8
Ri ru-trato ri Dios vacami, ja ri Jesucristo nichojmirisan
1 Ri nikajo' nikabij, chi queri' ri Kanimalej Sacerdote, ri tz'uyul chila' chicaj pa rajquik'a' ri nimalej Dios. 2 Y nisamej chila' chicaj acuchi c'o-vi ri Dios, chiri' chupan ri kitzij rachoch ri Dios, ri banon roma ri Dios y man coma ta ri vinek. 3 Vave' chuvech re ruvach'ulef ri nimalej tak sacerdotes yequisuj chicop y ch'aka' chic cosas chire ri Dios. Ja samaj ri' ri yo'on chique richin niquiben. Y romari' ri Jesús chuka' xc'atzin chi c'o xusuj chire ri Dios, roma rija' jun Nimalej Sacerdote. 4 Y vi ta rija' c'o ta chuvech re ruvach'ulef, ni ta xa samaj richin jun choj sacerdote ri nitiquir ta nuben, roma ri ley richin ri Moisés nubij chi can xe ri e riy-rumam can ri Leví ri ye'oc sacerdotes y yequisuj chicop y ch'aka' chic cosas chire ri Dios. 5 Ri jay ri yesamej-vi ri sacerdotes ri' y ronojel ri c'o chupan ri jay, ruvachibel c'a ri rachoch ri Dios ri c'o chila' chicaj. Y romari', tok niban yan ri jay, ri Dios xubij chire ri Moisés: Tavac'axaj c'a. Can nic'atzin chi tiban ronojel, can achi'el ri xinc'ut chavech pa ruvi' ri juyu', xcha' ri Dios chire ri Moisés. 6 Y riq'uin ronojel re' can nikatz'et-vi c'a chi ri rusamaj ri Jesús más nim ruk'ij que chuvech ri quisamaj ri sacerdotes chupan ri rachoch ri Zios vave' chuvech re ruvach'ulef. Roma ri trato chucojol ri Dios y ri vinek, ri nusamajij ri Jesús, can más vi utz ri yerusuj. Can nik'alajin-vi c'a chi c'o ruchuk'a'.
7 Y vi ta ri nabey trato utz ta xel, man ta xban jun chic. 8 Pero xa roma c'a ri kati't-kamama' man xquiben ta ronojel ri xubij chupan ri nabey trato, romari' tok ri Dios man xka' ta chuvech. Y rija' xubij c'a:
Xtapon ri k'ij, xcha' ri Ajaf,
tok xtinben jun c'ac'a' trato quiq'uin ri aj-Israel y ri aj-Judá.
9 Y ri c'ac'a' trato ri xtinben quiq'uin,
man junan ta riq'uin ri trato ri xinben quiq'uin ri cati't-quimama',
tok xenyukej y xencol-pe pa ruvach'ulef Egipto;
roma c'a rije' xa man xquiben ta chic ri trato ri',
romari' yin xenmalij, xcha' ri Ajaf.
10 Xa roma c'a ri', quere' c'a ri rubanic ri c'ac'a' trato ri xtinben quiq'uin ri israelitas.
Xtintz'ibaj ri nu-ley pa tak cánima,
y chuka' xtinya' pa tak quinojibal.
Xquinoc qui-Dios,
y rije' xque'oc nutinamit.
Jare' ri trato ri xtinben quiq'uin.
11 Y ri k'ij ri' man chic xtic'atzin ta tijonic chique ri quivinak, ni chuka' chique ri cach'alal richin niquibij ta chique: Tivetamaj c'a ruvech ri Ajaf.
Roma chupan ri k'ij ri' can conojel chic e etamayon nuvech.
Can chi cocoj y chi nima'k quetaman chic c'a nuvech.
12 Queri' xtinben, roma xtinjoyovaj quivech y xtincuy ri quibanobal ri man choj ta.
Man xtoka' ta chic chinuc'u'x ri quimac y ri itzel tak quibanobal.
Queri' ri rubin ri Dios.
13 Y tok ri Dios xunataj ri c'ac'a' trato, riq'uin ri' xk'alajin chi rija' nubij chi ri nabey trato xa manek chic rejkalen. Y jun cosa ri xa manek chic c'a rejkalen y man nic'atzin ta chic, xa napon yan c'a ri k'ij chi niq'uis.