Psalm.
146.
Goodou gi hagaamuina Dimaadua! Dogu hagataalunga nei, hagaamuina Dimaadua! 
Au ga hagahagaamu a God i di waalooloo o dogu mouli, gei au ga daahili ang gi dogu God i di waalooloo o dogu mouli. 
Goodou hudee hagadagadagagee gi digau aamua i henuailala, be tei dangada hua dela e deemee di haga dagaloaha goodou. 
Idimaa, digaula gaa mmade gei digaula guu hai hua nia gelegele, gei nadau mee ala bolo gi heia hogi, gu hagaodi i di laangi hua deelaa. 
E maluagina go tangada dela ma ga hagamaamaa go di God o Jacob. E maluagina go tangada dela e hagadagadagagee gi Dimaadua dela go dono God, 
dela ne hai di langi mo henuailala mo di moana mo nadau hagahonu huogodoo. Mee e haga gila aga ana hagababa i nia madagoaa huogodoo. 
Mee e haga gila aga nia donu o digau huogodoo ala guu noho i lala di hagaduadua, gei e haangai digau huogodoo ala gu hiigai. Dimaadua e haga dagaloaha digau ala guu noho i lodo di lawalawa, 
gei e huge nia golomada o digau ala gu dee gida. Mee e haga mahi aga digau huogodoo ala gu delouaa. Gei mee hogi e aloho i digau ala e donu. 
Mee e madamada humalia i digau mai daha ala e noho gainga i lodo tadau henua, gei Mee e hagamaamaa nia ahina ala guu mmade nadau lodo mo nia dama ala guu mmade nadau maadua, gei e hagahuaidu nia hagatataele o digau huaidu. 
Dimaadua la go di King gaa hana hua beelaa! Zion, doo God dela gaa dagi gaa hana hua beelaa! Hagaamuina Dimaadua!