Salmo.
70.
Apo Diyos, omisalakan ka koma, dalasem ta bomadang ka. 
Sapay koma ta maabak ya maibabain das palalo din manpanggep isnan biyag ko ya malaydan sin ligat ko. 
Din lomaslasoy, maibabain da koma begew sin kaabakan da. 
Ngem din mankamang en sik-a, sapay koma ta naragsak da. Amin ay man-iyaman sin panangisalakan mo, kanayon koma ay kanan da, “Nangatongato si Diyos Apo.” 
Kaseseg-angak ay nabiteg kayman, dalasem koma ay Diyos ay bomadang, sik-ay omisalakan.