14
Tagaya nelafugami no maiyana fako huoꞋamatesune.
1 NagoꞋa tamafu-tamakanaꞋya YisasiꞋa hulatenea yafena haviꞋya amakupi maleꞋya amametiti nehayanagi Anumaya KotiꞋa “Ago fatago veaꞋne mainae.” huno humatenea yafena havilama ohuꞋya “NaꞋa kava hisunageno Anumaya KotiꞋa ‘Fatago veaꞋne mainae.’ huno huotategahie.” huꞋya nehaya veala tamakaiꞋene nagopi maisayafe amavaletama amateho. Amategahagi amakaya amakesafiti alu ke hisaya yafena kea vaitama ani keletila tua hu omateho. 2 NagoꞋa kafu-kaganaꞋa “MukiꞋa kavela negahue.” huno agesa nehavianagi nagoꞋa kafu-kaganaꞋa Yisasife havino agupi maleneanagino Anumaya KotiꞋa “Ago fatago kano mainane.” huno hutenea yafena havilama ohuno “AnumayamoꞋa fatago kano mainane huno hunatesiafe afumo amela onegahue.” huno humaine. 3 MukiꞋa kaveꞋma nesia kafu-kaganaꞋa afuma nonesia afu-agananafena “Afa kano mainane.” huno huoꞋateno. Afumo ameꞋama nonesia afu-aganaꞋa mukiꞋa kaveꞋma nesia afu-aganafena “NaꞋa kano mainane.” huno huoꞋateno. Anumaya KotiꞋa ani tole kanolatana ago anavale-maine. 4 Kagaya taga maineka nago kanomo aliꞋya kanohena “NaꞋa aliꞋya kano mainane.” huka huneꞋatane? Agayama ani kanomo aliꞋyateꞋma fatago huno alisiano havi aliꞋya alino maisiano agaiꞋa kava kanoꞋamo yane. Kagai yana omalene. AnumayamoꞋa agaiꞋa ali lokiya vaitesia tokiyaꞋa haneafe ali lokiya vaitesigeno maigahie.
5 NagoꞋa tamafu-tamakanaꞋya ma amakesa nehaviye “Nagoke kanaleꞋma mauna yamoꞋa alu kanamona agase-maineanagita ani kanalekeꞋya alitalu huta Anumayamo agia alisaga hugahune.” nehageꞋya nagoꞋa tamafu-tamakanaꞋya “MukiꞋa kanamoꞋa nagoke avamete humainea kanale nemaune.” huꞋya nehayanagi nagoke nagoke veaꞋmoꞋya amakaiꞋami amaku amakesa havilama hisae. 6 Nago tamafu-tamakanaꞋa agesa haviteno “Nagoke kanama mauna yamoꞋa nagoꞋa kanamona agase-maineanagita ani kanalekeꞋya alitalu huta Anumayamo agia alisaga hugahune.” huno hisia kanomoꞋa Anumaya Koti agia alisaga hisiafe ani kavala nehie. Nago tamafu-tamakanaꞋa “MukiꞋa kavela negahue.” huno hisiana Anumayamotega nunamu huno muse hutenea yafenagino Anumayamo agia alisaga humainegi nago tamafu-tamakanaꞋa afumo ameꞋma monesia kanomoꞋa “Anumaya Koti agia alisaga hugahue.” huno monesie. AgaiꞋenena Anumaya Kotitega nunamu huno muse huno havinege. 7 Nago kanoa haegafa huno maisiana agaiꞋalefekeꞋya huno omaine. Nago kanoma falisiana agaiꞋalefekeꞋya huno ofaline. 8 TahaimuꞋma hanesigeta maisunana Anumayamo agia alisaga hisunafe mainone. Falisunana aniꞋa huta Anumayamo agi alisaga hisunafe faligahune. AniꞋa humaineafe tahaimuꞋene maisunano falisunano Anumayamo anaga mainone. 9 Fali-mainaya veateꞋene hamaimu hanegeꞋya mainaya veateꞋene AnumayaꞋamimo maisiafe KalaisiꞋa faliteno eteno haimu alino heti-maine.
10 NagoꞋa veaꞋmogatama naꞋa higetama tamafu-tamakanagami no maiyana fako huneꞋamatae? NagoꞋa veaꞋmogatama naꞋa higetama tamafu-tamakanafena “Afa kano mainane.” hutama huneꞋamatae? Tagaya mukiꞋamogata Anumaya KotiꞋa ala kaiyekema hulatesifina hetigahune. 11 Avopina mage huno kae-maleneane
AnumayamoꞋa mage humaine “Tamagelafa huꞋna tamahanepauve mukiꞋa veaꞋmoꞋya nagaifena mage huꞋya hugahae ‘Kagai veaꞋne mainonagi kava hulato.’ huꞋya hugahae. MukiꞋa veaꞋmoꞋya ‘Kagaya Anumaya Kotiti mainane.’ huꞋya nagia alisaga hugahae.” huno higeꞋya kae-malenayane.
12 Kae-malenageta tagaya ageteta havilinone mukiꞋa nagoke nagokeꞋmogata nemauna auꞋava yatimo aepatia Anumaya Kotina hapaigahune.
Tafu-taganagamina kefo kava hisaya augafa kavala hu oꞋamatesune.
13 Tafu-taganagamifena “NaꞋa nehane.” huta fakoa humateta nagoꞋene havi tagesa havi oꞋamamisune. NaꞋa ohisunana tafu-taganaꞋya tageteꞋya asaga hulaviꞋya kefo kava hisaya yafenagita havi kavala ohisune. 14 AnumayanimoꞋa YisasiꞋene ailokaeꞋna maineꞋna ago havilinoe nagoꞋa kaveꞋmoꞋa oniꞋyaꞋage ohune. Nago kanomoꞋma agaiꞋa agu agesafima “OniꞋyaꞋage humaine.” huno havisia kaveꞋmoꞋa oniꞋyaꞋage haumaine. 15 Kagaya nagoꞋa kaveꞋma nenana yafena kafu-kaganana agu agesa alihaviya hutesanana kahau kayamopafi negahaiya kavala nohane. KalaisiꞋa ani kafu-kaganana agu amena aligatisiafene huno fali-maineanagika nesana kavetetifene huka alihaviya huoꞋato. 16 Kanale kava hisaya yafena havigu veaꞋmoꞋya “Havi kava nehae.” huꞋya hulamateyafenagi kava yagaiho. 17 KaveꞋma neneꞋya tima neneꞋya nehaya yamoꞋa Anumaya KotiꞋa kava yagailatesia yamona aepaꞋa omaleneanagi Alu Aotage AvamuꞋmo taminea fatago kavaꞋene taipa falu hisia yaꞋene muse hisuna yaꞋene aepaꞋa hane. 18 Haneafene huꞋya nagoꞋa veaꞋmoꞋya ani kava huꞋya Kalaisi aliꞋyama alisayana Anumaya KotiꞋa “Kanale kava haya veaꞋne mainae.” huno hulamatesigeꞋya nagoꞋa veaꞋmoꞋyaene “Kanale veaꞋne mainae.” huꞋya hulamategahae.
19 Ani yafe tagaya nagoke tagu tagesaleꞋma maisuna kavaꞋene tafu-taganagami amaya huta tokiyaꞋage huꞋya maisaya amaku amakesale maisaya kavala hisune. 20 Tamakaya kave nesaya yafekeꞋya nehutama Anumaya Koti aliꞋyana alihaviya ohiho. MukiꞋa kave neyana kanale yanagi kagaya nana kavemoꞋa kafu-kaganaꞋya asaga hulavisaya kava humatesanana tusiꞋa havi kava nehane. 21 Afua nesano havilima nesano nagoꞋa kavaꞋma hisana yamo kafu-kaganana asaga hulavisia kavaꞋma hutesanana aniꞋama hisana kavala atalo. 22 Ani yafema havika kagupi malenana yana kagaikaene Anumaya KotiꞋene tanakaitanigeꞋya hanesie. Nago kanomoꞋma nagoꞋa nesia yafeꞋene hisia kavaꞋenena agaiꞋa aguꞋamoꞋa kaiyekema huoꞋatesiana ani kanomoꞋa muse hugahie. 23 Muse hugahianagi nago kanomoꞋma nesia yafema tole agesa haviteno nesiana Anumaya KotiꞋa “Havi kava nehane.” huno hutegahie. Ani kanomoꞋa “Kanale ya nenoe.” huno agupi omaleneafe havi kava nehie. MukiꞋa yana “MaꞋa kavala kanale kavale.” huta lagupi omalenona yana kefo yane.