Salmo 88
88
Kararag Di Ipogaw Ay Palalo Ay Nadismaya
1 Yahweh ay Diyos ay omisalakan,
mankararagak en sik-a si labi ya kaagawan.
2 Dengngem kod nan kararag ko
ay mankedaw si badang mo,
3 tan kamanak matey si palalo ay ligat ko
4 ya enggay magay bikas ko.
5 Sin kad-an di natey, kamanak nabaybay-an,
kamanak naikaot ay soldado ay natey si gobatan
ay enggay nilinglingam ya adi kan tolongan.
6 Inmikosnong ka sin kaot ay kalosongan ya kabolingetan.
7 Mariknak di kinadagsen di bonget mon sak-en,
omilned ay kaman dadakke ay dalloyon.
8 Inturong mo din gagayyem ko ta tomaynan da,
nanbalinak ay kadodogis sin pangila da.
Adiak makabala isnan naipokokak,
9 begew si ladingit ko, kinmapsot nan matak.
Inag-agew ay kedkedawek din badang mo,
itag-ay kon takkay ko ay mankararag en sik-a, Apo.
10 Adi ka met amagen di milagro para sin baken matmatago,
adi aben makabangon di natey ta idayaw dan ngadan mo.
11 Sin kaot ay kadondonotan da yan adi da ipaammo
din adi manbalbaliw ay layad ya kinamatalek mo.
12 Ay maipaila aya din nakaskasdaaw ay inam-amag mo
ya mabigbig din kinasiged mo
sin mabolinget ay doy ay kad-an da
ay din emey yan enggay malinglingan da?
13 Inagsapa ay mankarkararagak ay mankedaw si badang mo.
14 Apay nga bomaybay-an ka, Apo?
15 Sipod pay sin kakitkittoy ko,
kamanak matey si kanayon ay ligat ko,
enggay naabakak sin dinmosdosaam ay napalalo.
16 Kaman danom ay dinmalapos din bonget mo,
adiak makaleng-ag sin kaeegyat ay inpalak-am mo.
17 Kaman layos ay nanliniked en sak-en,
maninsin-agew ay omilemlemlem.
18 Inpaaddawim en sak-en din gagayyem ko,
et bolinget anggoy di gait ko.