Salmo.
10.
Ay Diyos, apay nga omaddawi kan dakami? Apay nga mantabon ka sin timpon di ligat mi? 
Nangato di nemnem di ipogaw ay lawa, din kakkaasi yan palpaligaten da. Sapay koma ta makna da sin bito ay inamag da. 
Tan din mangam-amag si lawa ya mangamgamgam si baken dan oka et it-it-ek da din kabaelan da ay manongpal sin layden da. Sigaan daka ay Diyos ya palawlawaen das sik-a. 
Gapo sin kinangaton di nemnem da, adi da pagan-anos sik-a, tan magay lugar mo ay Diyos sin nemnem da. 
Matongpal din layden da sin am-in ay amagen da, ngem din pangokomam yan naligat ay maawatan da, laslasoyen da am-in din kalaban da. 
Kanan das nemnem da en maga polos di panligatan da ono mapasamak ay lawa en daida. 
Makabaos ya makaetek da. Eg-egyaten da abe din iib-a da ya nalaka ay mankali das kinekedse ya lawa. 
Sin asag-en di ili yan mantabon da ta manseed das peslen da, olay magay gapo na. 
Maiarig das layon ay man-eset ay mantabon, ta din kakkaasi yan en da depapen. Manganop di esa ay kaiarigan da, tan en da depapen din magay kabaelan da ay makna sin tagdey da. 
Gapo sin panakabalin da, din kakkaasi et abaken da. 
Kanan das nemnem da, “Adi pagan-anon Diyos din napasamak isna, tan nandokog et adi omila.” 
Dosaem koma ay Diyos dana ay mangam-amag si lawa, adi ka baybay-an din palpaligaten da. 
Magay rispito dan sik-a din mangam-amag si lawa, tan kanan das nemnem da en adi ka dosaen daida. 
Ngem katet-ewa na, iilaem din ligat di palpaligaten da, et nakasagana ka ay mamadang en daida, tan sik-ay pankamangan di kakkaasi ya naolila. 
Pakapsotem koma din mangam-amag si lawa, estem ay dosaen daida enggana ay ikaro da am-in ay basol da. 
Sik-a ay Diyos, magay patinggan di panturayam, ngem din manaydayaw si didiyosen, maponas da isnan ili ay dagam. 
Dengngem din kararag di kakkaasi et papigsaem din nemnem da. 
Ikalintegam di kakkaasi ya naolila ta magay ipogaw ay mangeg-egyat si iib-a da.