Salmo 58
58
Kararag Ta Dosaen Diyos Di Baken Nalinteg Ay Tuturay
1 Dakayo ay tuturay, ay siya mo kosto di ikeddeng yo?
Sin pangokoman yos ipogaw, ay nalinteg di iyat yo?
2 Aga met, tan lawlawa di nemnemnemen yo,
lokoen yo abey iib-a yo.
3 Mo maipanggep si mangam-amag si lawa,
sigod ay nasasangaw ya maetek da
manipod sin naianakan da.
4 Kaman dan eweg ay way gita na.
Opopen dan inga da ay kaman dan nateweng ay kobra
5 ay adi mannge sin pangayagan di mansalsalamangka,
olay nalaing sisya.
6 Apo, nan maangat ay layon, mekmekem koma din bab-a da,
bag-otem koma din sawing da.
7 Kaman din danom ay manlesep, maomas da koma.
Kaman da koman logam ay naigatigatin ta malaylay da.
8 Kaman koman ginga ay maomas di ngaey na,
ono binowang ay adi makailas pat-a.
9 Din panosaan Diyos en daida et mabigla.
Kaman logam ay bigla ay magabot da,
pag itayaw di dagem ay napigsa.
10 Maragsakan dan to din nalinteg ay mangila
sin kadosaan di mangam-amag si lawa.
Maiarig das nangabak ay sosoldado ay peteg di ragsak da
mo gatigatinan da din dadan di kalaban da.
11 Din ipogaw yan kanan dan to,
“Magon-gonaan din nalinteg ay sigurado.
Tet-ewa ay waday Diyos ay mangokom
sin kaipoipogaw isnan lobong.”