Isaias.
25.
Apo Yahweh, sik-a din Diyos ko, ipangatok ya idaydayaw ko din ngadan mo. Tan nakaskasdaaw din inam-amag mo, matalek ka et din planom ed bayag yan tinongpal mo. 
Dinadael mo din dadakke ya naaladan ay kailiili. Din siyodad ay insaad di mangili et madadael ay adi polos maitaoli. 
Isonga din nanasyon ay makedse ya napipigsa et idaydayaw ya egyatan daka. 
Din nabiteg ya kakkaasi, sik-a di pankamangan da. Sin pewek, sik-ay manalaknib en daida, sin podot di segit, sik-ay panlidoman da. Din natangsit ay ipogaw et kaman pewek ay napigsa 
ya kaman aben atong di namgaan ay daga. Ngem sik-a ay Apo, inpaginek mo din kalaban mi, inpaginek mo din bogaw di mangili. Kaman din iyat di liboo ay mangipaliteng sin kaagawan ay palalo ay man-atong. 
Sin tapin di agew, isaganan Diyos ay Kangatoan sin dontog ay Zion di esa ay ragragsak ay ad-ado di makan, makan ya arak ay kam-isan para sin amin ay nasyon. 
Kaanenan to sin dontog ay Zion din panladingitan ay kaman namabalkot si amin ay nasyon. 
Din pese et kaanenas eng-enggana. Ponasenan to am-in ay lowa. Kaanena din naibabainan di ipogaw na isnan intiro ay daga. Si Apo Diyos ay mismo di nangibaga isna. 
Sin isdi ay agew et kanan dan to, “Sisya din Diyos tako. Nantalek takon sisya et insalakanas datako. Manragsak tako ngarud sin nangisalakananan datako.”