1 OsifaꞋvemoꞋa hagelimo agegayalega hetino mainegeꞋna nagaya YoniꞋna agogeno nagola kefo afai afua hage lipiti vaꞋyi higeꞋna age-mainoe. Ani kefo afai afumo anumoꞋa seveniꞋa (7) anuꞋyaga hanegeno teniꞋa (10) aveꞋyagamo anupitila hai-mainegeno ani aveꞋyagamotela ala sauve kanomo tumano kuꞋyaga teniꞋa (10) tumano ku vailine. Ani seveniꞋa (7) anutela kefo afai afumo agia hanegeno ani agiyagamoꞋa Anumaya Kotifena kamuge hatageꞋya vaiteꞋya hu-haviya hutaya agiyaga kae-malageno hane. 2 Ani kefo afai afumona agoana maꞋa humaine. Nagola afai pusimo agia lepatie nehaya afu kana huno aiyamoꞋa nago ala afai kalamo agiꞋa peamo aiya kana humaine. AvayamoꞋa laiyoni afumo avaya kana hu-mainegeꞋna age-mainoe. Agogeno ani ala osifaꞋvemoꞋa agaiꞋa tokiyaꞋaene ala kava hisia siaꞋaene ani kefo afai afumona amine. 3 Amigeno ani kefo afai afumona nago anuna ago hae-malenaya falitesea afugula haneanagi amuna ageno ago eteno kanale hutene. Kanale hutegeꞋya ageteꞋya mukiꞋa ma mopafi veaꞋmoꞋya ageteꞋya amamaꞋyo aigeꞋya ani kefo afai afumona akave umainae. 4 Ala osifaꞋvemoꞋa agaiꞋa tokiya kefo afai afumona aminea yafe mukiꞋa veaꞋmoꞋya ani kefo afai afumofena “Alati maine.” huꞋya agia alisaga humainae. Kefo afai afumo agiene alisaga nehuꞋya mage huꞋya hae “Hana kanomoꞋa kefo afai afumo tokiyaꞋamoꞋma hia kavala huno hugahie? Ta agaiꞋenema tuma hisia tokiyaꞋa hane?” huꞋya hae.

5 Hageno Anumaya KotiꞋa mage huno hie “Atalegeno tagufa (3) kafuene sikisiꞋa (6) ikaꞋene kava yagaino.” huno higeno ani kefo afai afumoꞋa agaiꞋa agia alisaga huno Anumaya Kotifena tusiya huno kamugea hatageno vaitene. 6 Ani kefo afai afumoꞋa avaya aka-naka huno Anumaya Kotina kamugea hu neꞋateno Anumaya Koti agiene nemaiya kumaꞋaene ikapinagama mainaya veaꞋaenena hu-haviya humatene. 7 Hu neꞋamategeno Anumaya KotiꞋa atalegeno Yisasina amakuꞋa aminaya veaꞋnene tua huno amakaseteno mukiꞋa alu kote alu kote veaꞋnene, alu make lu make neꞋaiya veaꞋnene, alu maugafa lu maugafa kalimai veaꞋnene, kava humatesia tokiya amigeno kava yagaino maine. 8 Kava yagai-maineanagiꞋya mukiꞋa ma mopafi veaꞋmoꞋyama agia alisaga hugahayanagi maige maige hisaya hamaimuꞋma hanea veaꞋmogami amakima hanea avopi amaki kae-malenea veaꞋmoꞋya agia alisaga ohugahae. Ani avona Anumaya KotiꞋa ma mopama taloma ohunea kanafina mage huno hu-maineane “Nagai Sipi sipi nafaꞋnea, YisasiꞋa, faligahie.” huno hutenea kanomo avone.

9 Nagi tamakesama hanesimo-gatama mani kea havilama hutama hiho. 10 Anumaya KotiꞋa “E.” huno hisigeꞋya nagoꞋa veaꞋmoꞋya kina nopina ugahae Anumaya KotiꞋa “Naepe kaꞋyoteti haetama falimato.” huno hisigeꞋya nagoꞋa veaꞋmoꞋya naepeleti falilamategahae. Ani auꞋava yamoꞋma falote hisigetama Anumaya Koti kea haviꞋya amakupiꞋma malenaya veaꞋmogatama tokiya vaitama mani kea ali lokiya vaitama atafa hu-litama maiho.

11 Nagaya YoniꞋna agogeno nago kefo afai afumoꞋa* mopamo agusafiti evaꞋyi humaine. Ani kefo afai afumo anupina tole avela, sipi sipi nafaꞋnemo ave kana ave haneanagi agema aiyana tusiꞋa puku pukumo age kana huno agea aimaine. 12 NeꞋaigeno hagote kefo afai afumoꞋa tokiyaꞋa amigeno ani himamuleti mukiꞋa ma mopafi veaꞋmogamitela kava humaineno anima nago kefo afai afumoꞋa mukiꞋa ma mopafi mainaya veaꞋmogamifena mage huno hie “Hagote kefo afai afumona anupina haeꞋya falitesaya kava hageno amuna ale-maineanagino eteno kanale hutenea afumo agia alisaga hiho.” huno humaine. 13 Nehuno anima nago kefo afai afumoꞋa mukiꞋa aluꞋa augafa tokiyaꞋage avame yana nehuno atamofena “Ikapinagati elavio.” hunoꞋma hiana veaꞋmoꞋya neꞋagageno atamoꞋa ikapinagati mopafina elavi-maine. 14 Elavigeno hagote kefo afai afumoꞋa “NaꞋa huo.” huno tokiya amigeno nago afai afumoꞋa tokiya avame yama nehia yateti veala aye mavataga hiaꞋamo ani veafena mage huno humaine “Tamakaya hagote kefo afai afua, naepeleti honomu ayageno faliteno eteno mainea afumo agia alisaga hisaya yafe yosaleti avameꞋname hutama amena talo hiho.” huno humaine. 15 HigeꞋya taloma hayana Anumaya KotiꞋa atalegeꞋya nago kefo afai afumo amena yosaleti talo humalaya kefo afai afumo amela haimula amigeno aepa heno nagoꞋa veaꞋmoꞋya agai agima alisaga nohageno haegeꞋya fali-maine. 16 Ani kefo afai afumoꞋa mage huno hie “MukiꞋa veaꞋmogamina, amakima omale veaꞋnene, amakima hanea veaꞋnene, miyaꞋami hanea veaꞋnene, miyaꞋamima omale veaꞋnene, nofipi maineꞋya miya oꞋali aliꞋya neꞋaliya veaꞋnene, amakaiꞋami miya alisaya aliꞋyama neꞋaliya veaꞋnene tamaga amayatelo hamanilelo ohananesia avona kaemateho.” huno higeꞋya kasagoꞋya veaꞋmo-gamina ani avomoꞋa hamanileti kae-male kae-male humaine. 17 HigeꞋya ani avona hagote kefo afai afumo agio ifi ani agimo napamao amaugafaleꞋma ani alegana yama omalenesaya veaꞋmoꞋya nago yana alu veaꞋneletila miya ohigeꞋya amakaiꞋami yana alu veaꞋmoꞋya miya ohugahae.

18 NagoꞋa veaꞋma kanale havi haviꞋyaꞋami hanea veaꞋmoꞋya ani hagote kefo afai afumo napamaꞋa hapaliꞋya havilama hisae. Ani napana nago kanomo agimo napamaꞋa hane. Ani agimo napana sikisi hataleti sikisiti sikisiꞋa (666) napamaꞋa hane.