1 Idi nabayag, pinangabak Diyos din Israelita sin am-in ay kagobat da et indawtanas daida si talna. Si Josue pay, enggay nakay sin timpo ay sana, 2 isonga inpaayag na din mangialagey sin am-in ay Israelita: din nankakay di ili, papangolo, hohowis ya oopisyal. Pag nan kanan, “Nay enggay nakayak et dandani di timpok. 3 Laydek ay ipanemnem en dakayo din am-in ay inamag Yahweh ay Diyos tako sin nanasyon begew en datako, tan inila tako ay mismo di inyat na ay nakigobat para en datako. 4 Enggay inpatawid ko sin tribu yo din am-in ay dagan di nanasyon ay inabak tako ya daan pay maabak. Naibingay am-in en dakayo manlogi sin ginawang ay Jordan sin bandas belaan di agew enggana sin baybay ay Mediterranean sin diposan di agew. 5 Awni et mismo ay si Yahweh ay Diyos yo di mangipakaan en daida sin domatngan yo et okaen yo din daga da ay kaman din inkari na.

6 “Isonga esten yo ay mangonod sin am-in ay linaon din libro ay naisolatan di linteg Moses. Adi kayo masangsangaw si olay at-atik. 7 Adi kayo makikadkadwa sin nabay-an ay ipogaw ay makiili en dakayo. Ilaen yo abe ta adi kayo mankarkararag sin diyos da ono os-osalen din ngadan di diyos da ay mansapata. Adi kayo mandokmog ay mandayaw en daida, 8 mo adi et ipapasnek yo ay mantalek ya mansilbi en Diyos ay kaman san inyaat yo enggana ed wani.

9 “Nemnemen yo ay pinakaan Diyos din dadakke ya napipigsa ay nasyon ay dinatngan yo, et enggana ed wani, maga di nakabael ay nangabak en dakayo. 10 Olay es-esa en dakayo yan kabaelana ay ipalayaw di sinlibo, tan si Yahweh ay Diyos tako di makigobgobat para en dakayo ay kaman din inkari na. 11 Isonga mo banolen yon biyag yo, ilaen yo ta ipapasnek yo ay manglaylayad en sisya.

12 “Tan mo dokogan yo si Yahweh ay Diyos tako ya makikadwa kayo sin nabay-an ay man-ili isna ya makiasawa kayo en daida, 13 sigurado ay adi itoloy Diyos ay mangipakaan sin nanasyon ay datngan yo. Manbalin da ay kaman tagdey ono bito ay kaknaan yo. Maiarig da abe si mansakit ay soplit sin edeg yo ya pagat ay manbek sin mata yo enggana ay maga en dakayo di mabay-an isnan mayamayat ay daga ay indawat Yahweh ay Diyos tako.

14 “Ed wani, enggay dandani di timpok. Dakayo pay, dadlon ammon di esa ya esa ay indawat Diyos din am-in ay inkari na ay pansigdan yo. Tinongpal na am-in ay inkari na, magay olay esa ay adi nan tinongpal. 15-16 Ngem mo kas-ano di kinamatalek na ay nanongpal sin am-in ay kari na, siya met laeng di iyat na ay mangipatongpal sin inbaga na ay dosa. Tan mo labsingen yo din intolag nan dakayo et mandayaw ya mansilbi kayo si odom ay diyos, bomonget sisya yan dosaenas dakayo. Adi mabayag yan iwed en dakayo di mabay-an isnan mayamayat ay daga ay indawat na.”