Salmo.
141.
Apo, mankararagak en sik-a, dalasem koma ta bomadang ka, dengngem kod mo mankararagak en sik-a. 
Awatem koma nan kararag ko ay kaman manseng-ew ay insinso ya kaman daton sin labi din itatag-ay ko ay takkay ko. 
Bomadang ka kod, Apo, ta annadak din tepek ko. 
Bomadang ka koma ta adiak masolisog ay mangamag si lawa ono makikadwa sin am-amagen di laway nemnem da ya adiak makikan sin fiesta da. 
Mabalin ay domosa ya bomagbaga din nalinteg gapo sin seg-ang da. Ngem adiak polos awaten din panangidayaw di makedse ay ipogaw, tan kanayon ay ikararag ko di maikontra sin lawa ay am-amagen da. 
Bigbigen to din kaipoipogaw ay tet-ewa din enak inbaga mo maitep-a sin deppas din tuturay da. 
Maiwalang din tong-a da sin labaw di kaot da, namekmek ay bato di kaiarigan da. 
Ngem sik-a, Yahweh ay Apok, di kanayon ay pantalkak, adi ka kod bomaybay-an, tan sik-a di pankamangak. 
Omilisi ka koma sin tagdey ay in-amag da, in-amag di laway nemnem da. 
Makna da koma sin mismo ay tagdey da, ngem sak-en pay yan mailisiak koma.