Salmo.
119.
Nagasat da din ipogaw ay magay maipabasol en daida, tan din kalin Diyos di on-onodan da. 
Nagasat da din manongtongpal sin intolag na ya mangipakat sin amin ay kabaelan da ay mansilbi en sisya. 
Adi dan man-am-amag si lawa mo adi et manbiyag da ay maikompas sin laydena. 
Apo, sik-a ay mismo et intogon mo ay patien mi ay kosto din bilbilin mo. 
Sapay koma ta ipapasnek ko ay mangonod sin linteg mo, 
tan magay kaibabainak mo tongpalek amin din bilbilin mo. 
Magay dowadowak ay manaydayaw en sik-a mo adalek ay kosto din inkeddeng mo ay magay kolang na. 
Tongpalek din linteg mo ay inbagam, isonga polos koma ay adi kan bomaybay-an. 
“Sino ngin di amagen di esa ay baro ta say nalinis din biyag na?” kanak sin nemnem ko. Din songbat na, “Masapol ay onodana din kalim ay inpaisolat mo.” 
Ipakat ko amin ay kabaelak ay mansilbi en sik-a, Apo, adim kod ipalobos ay omaddawiak sin bilbilin mo. 
Inigtok din nabanol ay kalim sin nemnem ko ta say adiak manbasol en sik-a, Apo. 
Daydayawek sik-a ay Apo, isonga itdom kod en sak-en din linteg mo. 
Laydelaydek ay ibaga sin gagait ko din inpaammom ay linteg mo. 
Dakdake di layad ko ay manongpal sin pamagbagam ay kaman din layad di ipogaw ay bomaknang. 
Kanayon ay nemnemnemek din bilbilin mo. 
Din linteg mo et say dadlonak panragsakan, din kalim et adiak polos linglingan ono baybay-an. 
Seg-angam ya badangam kod sak-en ay baam ta say matagoak ya onodak din pamagbagam. 
Silawam kod nan nemnem ko ta maawatak din nakaskasdaaw ay maadal sin linteg mo. 
Owat sinkaattikan di panbiyagak isnan daga isonga din bilbilin mo et ipaawat mo koma. 
Kanayon ay palalo din layad ko ay mangawat sin bilbilin mo. 
Yamyamam ya dosaem koma din mangipapangatos nemnem na, tan din linteg mo et dinokogan da. 
Adim kod ipalobos ay lomaslasoy ya omibabain da, tan inon-onodak sik-a. 
Din tuturay di ili et mantotolag da, tan panggep da ay mangamag en sak-en si lawa, ngem din kaimongsanan di nemnem ko et din inpaammom ay linteg mo. 
Maragsakanak ay mangad-adal sin intolag mo, tan say mangitdo en sak-en si kosto. 
Kamanak matmatey, dilikado di kasasaad ko, tongpalem koma din inkarim ta somiged kasin di biyag ko. 
Idi inbagak en sik-a din ligligat ko, sinongbatam din kararag ko, isonga itdom kod din linteg mo. 
Badangam kod sak-en ay mangawat sin bilbilin mo ta say nenemnemek din nakaskasdaaw ay inam-amag mo. 
Gapo ta say inkarim, papigsaem kod di nemnem ko, tan nay kinmapsotak si ladingit ko. 
Adi ka kod ipalobos ay man-amagak si baken kosto, maseg-ang ka ta itdom din kalim ay inpaisolat mo. 
Ninemnem ko ay sik-a di tongtongpalek, isonga din linteg mo et say nemnemnemek. 
Din intolag mo et banolek ya on-onodak, isonga adim kod ipalobos ay maibabainak. 
Silalayadak ay manongpal sin bilbilin mo, tan taptapiam din panang-awat ko. 
Ilawlawag mo kod en sak-en din linteg mo ta say imongsan ko din nemnem ko ya kanayon ay matongpal ko. 
Itdom en sak-en di amagek babaen sin linteg mo, tan say kad-an di ragsak ko. 
Idawat mo kod di layad ay manongpal sin linteg mo ta baken kinagamgam di wadas nemnem ko. 
Iturong mo kod sak-en ta adiak banolen di magay silbi na ya idawat mo di biyag ay tet-ewa sin pangon-onodak en sik-a. 
Din karim en sak-en ay baam et tongpalem koma, ay say inkarim sin amin ay mangipateg en sik-a. 
Din nakaskasdaaw ay ikeddeng mo di mangilisi en sak-en sin kaibabainak ay ieg-egyat ko. 
Laydelaydek ay tongpalen din bilbilin mo. Nalinteg ka isonga pabaroem kod nan biyag ko. 
Ipailam kod en sak-en san adi manbalbaliw ay layad mo ya omisalakan ka tan say inkarim, Apo, 
Et mo siya di, din lomaslasoy et mabalin ay songbatak, tan din karim et say pantalkak. 
Idawat mo kod di kabaelak ta kanayon koma ay din tet-ewa di ibagbagak, tan din kosto ay ikeddeng mo di pantalkak. 
Kanayon ay tongpalek din linteg mo enggana ay mapospos nan leng-ag ko. 
Nawayawayaanak sin ligligat ko, tan ipakat ko din kabaelak ay mangonod sin bilbilin mo. 
Olay sin sangoanan di aari ay nangato, adiak ibain ay mangibaga sin intolag mo. 
Gan-ganasek ay mangonod sin bilbilin mo ya siya abe sin linteg mo, tan siya da di banolek ya laydelaydek, kankanayon ay say nemnemnemek. 
Adi ka koman liw-an din inkarim en sak-en ay mansilbi en sik-a, tan say nangidawat en sak-en si namnama. 
Siya na di liwliwak sin ligat ko, tan din karim et say poon di biyag ko. 
Kanayon ay omoy-oyaw din nalalastog ay ipogaw, ngem adiak pay dedan inmaddawi sin inpaisolat mo ay kali. 
Mo nemnemek din inkeddeng mo ed nabaon, Apo, say tomalnaan ya pomigsaan di nemnem ko. 
Ngem palalo di bonget ko gapo sin makedse ay manokog sin inpaisolat mo. 
Din linteg mo di enak ikankanta isnan aptik ay biyag kos nan daga. 
Olay sin labi yan nemnemnemek sik-a, Apo, ya din kalim ay inpaisolat mo. 
Siya na di kanayon ay inam-amag ko, tinongtongpal ko din bilbilin mo. 
Sik-a ay Diyos anggoy di masapol ko, ikarik ay patiek din kalim ay inpaisolat mo. 
Napasnekak ay manpakaasi en sik-a, Apo, ta kedawek din inkarim ay seg-ang mo. 
Idi inadaadal ko din biyag ko, nanbabawiak et ikarik ay mangonod sin intolag mo. 
Tongpalek ay dagos din bilbilin mo. 
Nan-isagana din managbasol si enak kadadaelan, ngem din kalim et adiak liw-an. 
Bomangonak sin gawan di labi ay mandayaw en sik-a, Apo, tan di iyat mo ay mangokom et kostokosto. 
Makikadwaak sin amin ay mangipateg en sik-a ay din bilbilin mo di on-onodan da. 
Mailas nan daga sin amin ay disso din adi manbalbaliw ay layad mo, Apo. Itdom kod en sak-en din linteg mo. 
Din karim en sak-en et tinongtongpal mo, tan bininbindisyonam sak-en ay bag-en mo. 
Kedawek en sik-a di sirib ya laing ko ay mannemnem ya mangamag si kosto, tan mantalekak sin bilbilin mo. 
Ed idi, kanayon ay masangsangawak, et dinosam sak-en ta say manpakombabaak, ngem ed wani, din kalim di on-onodak. 
Siged ka et siged amin ay am-amagem, itdom kod linteg mo en sak-en. 
Domadael ya omipalawlawa din mangit-it-ek si awak da, ngem ipakat ko amin ay kabaelak ta din bilbilin mo di onodak. 
Din kalim, adi da maawatan, ngem sak-en pay et say enak panragsakan. 
Pansigdak din dosa ay indawat mo, tan begew isdi, maawatak din linteg mo. 
Nabanbanol en sak-en din en ka initdo, mo din balitok ya palata ay kalibolibo. 
Pinarsuam ya inayowanam sak-en si kosto, isonga idawat mo kod di laing ko ay mangawat sin bilbilin mo. 
Omila din mangipatpateg en sik-a. Gapo ta mantalekak sin karim, malaydan da. 
Ammok ay nalinteg din inkeddeng mo, isonga din panosdosaam en sak-en et kosto. 
Liwliwaem komas sak-en sin adi manbalbaliw ay layad mo ay kaman din inkarim en sak-en ay bag-en mo. 
Maseg-ang ka kod ta ganasek nan biyag ko, tan say panragsakak din kalim ay inpaisolat mo. 
Maibabain da koma din mangipangpangato si awak da gapo sin ipabasbasol dan sak-en ay baken tet-ewa, tan mo sak-en pay et ipapasnek ko ay nemnemnemen din bilbilin mo. 
Naey abe di pamagbaga sin am-in ay mangipateg en sik-a: omali da koma en sak-en ay manpaitdo ta say adalen da din intolag mo. 
Sapay koma ta ipakat kon kabaelak ay manongpal sin linteg mo ay magay pankolangak ta mailisiak si kaibabainak. 
Nabayag ay sinsin-ed ko din omisalakanam, ngem din karim di pantalkak pay dedan. 
Din panongpalam sin karim, nabayag ay sinsin-ed ko. “Pig-an ngin ay omisalakan ka?” siya say salodsod ko. 
Maiarigak si magay silbi na ay lalat ay nakpit ya napagitan, ngem din linteg mo et adiak nilinglingan. 
Sak-en ay baam, intoy kabayag di panseedak? Pig-an pay ay dosaem din pomalpaligat? 
Din nalastog ay ipogaw ay manigaan sin linteg mo et kaman dan nankaot si bito ta mo maknaak ya madadael din dayaw ko. 
Da nan makaetek ay ipogaw, istay dan gagaraen nan biyag ko, ngem inpapatik pay dedan ay nanongtongpal sin bilbilin mo. Bomadang ka kod, sik-a ay Diyos ko, tan ibilang ko ay kostokosto san bilbilin mo. 
Gapo sin adi manbalbaliw ay layad mo, ipalobos mo kod ay adi masokpot di leng-ag ko ta waday iyat ko ay manongpal sin linteg mo. 
Din kalim ay Diyos et komakaman si eng-enggana, din kalim et adi mabalbaliwan ed daya. 
Matalek ka si eng-enggana. Nan insaad mo ay daga et komakaman sin kosto ay naisaadana. 
Wada engganad wani amin ay naparsua, tan say inkeddeng mo en daida, tan mansilbi da am-in en sik-a. 
Sigurado ay nateyak koma sin ligat ko mo baken say nanragsakak din linteg mo. 
Adiak polos liw-an din bilbilin mo, tan say inosal mo ay mangipabaro sin biyag ko. 
Omisalakan ka kod, tan sak-en di ipogaw mo, inamag koy kabaelak ay manongpal sin bilbilin mo. 
Manseseed da din makedse ta pap-engen dan biyag ko, ngem ipapasnek ko ay nemnemnemen din linteg mo. 
Nailak ay amin ay banag et way patingga na, ngem din linteg mo et maga. 
San kalim et laydelaydek, et inag-agew ay nemnemnemek. 
Manbalinak ay nalalaing mo din kalaban ko, tan kanayon ay nemnemnemek din bilbilin mo. 
Naon-oneg di pangawat ko mo din nankakay ya odom ay omit-itdo, tan kanayon ay ad-adalek ya tongtongpalek din linteg mo. 
Inaddawiak amin ay panbasolan tan din bilin mo et say laydek ay onodan. 
Adiak baybay-an din inkeddeng mo, tan sik-a ay mismo di omit-itdo. 
Din kalim et makaay-ayo di kadngeana, mam-is mo din anig di katamtamana. 
Lomaingak gapo sin bilbilin mo, isonga amin ay lawa ay ogali et kaliliget ko. 
Din kalim et kaman say silaw nan biyag ko, tan itdo na din amagek ay kosto. 
Tongpalek din insapatak, din nalinteg ay bilbilin mo et onodak. 
Sik-a ay Diyos, palalo nan ligat ko, tongpalem kod din inkarim ta isalakan mo nan biyag ko. 
Awatem kod ay Diyos nan kararag kon sik-a ay pandayaw ko ya itdom koma en sak-en din bilbilin mo. 
Kanayon ay ipospostak din biyag ko, ngem adiak nilinglingan din kalim ay inpaisolat mo. 
Nan-isagana da din managbasol si enak kadadaelan, ngem din bilbilin mo, adiak dinokdokogan. 
Din nabanol ay itdon di linteg mo, maiarig das komakaman ay tawid ko, daida di mangiparagsak isnan nemnem ko. 
Ninemnem ko ay tongpalen din linteg mo engganas pap-eng di biyag ko. 
Din nankadwa di pammati na et kalkaliget ko, ngem laylaydek pay din linteg mo. 
Sik-a di pankamangak ya salidak, din karim di pannamnamaak. 
Dakayo amin ay managbasol, komaan kayo, ta say tongpalek din bilbilin Diyos ko. 
Tomolong ka tan say inkarim ta manbiyagak, adim ipalobos ay madismayaak sin namnamak. 
Omitakkay ka ta magay pandanagak, ta kanayon ay din linteg mo di onodak. 
Am-in ay omaddawi sin linteg mo, sigaam si daida, tan magay silbin din sikap ya etek da. 
Basura am-in di lawlawa ay ipogaw sin pannemnem mo, say begew ay laylaydek din linteg mo. 
Begew en sik-a, palalo ay emegyatak, mo nemnemek din dosa ay ikeddeng mo, manpayegpegak. 
Say inamag ko din nalinteg ya kosto, adi ka kod bomaybay-an sin kalaban ko. 
Inkarim ay badangam sak-en ay mansilsilbin sik-a, adim kod palobosan ay din mangipapangatos awak da yan pomaligat da. 
Nabbay nan matak ay manseseed sin panangisalakan mo ta matongpal din inkarim, Apo. 
Ipailam koman sak-en din adi manbalbaliw ay layad mo ya itdom din linteg mo. 
Mansilbiak en sik-a, Apo, isonga ipaawat mo koma din intolag mo. 
Timpo na ay man-gonay ka, Apo, tan adi da tongtongpalen din linteg mo. 
Din pananglayad ko sin linteg mo yan nasursurok mo din layad ko si kanginaan ay balitok. 
Isonga onodak amin ay bilbilin mo, amin ay lawa yan kaliliget ko. 
Sigesiged din intolag mo, isonga ipakat ko amin ay kabaelak ta matongpal ko. 
Mo waday mangilawag sin kalim sin magay ammo na, kaman silaw ay mangipalaing en daida. 
Kaman bigaw si danom din layad ko ay mangammo sin linteg mo. 
Dengngem kod sak-en ya maseg-ang ka, tan say iyat mo sin amin ay manglaylayad en sik-a. 
Tongpalem koma din karim ta omayowan ka, ya adi ka ipalobos ay omituray din lawa. 
Omisalakan ka kod sin mamalpaligat en sak-en ta say din bilbilin mo et mabalin ay enak tongpalen. 
Maseg-ang ka en sak-en ay bag-en mo ta say itdom din linteg mo. 
Kaman ginawang nan lowak begew si sakit di nemnem ko, tan adi tongpalen di ipogaw din linteg mo. 
Nalinteg ka ay Diyos et siya abe sin ikeddeng mo. 
Kostokosto din linteg mo. 
Palalo nan bonget ko, tan adi ikaskason din kalaban ko din linteg mo. 
Laylaydek din karim en sak-en, tan sigurado ay en ka tongpalen. 
Nababaak ya maga di bilang ko, ngem adiak liw-an din bilbilin mo. 
Nalinteg ka si eng-enggana, ya din kalim et dadlon tet-ewa. 
Palalo di problemak ya ligat ko, ngem say panragsakak din bilbilin mo. 
Kosto si eng-enggana din intolag mo, tapiam kod din pangawat ko ta way iyat ko ay matago. 
Naimposoan ay mankararagak en sik-a, Apo, patgam koma et patiek din bilbilin mo. 
Man-adawagak en sik-a ay mankedaw si badang mo, omisalakan ka ta tongpalek din intolag mo. 
Daan pomat-a yan bomangonak ay mankararag, din kalim di pantaltalkak. 
Maninsinlabi ay adiak maseyseyep ta say din karim di nemnemnemek. 
Patgam koma din kararag ko gapo sin adi manbalbaliw ay layad mo. Isalakan mo koma nan biyag ko babaen sin nalinteg ay ikeddeng mo. 
Din makedse ay pomaligat yan somag-en dan sak-en, din linteg mo yan polos ay adi da tongpalen. 
Ngem asag-en ka en sak-en, Apo, ya pag tet-ewa din bilbilin mo. 
Sin intolag mo, nabayag ay enak naammoan ay insaad mo ta magay pap-eng na ya komakaman. 
Ilaem nan ligat ko ta en ka omisalakan, tan din bilbilin mo yan adiak nilinglingan. 
Sapay koma ta ikalintegam sak-en ya somalaknib ka, tongpalem koma din karim ta omisalakan ka. 
Adi maisalakan din mangam-amag si lawa, tan din linteg mo yan dinokogan da. 
Dakdake din seg-ang mo, Apo, isalakan mo koma nan biyag ko babaen sin nalinteg ay ikeddeng mo. 
Ad-ado di pomalpaligat ya kalaban ko, ngem adiak liwayan ay mantongpal sin intolag mo. 
Malmaligetak ay mangila sin baken napodno, tan adi da tongpalen din bilbilin mo. 
Ilaem mo kas-anoy pananglayad ko sin linteg mo, omisalakan ka gapo sin adi manbalbaliw ay layad mo. 
Tet-ewa amin din kalim, Apo, komakaman si eng-enggana amin din nalinteg ay inkeddeng mo. 
Pomaligat di tuturay olay mo magay gapo, ngem say egyatak anggoy din kalim, Apo. 
Begew sin karim enak maragsakan, kaman ragsak di nakadteng si dakdake ay kinabaknang. 
Kaliliget ko amin ay etek, ngem din linteg mo et laylaydek. 
Mamin pito si esay agew ay man-iyamanak, Apo, gapo sin nalinteg ay inkeddeng mo. 
Din manglaylayad si linteg mo yan mayat ya natalna di biyag da, maga polos di kaisokbaan da. 
Sedsed-ek ay omisalakan ka, Apo, ya tongtongpalek din bilbilin mo. 
Say onodak din intolag mo, tan peteg ay laylaydek, Apo. 
Amin ay linteg ya bilbilin mo yan tongpalek, tan iilaem amin din am-amagek. 
Sapay koma ta omdas en sik-a din kararag ko, gapo ta inkarim, lawlawagam nan nemnem ko. 
Dengngem kod nan adawag ko ta omisalakan ka, tan say inkarim, Apo. 
Kanayon ay idaydayaw kos sik-a tan itdom din linteg mo. 
Din maipanggep sin kalim yan ikantak to, tan kosto amin ay bilbilin mo. 
Nakasagana ka koma ay somalaknib, Apo, tan on-onodak din bilbilin mo. 
Sedsed-ek din panangisalakan mo, maragsakanak sin linteg mo. 
Ipalobos mo koma ay enak matago ta way iyat ko ay mangdayaw en sik-a, Apo. Sapay koma ta makatolong en sak-en din bilbilin mo. 
Nasangawak ay kaman nalitaw ay karnero, anapem komas sak-en ay mansilsilbin sik-a, Apo, tan adiak linglinglingan din bilbilin mo.