Salmo.
75.
Peteg di iyaman mi en sik-a, Apo! Dad-aten mi din panakabalin mo ya din nakaskasdaaw ay inam-amag mo. 
Kinwanim ay Apo, “Sin domtengan di inkeddeng ko ay timpo, sak-en ay mismo di mangokom si kostokosto. 
Mo maikiweg din daga ya manpayegpeg amin ay ipogaw sin labaw na, sak-en di makatengel sin tokod na. 
Dakayo ay mangam-amag si lawa ay mangit-it-ek si awak na, ibagak en dakayo ay adi yo ipapangato di nemnem yo, 
isaldeng yo ay mangit-it-ek si awak yo.” Say kinwanim di ay Apo. 
Tan magay mapos olay sino ay solin di lobong ay omali ay mangokom. 
Sik-a anggoy di way lebbeng na ay mangokom, waday ipababam, waday ipangatom. 
Iin-genam di tasa ay napnos arak ay palaloy ingel na. Ibokbok mo ta inomen di amin ay mangam-amag si lawa enggana ay abosen da. 
Ngem sak-en pay, sik-ay kanayon ay daddad-atek, mankantaak yan sik-ay daydayawek, sik-a ay Diyos ay dinaydayaw Jacob. 
Din panakabalin di mangam-amag si lawa yan abakem, ngem din nalinteg yan papigsaem.