Salmo.
99.
Manturay si Diyos et manpayegpeg din ipogaw si egyat da. Tinmotokdo sin trono na sin ngaton di napayakan ay paparsua yan manyegyeg din daga. 
Mabigbig di kinangaton Diyos ed Zion, iturayana am-in ay ipogaw isnan lobong. 
Amin ay ipogaw yan dayawen da din madaydayaw ya kaeegyat ay ngadana. Nasantoan sisya! 
Manakabalin ay ari sisya, din nalinteg di laylaydena. Initdo na ed Israel di kosto ay amagen da, initdoanas daida ta somiged di ogali da ya magay pabpaboran da. 
Si Yahweh ay Diyos tako, dayawen yos sisya, dayawen yo sin sangoanan di trono na. Nasantoan sisya! 
Da Moses en Aaron din papadi na, si Samuel di esa ay nankarkararag en sisya, nankararag dan sisya yan pinatgana. 
Sin natood ay liboo ay kad-ana, nakikali en daida. Tinongpal da din linteg ya bilbilina ay inbaga na en daida. 
Sinongbatan Yahweh ay Diyos din kararag da, inpaila na ay manangpakawan ay Diyos sisya, ngem dinosa na pay dedan si daida sin basol da. 
Si Yahweh ay Diyos tako, bigbigen yo din kinangato na, dayawen yos sisya sin nasantoan ay dontog na, tan si Yahweh ay Diyos tako, nasantoan sisya.