Job.
11.
Zophar tangada Naamah ga helekai boloo: 
“E hai behee, deai dahi dangada e mee di helekai anga gi nia helekai balumee aanaa ai? Nnagadilinga helekai e logo beenaa le e mee di hai goe gii donu? 
Job, goe e hagamaanadu bolo gimaadou e deemee di helekai anga gi au helekai? Goe e hagamaanadu bolo au helekai balumee gaa hai gimaadou gii noho deemuu? 
Goe bolo au helekai le e donu, gei goe e hai bolo goe e madammaa hua i mua nnadumada o God. 
Au bolo gi gidee hualaa God dela ma ga helekai adu gi di goe! 
Mee ga hagi adu gi di goe i nia hagadilinga e logo i di hai o di iloo mee, gei nia mee labelaa i golo ala e deemee i baahi o nia daangada. God e hagaduadua goe hagabalua i nia mee ala e tau adu gi di goe. 
“Goe e mee di modongoohia e goe di hagaodi mo di geinga o di aamua mo di mogobuna o God? 
Deai di hagageinga i di langi ang gi God ai, goe e deiloo e goe tagageinga deelaa. God e iloo Ia tenua o digau mmade, gei goe e deiloo e goe tenua deelaa. 
Di aamua o God la koia e damanaiee i henuailala, e koia e palaha i di moana. 
Maa God gaa lahi goe gi di gowaa hai gabunga, ko ai e mee di dugu a Mee? 
God e iloo Ia be ma ko ai dela e balumee. Mee e gidee Ia nadau haihai huaidu huogodoo. 
Digau dadaulia ga daamada ga kabemee i di madagoaa o nia ‘donkey’ lodo geinga ala ga haanau gaidala. 
“Job, huluhia oo lodo gii donu, huli anga gi God. 
Kilia nia mee huaidu gi daha mo doo hale. 
Huli gi digau o henuailala i di lodo maaloo mo di maudangihi. 
Gei o haingadaa gaa mmaa gi daha mo au hagamamaanadu, e hai gadoo be di labagee dela ma ga hagalee, gei deai tangada e langahia eia dahi mee ai. 
Gei do mouli la ga maalama gadoo be di maalama o di laa i di oodee, gei di bouli o do mouli la ga maalama gadoo be di maalama o di heniheni. 
Gei goe ga dagaloaha i nia haingadaa, gaa noho i di hagadagadagagee. God ga benebene laa goe gaa hai goe gi molooloo. 
Goe ga deai do madagu i o hagadaumee ai. Digau dogologo ga tangi adu gi di goe i di hagamaamaa. 
Gei digau huaidu la ga hilahila gi daha i nadau uli nadau gai, gu iloo ang gi ginaadou bolo ma gu deai di gowaa i golo e dagaloaha ginaadou ai. Di mee hua e dahi dela e iloo ginaadou la go di made dela ga dau mai.”