Salmo 132
132
Din Inkarin Diyos En David
1-2 Manakabalin ay Diyos ay dinaydayaw Jacob, nemnemem koma
si David ya din ligligat ay inanosana,
siya abe sin nay kari na en sik-a,
3-4 tan kanana, “Adi mabalin ay somaaak,
adiak aben bomaktad ta maseyepak,
5 enggana ay makaisaadak si panteam, manakabalin ay Apo,
ay dinaydayaw Jacob ay apo mi ay ipogaw mo.”
6 Nadamag mi din Baol di Tolagan sin kawada mi ed Betlehem,
et dintengan mi sin papayew ed Jearim.
7 Et kanan mi, “Emey tako sin Timplon Diyos ay beey na
ta mandokmog tako sin sangoanan di trono na* Din Baol di Tolagan et simbolon di tronon Diyos isnan daga.
ay mandaydayaw en sisya.”
8 Omali ka ay Diyos sin Timplo ta say panteam si kosto,
koyogem din Baol di Tolagan ay sinyal di panakabalin mo.
9 Din papadim et sapay koma ta nalinteg di kabibiyag da,
din ipogaw mo abe et ibogaw da koma di ragsak da.
10 Gapo sin inkarim en David ay bag-en mo,
adi ka koman dokogan nan ari ay insaad mo.
11 Et siya nay karim en David ay en ka insapata,
say dadlon kan tongpalen ay magay dowadowa:† Din inkarin Diyos en David et madtengan sin 2 Samuel 7:12-16.
“Isaad ko ay ari di esa ay polim ay maisokat en sik-a.
12 Et mo tongpalen din an-ak mo din intolag ko en sik-a,
mansososkat di poli da ay manturay si eng-enggana.”
13 Pinilin Diyos ed Jerusalem ay say kosto ay panbeeyana.
14 Kanana, “Isnay laydek ay panteak ay manturay si eng-enggana.
15 Idawat ko din amin ay kasapolan di man-ilis na,
olay din nabibiteg et mangan da enggana ay mabsog da.
16 Bindisyonak amin ay amagen di papadi sin isna
et ibogaw din ipogaw di ragsak da.
17 Awni et dotokak sin polin David di esa
ta manturay si eng-enggana.
18 Dadlonak abaken din mangonkontra en sisya,
et kaman dan maomas si palalo ay bain da,
ngem sisya pay, mankoniniing di korona na,
et madayaw ya somiged din turay na.”
*132:7 Din Baol di Tolagan et simbolon di tronon Diyos isnan daga.
†132:11 Din inkarin Diyos en David et madtengan sin 2 Samuel 7:12-16.