9
PoloꞋa Isaleli veafe havino hau humatene.
1 KalaisiꞋene aigaꞋmaeꞋna mainoafe tamagelafa nehue. Havige nohue. Alu Aotage AvamuꞋmoꞋa nagupi mainegeꞋna naguꞋaleti tamage nehue. 2 Yuta anagaꞋnimoꞋya Yisasi kea ohaviyaꞋyafe mukiꞋa kanafina naipamoꞋa kanaꞋage nehuno nagata neꞋaiye. 3 Nagoke nofi anagaꞋnimoꞋya amakuꞋa aiyahae huꞋya Yisasi ke havisayafe Anumayamotega ke huꞋna havigesugeno “Hai vainateno natalenegeꞋna hani yapi nagaila nenateka ani veala amavalesane.” huꞋna havigesua nagesa nehavue. 4 Nagai nofi anagala Isaleli veaꞋnea Anumaya Kotina nafaꞋneyagaꞋa mainageno Anumaya KotiꞋa agaiꞋa tokiya hale yamaꞋa amaveliteno alino hagelafi-matenea kea humateteno kahegi kea amamino agai agima alisaga hisaya aliꞋyana amamino “MaꞋa yama hulamategahue.” huno hulokiya vaimalenea kea hamapai-maine. 5 Ani nofipiti tokiyaꞋage taginagomoꞋya falote humainayanagino KalaisiꞋa Anumaya KotiꞋma tamaugafa aligatigahie huno hutenea kanoa ani taginagomoꞋyafiti velafa maisiafe falote humaine. KalaisiꞋa mukiꞋa yana kava yagaino Anumaya Koti maineanagita mukiꞋa kanafina agola agia alisaga hisune. Tamage.
Anumaya KotiꞋa agaiꞋa veaꞋne maisaya yafe hapalimatene.
6 Anumaya KotiꞋma hulokiya vaimalenea kemoꞋa falote huno afa ya kana nehie huꞋna nehuo? AꞋao na kea nohugi Isaleli veafe tamage nehue mukiꞋa ani veaꞋmoꞋya Anumaya Kotina nafaꞋneyagaꞋa omainae. 7 MukiꞋa Apalahamuna aginagomoꞋya nafaꞋneyagaꞋa omaitafa huꞋya omainagi nayona Anumaya KotiꞋa Apalahamufena mage higeno autaꞋmafina kae-maleneane
“Kagaika nafaꞋnemoꞋa AisakiꞋma atesia nafaꞋneyaga kagai kaginagomoꞋya maitafa huꞋya maigahae.” huno humaineane.
8 Ani kemo aepaꞋa mage humaine mukiꞋa vealavemoꞋya nehaya kavateti ApalahamuꞋma atenea nafaꞋneyaga Anumaya Koti nafaꞋneyaga omainagi Anumaya KotiꞋa hulokiya vai-malenea keleꞋma amametiti humainaya veafe “Apalahamuna nafaꞋneyagaꞋa mainae.” huno humateneane. 9 Anima hulokiya vaimalenea kemoꞋa mage huno humaine “Nagayama malenoa kanamoꞋma efalote hisigenoꞋa SelaꞋa ne nafaꞋne ategahie.” huno humaineane. 10-12 Ani yamaꞋagefeno-magi taginagomoꞋa AisakiꞋa ko huteno aꞋama Lepekana alitenegeno aipa yama hiana kuyave nafaꞋnelata aipafina kanale yano havi yano huꞋana ohunaꞋa kanafinagino Anumaya KotiꞋma humaineana agaiꞋa haiya yateti veala hapalilatenea kava huno Anumaya KotiꞋa mage huno itaꞋanimofena hapaiye “Yage nafaꞋnekamoꞋa haenaga nafaꞋnekamo aliꞋya kano maineno akave malegahie.” huno humaineane. Ani yamofena mage huno humaine Anumaya KotiꞋa veala kanale kavaꞋma humainayafene huno ohapaligahianagino haisia kanomofe ke hinageno agaitega egahie. 13 Anumaya Koti autaꞋmafina mage huno humaineane “YekopuꞋa nahau nayamopafi nahaiya kanogi IsoꞋa onahaiya kano maine.” huno humaineane. 14 NaꞋa hu-maineanagita naꞋane huta hisune? “Anumaya KotiꞋa fatago ohia kava humaine.” huta hisuno? AꞋao naꞋa kea ohutafa huta ohugahune. 15 Mosesefena mage huno humaineane “Nago kanohema ‘Nahau huteꞋna kalagi aitegahue.’ huꞋnama hisua kanomona kalagila aitegahue.” huno humaineane. 16 NaꞋa humaineafe Anumaya KotiꞋa kalagi aisia yana veaꞋmoꞋya “Namisie namisie.” huꞋya nehuꞋya veaꞋmoꞋya “Nayamufa aiꞋna aliꞋya alisuafe kalagila ainategahie.” huꞋya hisaya yatetila kalagila aioꞋamategahie. Anumaya KotiꞋa “Ma kanomofe nenahaiyanagiꞋna kalagi aitegahue.” huno hisia kanomona hau huno kalagila aineꞋate. 17 Anumaya KotiꞋa Isipi sauve kanoa Felofe mage huno higeꞋya kae-malenayane
“Alihetigatenoa yafe mukiꞋa veaꞋmoꞋya tokiyaꞋniꞋa agesaya yafeꞋene navagemoꞋa mukiꞋa kumate ute ete hisia yafeꞋene ‘Kagaya ala kano maiyo.’ huꞋna ali hetigatenoe.” huno humaineane.
18 Anumaya KotiꞋa haisia veaꞋmogamina hauna humateno kalagila aimatenegi agaiꞋa kema ohavisaya yafe nagoꞋa veaꞋmogamina amaku amakesa alino aililematene. 19 NagoꞋamogatama nagaifena mage hutama nahavigegahae “NaꞋa nehianagi naꞋa higeno veaꞋmogamifena ‘Havi kava nehae.’ huno nehie? AgaiꞋama haisia agu agesa havisia yana ta ani yafena ‘Ohugane.’ huno hutegahie?” hutama hugahae. 20 Hugahagi kagaya mopale kanomoga hanaꞋa augafa kano maineka Anumaya Kotifena aka huka kea vaitegane? Mopaleti aye kakalifeno talo humalenaya yopamoꞋa talo hutenea kanomofena “NaꞋa higeka nagaila maꞋa huka talo hunatenane?” huno hugahio? 21 AꞋao, naꞋa augafa kea ohugahie. Mopaleti aye kakalifeno talo humalenesia kanomoꞋa talo humalenesia yana agaiꞋa yane. Nagola mopamo alaga alino nagola kanale susufanea talo huteno ani alagaleti havi aliꞋyate susufanenema talo hisiana agaiꞋa yane. 22 Anumaya KotiꞋa aniꞋa humaine. Tagaya agaiꞋa talo humalenea susufane kana huta mainone. Nago susufane kana veaꞋmoꞋya kefo yama humainayafe tusi hai vaimateno himamuꞋaleti “Amakata aisia yana amamigahue.” huno humaineanagi mailava huno amakava-maineno kaiyekea hu noꞋamate. 23-24 Amakava-maineafe tagaya Yuta veaꞋmoꞋyaene Yuta vea omainaya veaꞋmoꞋyaene agaiꞋalega visunafe ke hulatenea susufane kana veaꞋmogatihena, tusiya huno kalagila ailatenea veaꞋmogatina “Haenagama tokiya hale yaniꞋa tamamisugetama aligahae.” huno hulatene. Nayona tokiya hale yamaꞋa alisunafene huno talo hulatene. 25 Ani yafena HoseaꞋa, Anumaya Koti aune kanomoꞋa Anumaya Koti humainea kea mage huno kae-maleneane
“Yuta veapi omainaya veafena ‘NagaiꞋni nofi anaga mainae.’ huꞋna hugahue. NaguꞋa oꞋamaminesua anagafena ‘Nahau nayamopafi nenahaiya anaga mainae.’ huꞋna hugahue. 26 Anumaya KotiꞋa ‘Nagai anaga omainae.’ huno humainea kumatega Anumaya KotiꞋa amakaifena mage huno hugahie ‘Tamakaya nahaimu hanea Anumaya Kotinina nafaꞋneyagaꞋniꞋa mainae.’ huno hugahie.” huno humaineane.
27 AisaiyaꞋa Isaleli veafe mage huno kae-maleneane
“Isaleli veaꞋmoꞋya nafaꞋneꞋamima ateꞋya atagufeꞋyama hage li kahaepa kana huꞋya kasagoꞋya veaꞋne maigahayanagi osi anaga kanoꞋa amaku amamena aligatigahue. 28 AnumayamoꞋa ma mopale mainaya veala kaiyekea humateteno ‘NaꞋa yama aligahae.’ huno humainea kemona ani kavala fatago huno aupa kanoꞋa humateteno ali haꞋno hugahie.” huno humaineane.
29 AisaiyaꞋa hagoteno mage huno humaineane
“MukiꞋa tokiyaꞋa hanea AnumayamoꞋa osiꞋa anaga kanoꞋatihe kalagi aioꞋamateleꞋasina mukiꞋamogatina Sotomu mainaya veaꞋnene Komola mainaya veaꞋnene faliꞋya fanane humainaya kava huteꞋasine.” huno humaineane.
Isaleli veaꞋmoꞋya amametiti ohayafe fatago veala omainae.
30 NaꞋa hu-maineanagita naꞋane huta hisune? Yuta veapi omainaya veala fatago veaꞋne maisayafe kasageke vokela ohunaya veaꞋmoꞋya afaꞋa YisasiꞋa hulatenea yafe haviꞋya amakupi maleꞋya amametiti humainaya yateti Anumaya KotiꞋa ani veaꞋmogamifena “Fatago veaꞋne mainae.” huno humatene huta hisuno? 31 Humateneanagi Isaleli veaꞋmoꞋya tusiya huꞋya kahegi kemona akave malesaya yafe kasageke vokela hayanagi ani kemona akave malelama ohunaya yafe fatago veaꞋnea omainae huta hisuno? 32 E, ani ke hisune. NaꞋa higeꞋya fatago veala omainae? “Tagaiti kasageke hisuna aliꞋyateti fatago veaꞋne maigahune.” huꞋya hayanagi “YisasiꞋa hulatenea yafema havita lagupi maleta tametiti humainonafe ‘Fatago veaꞋne mainae.’ huno hulategahie.” huꞋya ohunayanagiꞋya fatago veaꞋnea omainae. YisasiꞋa yafa kana humaineanagi agaifena haviꞋya amakupina omalenaya yafe ani haletoꞋna yafate ayalega amaiya aye-kaꞋyopeliꞋya asaga hulavi-mainae. 33 Anumayamo autaꞋmafina mage huꞋya kae-malenayane
“Agegeho nagola aye hataga huliꞋya asaga hulavisaya yafana Saiyoni* malogeno hane. Asaga hulavigahayanagi agaifema haviꞋya amakupi malenaya veaꞋmoꞋya amakayea ohugahae.” huꞋya kae-malenayane.