Salmo 67
67
Kanta Ay Pan-iyaman En Diyos
1 Apo, maseg-ang ka koma en dakami
et ipailam di layad mo en dakami
2 ta say maammoan am-in ay ipogaw din panlaydam,
ya am-in ay nasyon et en da maisalakan.
3 Idaydayaw koma am-in ay ipogaw sik-a ay Apo,
idaydayaw da san nabanol ay ngadan mo.
4 Manragsak koma din nanasyon et mankanta da,
tan pag kosto am-in ay ikeddeng mo en daida
ya idaldalan mo abe din kailiili isnan daga.
5 Idaydayaw koma am-in ay ipogaw sik-a ay Apo,
idaydayaw da san nabanol ay ngadan mo.
6 Indawat Diyos ay Apo mi san nawadwad ay apit mi,
tan binindisyonana din daga mi.
7 Ad-ado ay bindisyon di indawdawat na,
isonga dakayo am-in ay ipogaw isnan daga,
patgen ya egyatan yos sisya.