Sin maikap-at ay tawen ay nanturayan Ari Jehoyakim ed Juda, inbilin Diyos en Jeremias ay man-as nalopilop ay papil ta isolat na amin din inpaipadto na en sisya barbareng ibabawin din kaipoipogaw din basbasol da mo dengngen da kasin din kaeegyat ay inkeddeng Diyos ay dosa da. Tinongpal Jeremias din inbagan Diyos et inpaisolat na am-in en Baruk ay baa na. Pag nan ibaa sin Timplo ta ibasa na sin kaipoipogaw.

Idi inbasa na am-in, waday nangipadamag sin ari, et inpaialin din ari din nalopilop ay papil ta maibasa abe en sisya ya din oopisyal na. Napasamak di sin tinmeg-inana, isonga wada da am-in sin esa ay kowarto ay man-an-anido. Tonggal makdeng ay inbasan di baan di ari di esa ya esa ay paset di naisolat, potoen din ari si gipan et itep-a na sin apoy enggana ay napooan din intiro ay nalopilop ay papil. Magay inpailan din ari ya din iib-a na si egyat ono ladingit begew sin kalin Diyos ay dinnge da. Inbilin din ari ay depapen das da Jeremias en Baruk, ngem laton ay intabon Diyos daida.