Job.
16.
Gei Job ga helekai anga, 
“Au gu longono nia helekai aanaa i mua, gei godou helekai haga manawa lamalia ala ne hai mai gi di au, la gu hai hua di mee e mmae mai gi di au. 
Goodou ga helehelekai ga hana hua beelaa? Godou helekai le deai ono hagaodi ai? 
Maa nei bolo goodou ne noho i dogu lohongo, gei au gaa noho i godou lohongo, malaa, au e mee di helekai i nia mee huogodoo ala e helehelekai ai goodou. Au e mee di lialiagi dogu libogo gadoo be tangada kabemee mo di leelee logo adu gi goodou. 
Au e mee di haga maaloo aga goodou gi agu helekai aago, mo di haihai agu helekai haga tenetene adu gi goodou. 
“Gei agu helekai le e deemee di hai nia helekai hagamaamaa, gei dogu noho deemuu le e deemee di hagahili dogu mmae. 
Meenei God, Goe gu hagadugina mai gi di au. Goe gu daaligi digau o dogu hale huogodoo gii mmade. 
Goe guu kumi au, Goe go dogu hagadaumee. Ogu iwi mo dogu gili ala e dubu i golo, gei nia daangada guu hai di maa bolo di mee e hagamodongoohia ai ogu huaidu. 
“God e hagihagi dogu huaidina la gi mooho i dono hagawelewele, ge e daumada mai au haga huaidu. 
Nia daangada e hai daagala mai gi di au. Digaula gu haganiga au gi nadau lodo mo di paapaa ogu golomada. 
God guu dugu au gi lodo nia lima o digau huaidu. 
I mua gei au nogo mouli i di aumaalia, gei God guu llomi dogu uwa, gu hagamaawa au, mo di hai au haga huaidu. God guu hai au be di gowaa e hagamada hagabaeha, 
mo di puu mai ana amu maalei mai i nia gowaa huogodoo, nia amu ala gaa dau i di au le e haga huaidu au, gei deai dono aloho i di au ai. 
Mee gu haga huaidu au haga logowaahee. Mee ga puu mai au gadoo be tangada dauwa dela gu dadaulia hua i dono hagawelewele. 
“Gei au e dangi wawe gei e ulu ogu goloo lodo huaidu, gaa noho gi lala i lodo nia gelegele pigi. 
Au gu dangidangi gaa dae loo gi ogu golomada guu mmee, gu haga hula gei gu luuli i nia daalinga ogu golomada. 
Gei au deai ogu huaidu i di hai huaidu ai, gei agu hai dalodalo gi God le e donu huoloo. 
“Henuailala, goe hudee hagammuni ina nia huaidu ala ne hai mai gi di au! Goe hudee dumaalia gi dogu lee dela e hai ang gi di gowaa hai gabunga gii noho deemuu! 
Gei au e iloo bolo ma tangada i golo i di langi dela e madalia au e hagamaamaa mai au. 
Ogu ihoo hagaaloho e hai dadaagala mai gi di au. Ogu golomada e halidangi ang gi God. 
Au e hiihai bolo tangada gi hagamaamaa ina mai au gi God, gadoo be tangada ma ga madau di hagamaamaa gi dono ehoo hagaaloho. 
Ogu ngadau gu hagadau gi muli, gei au e heehee i di ala dela deai tangada e mee di hana gi muli ai.