋya agola aliꞋya maigahie.

25 Nagola veaꞋmoꞋya mukiꞋa ma mopale mone fenoꞋyaga aliteꞋya maineꞋya falisagenoꞋa agola maige maige hisaya haimula ago atalenayanagiꞋya alimainaya mone fenoꞋamimoꞋa hanaꞋa huno amaya hugahie? AꞋao amaya ohugahie. 26 NagoꞋa veaꞋmoꞋya keꞋniꞋaene nagaiꞋenefema amakaye huꞋya ‘AoteꞋyamaꞋae.’ huꞋya hunatesayana nagaya ikapinagati emainoa kanoa vayaꞋmo natenea kanomoꞋna esua kanafina tokiya hale yaniꞋaene Nenafana tokiya hale yamaꞋaene alu aotage ensole anagaꞋamoꞋyaenema eteꞋna esuana aniꞋa huꞋna ani veaꞋnehena nagaye huꞋna ‘TamahaoteꞋyatamie.’ humategahue. 27 Tamagelafa huꞋna tamahanepauve nagoꞋa veala maleꞋma hetimainaya veaꞋmoꞋya aupaꞋa ofaligahayanagiꞋya hagoteꞋya Anumaya KotiꞋma kava yagaisia kanaꞋamoꞋma efalote hisia yana agegahae.” huno humaine.

28 YisasiꞋa mani kea huteno seveniꞋa (7) kana maiteno Pitana Yonina Yemesigamina amavaleno Anumayamotega ke huno havigegahe agoꞋyafi haimainae. 29 Haimainageno YisasiꞋa Anumayamotega ke huno havinegegeno augosamoꞋa alino alu augosa kaligeno kenaꞋamoꞋa efeꞋage huno alave alave humaine. 30-31 Tole kanolatana nayo falimainaꞋa kanolatana MoseseꞋene IlaiyaꞋene tokiya hale yaꞋene maineꞋana Anumaya KotiꞋa Yisasifema “NaꞋa maꞋa huka Yelusalemu faligane.” huno hutenea kehe YisasiꞋene kea kea humainaꞋe.

32 Ani kaiyekea nehageꞋya PitaꞋene anagaꞋamoꞋyaene amaukalokalo higeꞋya faemainafiti aupaꞋa hetiꞋya agayana YisasiꞋa tokiya hale yamaꞋaene avate tokaeꞋana hetimaiꞋa kanolataꞋene amakemainae. 33 NeꞋamakageꞋana ani lole kanolatana Yisasina ataleꞋana ugahe nehaꞋageno PitaꞋa Yisasife mage hie “Anumayamoga tagaya male maunana kanale ya hie. Katega nona taliꞋa (3) kilamatesune. Kagaila nagolagi Mosesena nagolagi Ilaiyana nagolagi huno hanesie.” huno hianagi agesa havilama ohuno ani kea hapaiye. 34 Hanepaigeno nago siaꞋmoꞋa evaꞋyi huno alino aiso humategeꞋana Mosesegani Ilaiyagania ani siapi falaꞋageꞋya PitaꞋene anagaꞋamoꞋyaene tusiꞋa koli humainae. 35 Koli nehageno siapinagati ala kefiti age aino mage huno hie “Mani kanoa nagaiꞋni nafaꞋne ago hapaliꞋna hutenoa nafaꞋnegi agai kea haviho.” huno hamapaimaine. 36 HamapaigeꞋya ani kea haviteꞋya agayana YisasiꞋa agaiꞋage mainegeꞋya ageteꞋya ke ohuꞋya mainayanagiꞋya ani kanafina nagoꞋa veala hamaꞋopainae.

37 FaeteꞋya kotigeꞋya YisasiꞋene PitaꞋene YoniꞋene YemesiꞋene ani agoꞋya neꞋataleꞋya elavigeꞋya kasagoꞋya veaꞋmoꞋya Yisasi agegahe emainae. 38 Aya veaꞋnefiti nago kanomoꞋa hetino ala kefiti mage huno hie “Humavenelina kanomoga tusiya huꞋna kahavinegoe. Aiya nagoke ne nafaꞋneꞋniꞋagi mego. 39 KanaꞋaene kanaꞋaene Kefo AvamuꞋmoꞋa agusafinaga haimainegeno nafaꞋneꞋnimoꞋa ala kegefafiti ke nehigeno Kefo AvamuꞋmoꞋa aige hafalege huneꞋategeno avayafitila efeꞋage agalemoꞋa selu selu nehigeno augafa alino haviya nehuno aupaꞋa ataleno oꞋvisia kava nehie. 40 NaꞋa higeꞋna kagaiꞋene tokaeꞋya nemaiya anagakaꞋmogamife ani Kefo Avamula nafaꞋneꞋnimo agusafinagati anatitalesae huꞋna hamavige hamavige hugetoana amuha ohunaya yafe anati oꞋatalenae.” huno hie.

41 Higeno YisasiꞋa mage huno hamapaiye “Vae tamakaya meni kanafima mainaya veaꞋmogatama nagaife havitama tamakupi maletama tametiti ohutama fatago hutama nomaiye. AniꞋa haya yafe kasalo nenahaegi naꞋmagi yupa tamakaiꞋenena mainesugetama nagaife tamakupi malegahae?” nehuno ani nafaꞋnemo nefafe “NafaꞋnekaꞋa avaleka eno.” huno hie. 42 Higeno ani nafaꞋnea yaufa avaleno neꞋegeno Kefo AvamuꞋmoꞋa alino mopafi ailakatitalegeno faemaineno kasegase nehigeno YisasiꞋa ageteno Kefo AvamuꞋmofe kemakino “Ataleka hatilavio.” huno hutegeno hatilavigeno ani nafaꞋnea alino kanale huteteno nefana amine. 43-44 AmigeꞋya mukiꞋa anile mainaya veaꞋmoꞋya ageteꞋya Anumaya Kotina tokiya yamaꞋahe tusiꞋa atalitalu huꞋya amamaꞋyo aiyanagi YisasiꞋa agaiꞋenema tokaeꞋya nemaiya anagaꞋamogamife mage huno hie “Menima hisua kea tamakesa havilama hutama haviho. Osi kanaꞋa maitesugeno nago kanomoꞋa nagesi hinageꞋya ikapinagati emainoa kanoa vayaꞋmo natenea kanomonia kame vayaꞋmogami amayapi navaleꞋya nategahae.” huno hie. 45 HigeꞋya ani kemona aepaꞋamoꞋa ago falakimaineafe havilama ohunagi koli huꞋya ani kemo aepaꞋahena haviokenae.

46 YisasiꞋene tokaeꞋya nemaiya anagaꞋmoꞋya “Tagaipima uhakotemainea kanotia ta maine?” huꞋya huteꞋya ani yateti ke vaimainae. 47 YisasiꞋa amakaipima hanea amaku amakesa ago haviteno nagola osi nafaꞋnea avaleno avate hetitene. 48 Ateteno mage huno hamapaiye “NagoꞋa veaꞋmoꞋya nagaifema huꞋya ma osi nafaꞋne avaleꞋya falu fala hutesayana nagaiꞋene navaleꞋya falu fala hunatae. NagaiꞋma navaleꞋya falu fala hunatesayana hunatenea kanoene avalemainae. Tamakaipina ‘OsiꞋa afa kano kana huꞋna mainoe.’ huno hisia kanomoꞋa tamakaila tamakaseno kava kano maine.” huno hamapaiye

49 YoniꞋa mage huno hie “Kava kanomoga tagaya agonana nago kanomoꞋa kagai kagi neꞋayeno Kefo Avamula veaꞋmogami amakusafinagati amanatigeta ageteta kagaiꞋenema kakave nohia yafe ‘AniꞋa ohuo.’ huta nagalu huneꞋatone.” huno hie. 50 Higeno YisasiꞋa agaife mage huno hie “Ani kanoa alitama nagalu hu oꞋateho. Vaya nagoꞋmo kamema hu otamatesiana nelamafuꞋya mainae.” huno hapaiye.

51 YisasiꞋa ikapinaga haisia kanamoꞋa aupa higeno Yelusalemu visia agesa havino tokiya vaiteno katega umaine. 52 NagoꞋa anagaꞋa talo tala hisaya yafe hagoteno humategeꞋya nago Samelia kumate uꞋya vayafe mage huꞋya hae “YisasiꞋa egahigi mukiꞋa yana talo tala hiho.” huꞋya mo hamapaimainae. 53 Samelia kumate veaꞋmoꞋya YisasiꞋa Yelusalemu ugahe hia yafe amakesa haviteꞋya mage huꞋya hae “Tagaya avaleta ali falu fala hu oꞋategahune.” huꞋya hae*. 54 AgaiꞋenema toꞋkaeꞋana nemaiꞋa kanolatana Yemesigani Yonigani ani kavaꞋma haya kavala ageteꞋana mage haꞋe “Vae Anumayamoga kahaisiana taꞋagaya ikapinagati atahe ke hisuꞋageno ata maleno ani veala asagalisie?” huꞋana haꞋe. 55 HaꞋageno YisasiꞋa maiyahae huno keꞋanamakiteno “AꞋao aniꞋa ohiꞋo.” huno humaine. 56 Huteno anileti neꞋataleꞋya alu kumatega umainae.

57 Katega neꞋuꞋya nago kanomoꞋa Yisasifena mage huno humaine “MukiꞋa kumate visanana nagaya kakave ugahue.” huno hie. 58 Higeno YisasiꞋa kenonaꞋa mage huno hapaiye “Kepu yagamoꞋya faesaya komuꞋamia mopafinaga hanegi namamogamina noꞋamia haneanagi ikapinagati emainoa kanoa vayaꞋmo natenea kanomoꞋna faesua noniꞋa omale.” huno hie.

59 Nago kanohe mage huno hapaiye “Nakave eno.” huno higeno mage huno humaine “Alanimogae nenafana falisigeꞋna aliꞋna hevaiteteꞋna kakavela ugahue.” huno hie. 60 Higeno YisasiꞋa mage huno kenonaꞋa hapaiye “Atalo nagai kea ohavinesaya veala amaku amamemaꞋamo falimainaya veaꞋmoꞋya falia kanomona aliꞋya hevaitegahae amakaiꞋami yanagi kagaya neꞋataleka veaꞋmogamite Anumaya Koti kava yagaimatesia kaiyekea mukiꞋa veaꞋmogamina hamapaiyo.” huno hie.

61 Nago kanomoꞋa hetino mage huno hapaiye “Alanimogae kagai kakave malegahe huanagi natalegeꞋna nenafa nopi mainaya veala nayana amamite amamite huteꞋna kakavela vano.” huno hie. 62 Higeno YisasiꞋa kenonaꞋa mage huno hapaiye “NagoꞋa veamoꞋya avina yama kaligahena amakavelega maiyahae huꞋya moge mege hinuꞋyahena Anumaya KotiꞋa aniꞋa hisaya veafena ‘Nagai aliꞋya alitama veamogamite kava yakaisua kea hamapaiho.’ huno ohugahie.”