Isaias. 7. Wada kasin di inpaammon Diyos en Ahaz ay kanana, “Mankedaw ka en Yahweh ay Diyos mo si pangilasinan ay temet-ewa din inkarin Diyos. Mabalin ay olay sino di kedawem ay sinyal, olay mapo ed dallem ay kad-an di natey ono mapod langit.” Ngem kanan Ahaz, “Aga, sigaak ay mamadas en Diyos.” Pag kanan Isaias en da Ahaz, “Dengngen yo ay polin David: Ay adi kayo pay laeng mapnek sin pamadpadasan yo si anos di ipogaw? Ay olay si Diyos ay pansilsilbiak yan padasen yo din anos na sin panigaan yo ay mankedaw? Isonga din Apo ay mismo di mangidawat si sinyal. Mawad-an din balasang et man-anak si lalaki ay ngadananas Immanuel. Mo madakdake ya enggay ammo na di am-amagena, gatas ya anig di kanena. Adi pay laeng domteng di ay timpo yan enggay magay man-ili sin iturayan di dowa ay ari ay egyatan yo. Ipalak-am Diyos di palalo ay ligat en sik-a, sin ipogaw mo ya sin intiro ay pamilyam, tan ibaa na din arin di Assyria. Din ligat ay nay yan nakarkaro mo din amin ay napasamak manipod sin naisianan di Israel ed Juda.”