Salmo.
63.
Peteg di iliw ko en sik-a, Yahweh ay Diyos ko. Sin am-in ay biyag ko et sik-an inan-anap ko. Kamanak namgaan ay lota ay siyat masibogan, din ab-abiik ko et masapol nay kawadam. 
Mailak komas sik-a sin oneg di Timplo ta ilaek din panakabalin ya kinadiyos mo. 
Din adi manbalbaliw ay layad mo et nabanbanol mo din mismo ay biyag ko, isonga ikankantak din dayaw mo. 
Idaydayaw kos sik-a engganay mapap-eng di biyag ko, kankanayon ay ikakayang kon takkay ko ay mankararagak en sik-a ay Apo. 
Napnenapnekak ay kaman din nangan si kosto, naragsakak ay mangidaydayaw en sik-a ay Diyos ko. 
Mo pay ta sin labi et ibakbaktad ko, enggana sin mapat-a et wada ka sin nemnem ko. 
Tan kankanayon ay wada ka ay binmadbadang, et kamanak kiyap ay sinasakokoan di oboan, isonga naragsakak ay mangikanta si inyat mo ay nangay-ayowan. 
Pomketak en sik-a, Apo, et ayowanam sak-en sin panakabalin mo. 
Din pay mamadpadas ay mamse en sak-en, awni et maitapi da sin kad-an di natey ed dallem. 
Sin gobatan et matey da, et kanen di atap ay aso din bangkay da. 
Manragsak din ari tan nangabaken Diyos sisya. Makiragsak abe din iib-a na ay mansapata sin ngadan Diyos ed daya, ngem din makaetek ay ipogaw et maipaginek da.