43
Kararag Di Ipogaw Ay Napalpaligatan
1 Paneknekam koma ay Diyos di kinalinteg ko
en daida ay adi mangammo ay sik-a din Apo.
Omilisi ka koma ay Apo
sin nasikap ya makaetek ay kaibaw ko.
2 Sik-a di enak pankamangan.
Apay ngin ay en ka tinmaynan?
Apay ngin ay magay saldeng di ligat ko
ay idawdawat di makedse ay kaibaw ko?
3 Ipailam kod san silaw mo ay kaiarigan di seg-ang mo,
paneknekam abe din katet-ewan di intolag mo,
ta omipango da sin nasantoan ay dontog mo
ay say kad-an di Timplo ay beey mo.
4 Asiak dayawen sik-a sin kad-an di altar mo,
tan sik-a ay Diyos di poon di ragsak ko.
Man-gitaraak ay mangikanta si dayaw mo,
sik-a ay bigbigek ay Diyos ko.
5 Apay pay laeng ay mariribok ya manladingitak?
Sik-a, Apo di pantalkak,
tan sik-a di omisalakan ya Diyos ko,
et sik-a kasin di idaydayaw ko.
*^ Din Salmo ay nay et sigod ay naitapi sin Salmo 42. Man-iiso di koro ay madtengan sin 42:5,11 ya 43:5.