Isaias.
12.
Sin doy ay timpo ay domteng to, kanan din ipogaw ay mangikanta: “Sik-a ay Diyos, idaydayaw kos sik-a, tan olay mo inmibonget ka, ngem nasokatan din bonget mos liwliwa. 
Sik-a ay Diyos di omisalakan, adiak emegyat tan sik-a di enak pantalkan. Tan sik-a di kapoan di panakabalin ya pigsak, ya begew en sik-a, naisalakanak.” 
Manragsak kayo sin pangisalakanan Diyos Apo ay kaman din ragsak di manbigaw ay manakdo. 
Mo domteng di ay timpo et kanan yo, “Idaydayaw yo si Diyos ya manpatolong kayo. Dad-aten yo sin amin ay nasyon din inamag na ya ipaammo yo din kinangato na. 
Mankanta kayo ay mangidayaw en sisya gapo sin nakaskasdaaw ay inam-amag na. Ipaammo yo sin intiro ay daga. 
Dakayo ay Israelita, manbogaw ya mankanta kayo ay man-ili ed Zion gapo sin ragsak yo. Tan nangato din nasantoan ay Diyos yo yan wada sin kad-an yo.”