Salmo 98
98
Manragsak Tako Tan Nangabak Si Diyos
1 Ikantaan yo si Diyos si baro ay kanta,
tan nakaskasdaaw din inam-amag na.
Nangabak sisya ay bokbokod na
babaen sin nasantoan ay panakabalina.
2 Inpaammon Diyos sin nanasyon din ena nangabakan
ya din kabaelana ay mangisalakan.
3 Tinongpal na din kari na sin Israelita,
kanayon ay napodno en daida
ya inpappaila na din layad na en daida.
Amin ay ipogaw sin solin di daga,
din nangabakan Diyos tako yan inila da.
4 Amin ay ipogaw sin daga,
begew si ragsak yo, ipigsa yo ay mankanta
ay pangdayaw yo en sisya.
5 Kompasan yo si arpa din kanta yo
ay mangidaydayaw en Apo.
6 Mananggoyob ya manbogaw kayo begew si ragsak yo
sin sangoanan Diyos ay ari tako.
7 Manragsak kayo ay baybay ya amin ay linaona,
manragsak ka ay daga ya amin ay wadan sik-a.
8 Dakayo ay ginawang, manpalakpak kayo,
dakayo ay dontog, man-es-esa kayo
ay mankanta si ragsak yo sin sangoanan di Apo.
9 Tan omal-ali sisya ay mangituray sin daga,
nalinteg ya magay pabpaborana
sin pangokomana ya pangiturayana.