Salmo 92
92
Kanta Ay Pangdayaw En Diyos
1 Mayat di man-iyaman en sik-a, Diyos ay Kangatoan,
ya mangikanta si kaidayawam.
2 Inagsapa ya linablabi ay maikankansiyon
din adi manbalbaliw ay layad mo ya kinapodnom.
3 Mayat tet-ewa ay ikanta
ay makompasan si gitara ya arpa.
4 Tan pinaragsak mos sak-en sin nakaskasdaaw ay inamag mo
et ibogaw koy kantak gapo si ragsak ko.
5 Nakaskasdaaw din inam-amag mo,
adi maedasan di nemnem mo.
6 Adi maawatan di naong-ong ya magay nemnem na
7 din kasasaad di mangam-amag si lawa
ay olay mo kaman dan logam ay gomabay da
ya di biyag da et somiged pay,
ngem din pantongpalan da
et panakadadael si eng-enggana.
8 Ngem sik-a ay Apo di kangatoan si eng-enggana.
9 Amin ay kalaban mo, awni et matey da,
amin din mangam-amag si lawa
et maabak ya mansisian da.
10 Ngem inmipabikas ka ay kaman bomaro ay atap ay baka,
binindisyonam sak-en ya inmiparagsak ka.* Din kanana sin Hebreo et: nabokbokanak si baro ay lana.
11 Laton ay nailak din naabakan di lawa ay komonkontra,
nadngek abe din bogaw da sin naabakan da.
12 Din nalinteg yan gomabay da
ay kaman din sidro ed Lebanon ya din kaiw ay palma.
13 Kaman dan kaiw ay naimola sin beey di Apo,
gomabay da sin Timplon Diyos ay daydayawen tako.
14 Manbonga da olay ad-adoy tawen da,
kanayon ay makneg ya magabay da.
15 Siya nay mangipaila ay nalinteg din Apo,
magay maipabasol en sisya ay salaknib ko.