MICAH
Di Beebaa Micah
Di haga modongoohia:
Soukohp Micah nogo mouli i di madagoaa o Isaiah, mee tangada mai i di waahale i Judah. Ana hagamaanadu e hai bolo tenua i bahi i ngaaga go Judah gaa tale gi di haingadaa gadoo be di haadanga balua dela ne haga modongoohia go soukohp Amos bolo gaa tale ang gi tenua go Israel i di baahi gi ngeia. Dimaadua ga hagaduadua nia daangada o Judah i tadinga la hua nadau huaidu. Gei i lodo nia helekai kokohp a Micah, mee e haga modongoohia humalia nia ada o di hagadagadagagee gi di madagoaa dela gaa dae mai.
Nia madagoaa hagalligi i golo ala belee hai gii mmada maalia ginai, e haga modongoohia di noho baba mo di aumaalia i lala di hiihai o Dimaadua (4.1-4), nia kokohp o di King aamua dela Tangada mai i di madawaawa David dela ga gaamai di noho baba gi tenua deelaa (5.2-5a), mo dahi gubu (6.8) e helekai haga damana i nia mee o nia soukohp o Israel ala belee helekai ai: “Deenei di mee Dimaadua e hiihai bolo gidaadou gi heia: Gidaadou gi heia di tonu, gi hai hegau gi di aloho donu, mo di haga puni anga gi tadau God i lodo di manawa hila gi lala.”
Di hagahonu di beebaa deenei:
Di hagi aga digau Israel mo Judah (1.1—3.12)
Di haga hoou mo di aumaalia (4.1—5.15)
Di haga iloo o di bule mo di hagadagadagagee (6.1—7.20)
1
1 I lodo di madagoaa o Jotham, Ahaz, mo Hezekiah nogo king i Judah, Dimaadua gaa wanga ana haga iloo aanei gi Micah tangada mai i di waahale go Moresheth. Dimaadua ga haga modongoohia nia mee huogodoo aanei gi mee i di hai o Samaria mo Jerusalem.* 2-Kings 15.32—16.20; 18.1—20.21; 2-Chronicles 27.1-7; 28.1—32.33
Taahili manawa gee i di hai o Samaria mo Jerusalem
2 Goodou go nia daangada o nia henua huogodoo,
goodou hagalongo.
Digau o henuailala huogodoo,
goodou hagalongo gi humalia.
Di Tagi go Yihowah ga helekai hai baahi adu gi goodou.
Goodou hagalongo!
Mee e helehelekai mai i dono hale daumaha i di langi.
3 Dimaadua le e hanimoi i dono lohongo dabu.
Mee ga haneia ga heehee i nia ulu
o nia gonduu o henuailala.
4 Nia gonduu ga waiwai i lala ono babaawae,
gadoo be nia kiliidi i lodo di ahi,
gaa hali gi lala gi mehanga gonduu,
gadoo be nia wai ala ma gaa llingi gi lala
i taalinga tama gonduu.
5 Nia mee aanei la gaa kila idimaa nia huaidu o digau Israel, mo nadau hai baahi ang gi God. Nia huaidu digau Israel le e dau gi di ai? Go Samaria, go di guongo dagi o Israel la hua! Gei di ma koai dela e daumaha ang gi nia balu ieidu i Judah? Go Jerusalem la hua! 6 Deelaa di mee a Dimaadua e helekai ai boloo, “Au gaa hai Samaria gii hai di hagabae geinga e dugu i lodo di anggowaa maalama, e hai di gowaa e dogi nia laagau ‘grape’. Au gaa hono nia hadu o di waahale deelaa gi lodo di gowaa i mehanga gonduu, ga diiagi di hagamau o di waahale labelaa, 7 gaa oho nia ada balu god huogodoo gi daha. Nia mee huogodoo ala ne wanga gi nia ahina huihui nadau huaidina i lodo nia hale daumaha i di waahale deelaa, la ga tuu huogodoo gi di ahi. Gei nia hagadilinga ada mee huogodoo gaa hai di hagabae geinga. Samaria ne kae nia mee aanei mai i dana hai daumaha o di hagadili ni nia daangada gi dogologo. Malaa, dolomeenei gei ono hagadaumee gaa kae nia mee aanei gi nia ahina ala e huihui nadau huaidina i lodo nia hale daumaha i nia gowaa ala i golo.”
8 Malaa, gei Micah ga helekai, “Deenei dagu mee dela e dangidangi iei au. Au e hiihai e haga modongoohia dogu manawa gee, gei au ga heehee deai ogu goloo ai, mo deai ogu suudi ai. Au ga heehee mo di wolowolo gadoo be di paana lodo geinga ‘jackal’, mo di dangidangi gadoo be di manu lodo geinga ‘ostrich’. 9 Nia magibala o Samaria le e deemee di hili, gei Judah le e hagaduadua labelaa beelaa. Di mooho guu dau i di ngudu di abaaba o Jerusalem, di gowaa dela e noho ai agu dama.”
Nia hagadaumee gu hoohoo mai gi Jerusalem
10 Goodou hudee heia tadau hagadaumee ala i Gath* Gath: Di ingoo deenei le e hai dono lee i telekai Hebrew boloo, “haga iloo” gi iloo bolo gidaadou gu magedaa. Hudee heia digaula gi gidee bolo goodou e tangitangi.
Goodou go digau o Beth-Ophrah,† Beth-Ophrah: Di ingoo deenei dono hadinga i nnelekai Hebrew boloo, “di hale o nia gelegele dogolia” goodou gi haga dagadaga i lodo nia gelegele dogolia e haga modongoohia ai godou lodo huaidu.
11 Goodou go digau Shaphir,‡ Shaphir: Di ingoo deenei dono hadinga i nnelekai Hebrew boloo, “haadanga lamalia” goodou ga lahi gi daha mo di godou guongo deenaa, deai godou goloo i godou gili ai, gei goodou gi langaadia.
Gei goodou go digau ala e noho i Zaanan,§ Zaanan: Di ingoo deenei le e hai dono lee i telekai Hebrew boloo, “hula gi daha” goodou hudee hula gi daha mo di godou guongo.
Di godou madagoaa ma ga longono goodou a Beth-Ezel** Beth-Ezel: Di ingoo deenei dono hadinga i nnelekai Hebrew boloo, “di hale i dono baahi” e dangidangi, gei goodou gu iloo hua bolo ma di gowaa e pala ginai i golo ai.
12 Digau Maroth†† Maroth: Di ingoo deenei le e hai dono lee i telekai Hebrew boloo, “mmala” le e tali di haga dagaloaha o di nadau haga mmaemmae, idimaa, Dimaadua la gu haga hoohoo mai nia haingadaa la gi Jerusalem.
13 Goodou ala e noho i Lachish‡‡ Lachish: Di ingoo deenei le e hai dono lee i telekai Hebrew boloo, “nia hoodo dogolua”, goodou hagatogomaalia ina nia hoodo la gi di gili o nia waga dauwa hongo henua. Goodou guu kabe nia huaidu digau Israel, guu hai Jerusalem gii doo gi lodo di hala.
14 Goodou go digau Judah, goodou gi haga aloho haga maewae ang gi di guongo go Moresheth-Gath.
Nia king o Israel gu deai nadau hagamaamaa mai baahi di guongo go Achzib§§ Achzib di ingoo deenei dono hadinga i nnelekai Hebrew boloo, “halahalau” ai.
15 Goodou go digau Mareshah,*** Mareshah di ingoo deenei le e hai dono lee i telekai Hebrew boloo, “kumi” Dimaadua gaa wanga goodou gi lodo nia lima o godou hagadaumee ala gaa kumi di godou guongo.
Nia dagi o Israel gaa llele gaa pala hagammuni i lodo di luwa i Adullam.
16 Goodou go digau Judah, godou libogo la gi dahia e hai ai di mee e haga manawa gee ai goodou gi godou dama ala e aloho ai. Holee godou libogo la gi maalali gadoo be nia ngogo, idimaa, godou dama la gaa lahi gi daha mo goodou.
*1.1: 2-Kings 15.32—16.20; 18.1—20.21; 2-Chronicles 27.1-7; 28.1—32.33
*1.10: Gath: Di ingoo deenei le e hai dono lee i telekai Hebrew boloo, “haga iloo”
†1.10: Beth-Ophrah: Di ingoo deenei dono hadinga i nnelekai Hebrew boloo, “di hale o nia gelegele dogolia”
‡1.11: Shaphir: Di ingoo deenei dono hadinga i nnelekai Hebrew boloo, “haadanga lamalia”
§1.11: Zaanan: Di ingoo deenei le e hai dono lee i telekai Hebrew boloo, “hula gi daha”
**1.11: Beth-Ezel: Di ingoo deenei dono hadinga i nnelekai Hebrew boloo, “di hale i dono baahi”
††1.12: Maroth: Di ingoo deenei le e hai dono lee i telekai Hebrew boloo, “mmala”
‡‡1.13: Lachish: Di ingoo deenei le e hai dono lee i telekai Hebrew boloo, “nia hoodo dogolua”
§§1.14: Achzib di ingoo deenei dono hadinga i nnelekai Hebrew boloo, “halahalau”
***1.15: Mareshah di ingoo deenei le e hai dono lee i telekai Hebrew boloo, “kumi”