Salmo.
44.
Apo, dinnge mi ay mismo din dad-at di ap-apo, ay din en ka inamag sin timpo da ed bayag. 
Babaen sin panakabalin mo, din nanasyon yan inpakaan mo, et sin ili da, insaad mo din ipogaw mo. Din nanasyon yan pinaligat mo, ngem inpasiged mo din biyag di ipogaw mo. 
Baken babaen si kampilan ya bikas da di nangabakan ya nangokaan da sin ili ay sana, mo adi et din panakabalin ya seg-ang mo en daida, tan nilayad mos daida. 
Sik-a din arik ya Diyos ko, nangabakem din polin Jacob ay ipogaw mo. 
Tinokang min kalaban mi gapo sin panakabalin mo, in-gatigatin mi gapo sin panakabalin di ngadan mo. 
Adiak mantalek sin kampilan ya panak para sin kaisalakanak, 
tan sik-a di nangisalakan en dakami sin kalaban mi, sik-a di nangabak sin mangililiget en dakami. 
Kanayon ay daydayawen mis sik-a ya man-iyaman kami si eng-enggana. 
Ngem nay ed wani, dinokogam dakami, inpalobos mo ay omabak din kalaban mi, yan adi kan ipango din sosoldado mi. 
Inpalobos mo ay itagtagan mi din kalaban mi, ya pinos da din sanikwa mi. 
Binay-am ay peslen das dakami ay kaman karnero ay mapalti ya pansisianen das dakami ay iey sin kailiili. 
Nalaka di nangilakom sin ipogaw mo, maga di magon-od mo. 
Inilan di nanasyon sin sag-en mi din inamag mon dakami et laslasoyen das dakami. 
Nanbalinem dakami ay sis-iyekan di odom ay ili, manwegweg da ay mangoy-oyaw en dakami. 
Kanayon ay maoy-oyawak et palalo ay mabmabainak 
sin dengngek ay oyaw ya insolto ay ibagbagan di omililiget ay kalaban ko. 
Napasamak en dakami amin dana olay adi mi nilinglingan sik-a. Maga met di nilabsing mi sin intolag mo en dakami. 
Adi mi met dinokogan sik-a, Apo, tinongtongpal mi din bilin mo. 
Ngem olay mo siya di, yan binaybay-am dakami sin lugar ay pantean di mankaaangat ay animal. Dakami yan en ka binaybay-an sin kabolingetan ay kad-an. 
Mo dinokogan mi komas sik-a ay Diyos mi ya nankararag kami si didiyosen di odom ay ili, 
sigurado ay naammoam tan ammom di nemnem mi. 
Ngem begew met en sik-a, kanayon ay pese di sangsangoen mi, kaman kamin karnero ay dandani ay mapalti. 
Apo, bomangon ka! Apay nga maseseyep ka? 
Sinoy gapo ay nandokogam dakami? Ilaem koma nan pamalpaligatan dan dakami. 
Tan naabak ya naibabain kami, sin tapok yan naipabaktad kami. 
Omali ka ay bomadang, Apo, Omisalakan ka gapo sin adi manbalbaliw ay layad mo.