1 Anumaya KotiꞋa kava yagai-mainea yamoꞋa maꞋa hu-maine. Nofi alagamo hoyamona nefaꞋa kege aluganale ani hoyafi aliꞋya alisaya vayafe ke hugahe umaine. 2 Uno mage hie “Nagoke yupa kanoꞋa aliꞋyama alisageꞋnahena nagoke vani (1) kina tamamite tamamite hugahue.” huno higeꞋya nagoke amaipa hageno hoyafi hu-ma-tegeꞋya umainae. 3 Umainageno yagemoꞋa naeni (9) kilokile haigeno vaya atagu-nefaya kumapi viana nagoꞋa vayala afaꞋa hetiꞋya mainageno momake-maine. 4 Momaketeno mage hie “TamakaiꞋenena nofi alagamo hoyaꞋnifi aliꞋya molisageꞋna miyana fatago huꞋna tamamigahue.” huno higeꞋya umainae. 5 Umainageno yagemoꞋa amuꞋnokaꞋno higeno aniꞋa hu-maine. YagemoꞋa alitulu huno lavigeno aniꞋa huno nagoꞋa vayafe “AliꞋya moliho.” huno hie. 6 Higeno unena aupaꞋa velo hugahe higeno nagoꞋa vayala afaꞋa heti-mainageno momaketeno mage huno hie “NaꞋa higetama ayaꞋaya kanagefa heti-taletama afaꞋa mainae?” huno hamavi-ge. 7 Hamavi-gegeꞋya mage hae “Nago kanomoꞋa aliꞋyana otamigeta afaꞋa mainone.” huꞋya hageno “Kanalelagi tamakaya nagai hoyafi aliꞋyana moliho.” huno hama-paiye.

8 Hama-paigeꞋya mo-neꞋaligeno une velo hilega nofi alagamo hoyamona nefaꞋa agaiꞋa aliꞋya kava kanohe mage huno hapaiye “AliꞋya vayafe ke hugeꞋya egeka miyana amamio. Haenagama amavaloa vayaꞋmogami miyana amamiteka hagoteꞋnama amavale-mainoa vayala haenaga amamio.” huno hie. 9 HigeꞋya une avavema amavalea vayaꞋmoꞋya ageno nagoke vani kina amamite amamite hu-maine. 10 Amamite amamite higeꞋya hagotenoꞋma amavalegeꞋya aliꞋyama meli-mainaya vayaꞋmoꞋya mage huꞋya amakesa haviye “Ala miya aligahune.” huꞋya haviyanagi nagoke vani kinageꞋya ali-mainae. 11-12 AliteꞋya hoyamona nefafena tusiya huꞋya kea-makiꞋya mage hae “Haenagama amavale-mainana vayala yagemoꞋa osi kana kanoꞋa nagoke kana nehigeꞋya aliꞋyana meli-mainagi tagaya afaꞋa hetita omainonagi tusiꞋa amukonako hia aliꞋya ali-mainonanagi nagoke avamete havi miya nelamine.” huꞋya hae. 13 Hageno ani hoyamona nefaꞋa amuꞋnoꞋamifi mainea kanohe mage huno hie “Nenafuga havio nagaya havi kavala hu-notama-toe. Natema tamaha-vi-gogetama ‘E, nagoke vani kina aligahune.’ hutama hagetila naꞋa higetama mani kea nehae? 14 AliꞋyama alitama aliya monea alitama notamilega viho. Nagaya nahaiya avamete huꞋna haenagama amavaloa vayaꞋene nago avamete miyana nelamamue. NagaiꞋni yanagi haile. 15 Ani monea nagaiꞋniꞋa mone. ‘Nagayama hugahue.’ huꞋna hisua yafena ‘Ohuo.’ hutama nehao? Nagaya vayaꞋma kauva yafe tamaipa haviya nehao?” huno hu-maine. 16 YisasiꞋa mage hie “Nagaya aniꞋa hugahue. Haenagalafa mainesaya veala hagoteꞋya maigahae. HagoteꞋya mainesaya veala haenagalafa taviꞋya maigahae.” huno hu-maine.

17-18 Yelusalemu haigahe katega neꞋuno YisasiꞋa tuelufuꞋa (12) anagaꞋamogamina amahaote amavaleno moma-teteno mage huno hie “Haviho tagaya Yelusalemu haisunageꞋya ikapinagati emainoa kanoa vayaꞋmo natenea kanomonia nagaila nagesi hinageꞋya mono note kava vayaꞋmoꞋyaene kahegi kema havilinaya anagaꞋene kame vayaꞋmogami amayapi navaleꞋya na-teteꞋya ‘Haegeno falino.’ huꞋya hugahae. 19 Yuta vea omainaya vayate navaleꞋya momamisageꞋya nagaye hisifa kea hu-nateꞋya hu-haviya hu-na-teteꞋya hegi kaꞋyoteti nahaeteꞋya yafaga yosale nili nahaeꞋya asaisageꞋna faligahue. FalisugeꞋya he-vai-natesageꞋna tole yupa komufi maiteꞋna tagufa (3) kanale fali-mainesufitila Anumaya KotiꞋa ali he-ti-na-tegahie.” huno hu-maine.

20 Sepetina aꞋamoꞋa netalamaꞋaene Yisasite eꞋya ani aꞋmoꞋa nago yafe havigegahe aiyafi aleꞋya meye-maine. 21 Aye-mainegeno YisasiꞋa mage huno havige “NaꞋa hu-gatesue?” huno higeno mage huno hie “Kava yagaisana kumate umainesanageꞋana mani tole neꞋnimogania kavate maineꞋana nagoꞋmoꞋa tamaga kayatega maisigeno nagoꞋmoꞋa hauga kayatega maisie.” huno havige. 22 Havigegeno YisasiꞋa mage huno netalamaꞋamogania hana-paiye “Nahavi-gea yana ohavinaꞋe. Falisua yana satuꞋage hu-mainea timo avamete ti hanea keꞋayopiti negahugi tanakaya kanale negaꞋo?” huno higeꞋana “E, tokiyatiꞋa haneanagitaꞋa negahuꞋe.” huꞋana haꞋe. 23 HaꞋageno mage huno hie “Tamage satuꞋage hu-mainea tina negaꞋanagi ala vaya mainelega tamaga nayategaene hauga nayategaene siale maisaya yana nagaiꞋni yana omalenegi NenafaꞋa ani yana nagoꞋa vayafe ago talo tala huno fatago hu-ma-tene.” huno hie.

24 HigeꞋya teniꞋa (10) anagaꞋamoꞋya ani kea haviteꞋya ani kanolafe amaipa haviꞋya haviya hu-na-tenae. 25 YisasiꞋa “Nagaitega eho.” huno higeꞋya ageno mage huno hie “Ma mopale ala kava vayaꞋmoꞋya ‘TusiꞋa ala vaya mainone.’ huꞋya Yuta vea omainaya veafe ke amama-kiꞋya aliꞋya ke hu-ma-teꞋya kava vayaꞋmogami avamete nehae. 26 NaꞋa nehayanagi tamakaya ani kavala ohiho. Tamakaipina ‘Nagi hanea kanoma maigahue.’ huno hisia kanomoꞋa aliꞋya kanotami maino. 27 ‘UhagoteꞋna maigahue.’ huno hisia kanomoꞋa mone oꞋali aliꞋya kanotami maino. 28 Nagaya ikapinagati emainoa kanoa vayaꞋmo natenea kanomoꞋna vayaꞋmoꞋya naya huꞋya kanaleꞋya hu-na-tesaya yafe omenogi nagaya amaya huꞋna aliꞋya kanoꞋami maisua yafe emainoanagiꞋna mukiꞋa veaꞋmoꞋya kefo yama hageno ai-gagi-ma-tenea yapiti kalu he-ma-tesua miya atalesua yafe faligahe emainoe.”

29 YisasiꞋa agaiꞋaenema tokaeꞋya nemaiya anagaꞋmoꞋya Yeliko kumala ataleꞋya ugahe hageꞋya kasagoꞋya veaꞋmoꞋya amakave umaine. 30 NeꞋvageꞋana tole anaulaga asu hu-mainea kanolamogania kate mopale mainanageꞋya “YisasiꞋa tanakaseno neꞋvie.” haya kea haviteꞋana ala kegefafiti mage huꞋana haꞋe “Anumayamogae, Tevitina aginagomogae, taꞋagaila kahauna hu-laꞋato.” huꞋana haꞋe. 31 HaꞋageꞋya umainaya veaꞋmoꞋya kenama-kiꞋya “Ke ohutana maiꞋo.” huꞋya hayanagi nagoꞋene ala kefiti keha keha haꞋe “Anumayamogae, Tevitina aginagomogae, kahauna hulaꞋato.” huꞋana keha keha haꞋe. 32 HaꞋageno YisasiꞋa haviteno aupaꞋa anile heti-maineno “NaꞋa hu-lana-tesue hugetana nehaꞋe?” huno hie. 33 HigeꞋana “Museka nehuꞋagi taꞋagaya etetaꞋa taꞋaulaga agesuꞋe hutaꞋa nehuꞋe.” huꞋana haꞋe. 34 HaꞋageno YisasiꞋa kalagi ai-na-teno anaulagale aya malegeꞋana aupaꞋa anaulaga neꞋageꞋana Yisasi akave vaꞋe.