Salmo.
34.
Man-iyamanak en Diyos si am-in ay timpo, kanayon ay sisya di idaydayaw ko. 
It-ek ko gapo sin kinasiged na. Amin koma ay nabibiteg ya napakombaba et dengngen da ya manragsak da. 
Maitapi kayon sak-en ta man-es-esa tako ay mamigbig sin kinangaton Diyos Apo. 
Nankararagak en Diyos yan sinongbatana, din amin ay pan-egyatak et kinaana. 
Din mantalek en sisya et maragsakan da, adi da polos madismaya. 
Nankedaw nan kaseseg-ang ay ipogaw si badang na et insalakana sin amin ay ligat na. 
Bantayan din anghel Diyos din mangipateg en sisya et isalakana si daida. 
Padasen yo si Diyos ta maammoan yo din kinasiged na. Nagasat din komamang en sisya. 
Patgen yo si Diyos, dakayo ay ipogaw na, tan din mangipateg en sisya et wada amin di kasapolana. 
Olay din layon yan madagaangan da tan mankolang das kanen da, ngem din ipogaw ay si Diyos di kamangen da et maga di pankolangan da. 
Dengngen yo ay an-ak ko ta itdoak dakayo ay mangipateg en Diyos Apo. 
Sino en dakayo di manglayad ay matagotago ta kagkagam-is ay biyag di ganasen yo? 
Addawian yo ngarud ay mankali si etek ya lawa. 
Dokogan yo din lawa ta din siged di amagen yo koma. Ipakat yo abe di kabaelan yo ay makiolnos si iib-a yo. 
Din nalinteg et bantayan Diyos daida ya dengngena din kararag da. 
Ngem kontraena din man-am-amag si lawa et ponasena amin ay kanemneman da. 
Dengngen Diyos mo mankedaw da din nalinteg si badang na et isalakana sin amin ay ligat da. 
Asag-en si Diyos sin madisdismaya, isalakana din maawanan si namnama. 
Din ipogaw Diyos et ad-adoy kapaligatana, ngem ilisin Diyos sin amin ay ligat na. 
Ayowanan Diyos din ipogaw ay sana, magay magpong si olay esay tong-a na. 
Din am-amagen di lawa di nemnem na et say begew si kateyana. Din mangiliget abe si nalinteg et madosa da. 
Isalakan Diyos din mansilsilbi en sisya, maga polos di madosa ay komamang en sisya.