Salmo.
71.
Sik-a ay Diyos di pankamangak, adim kod polos ipalobos ay maibabainak. 
Bomadang ka tan nalinteg ka, dengngem kod adawag ko ta omisalakan ka. 
Maiarig kas makneg ay bato ay pantabonak ay kanayon ay pankamangak. Inkeddeng mo ay omisalakan ka, din pankamangak ya salaknib ko et sik-a. 
Diyos ko, omisalakan ka koma sin managbasol ay magay seg-ang da ya mangam-amag si lawa. 
Tan sik-a, Kangatoan ay Diyos, di pannamnamaak, manipod kakitkittoy ko, sik-ay nantaltalkak. 
Sik-a di nantalkak sin intiro ay biyag ko, manipod naianakak sik-ay salaknib ko, idaydayaw kos sik-a si amin ay timpo. 
Ad-adoy masmasdaaw sin biyag ko, ngem sik-ay napigsa ay salaknib ko. 
Maninsin-agew ay idaddad-at ko din kaidaydayawam ya kinangatom, Apo. 
Adi ka koman bomaybay-an mo makayak, adi kan tomaytaynan mo komapsotak. 
Tan din kalaban ko yan mantotolag da, planoen da di pomsean da. 
Kanan da, “Enggay binaybay-an Diyos sisya. En tako depapen tan magay mangisalakan en sisya.” 
Apo, somag-en ka koma, dalasem ta bomadang ka. 
Din omipabpabasol et sapay koma ta madadael ya maibabain da. Malaslasoy da ya maabak da et koma din manpanggep ay pomaligat da. 
Mo sak-en pay, kanayon ay mannamnamaak en sik-a, masepsep ay idaydayaw kos sik-a. 
Idaddad-at kon to din siged ay inam-amag mo. Inag-agew ay dad-atek din panangisalakan mo, olay mo adiak maawatan ay kosto. 
Enak idaydayaw sik-a, Apo, gapo sin panakabalin mo. Dad-atek din kinalinteg mo, sik-a anggoy, magay odom, Apo. 
Initdoam sak-en manipod sin kakitkittoy ko, et kanayon ay indaddad-at ko din nakaskasdaaw ay inam-amag mo. 
Isonga olay naobananak si kinalakay ko, adi ka kod bomaybay-an, Apo. Komadkadwa ka ay Apo sin pangidad-atak si panakabalin mo sin amin ay maipolin to. 
Edasanad daya din kinalinteg mo, nakaskasdaaw din inamag mo, magay makaison sik-a, Apo. 
Inpawadam di problima ya ligat ko, ngem itaolim din bikas ko ya omisalakan ka sin pese, Apo. 
Masepsep ay ipangatom din dayaw ko ya pabikasem nemnem ko. 
Sik-a ay Diyos ko, mankantaak ya mantokarak si arpa ay mangidaydayaw en sik-a, tan napodno ka, nasantoan ay Diyos ay daydayawen di Israelita. 
Ipigsak din kantak ay mangidayaw en sik-a, naimposoan di iyat ko tan inmisalakan ka. 
Maninsin-agew ay idaddad-at ko din kinalinteg mo ay Apo, tan naibabain da ya en da naabak din nanpanggep ay pomaligat.