Ri carta ri xtzꞌibꞌas chica ri hermanos Hebreos.
1.
Chupan ri ojier can tiempo, qꞌuiy mul xchꞌoꞌ ri Dios chica ri kateꞌt-kamamaꞌ; y antok xchꞌoꞌ chica, xaꞌrucusaj ri profetas y qꞌuiy formas xaꞌrucusaj chi xchꞌoꞌ chica. 
Pero vacame chupan ri ruqꞌuisbꞌal tiempo ri ojcꞌo, ri Dios ja cꞌa ri Rucꞌajuol ri xucusaj chi xuꞌej ri ruchꞌabꞌal chakavach. Ri Dios pa rukꞌaꞌ ri Rucꞌajuol xuya-ve nojiel, y pa rukꞌaꞌ jeꞌ jajaꞌ xuya-ve chi xuꞌon ri roch-ulief y nojiel ri icꞌo chicaj. 
Riqꞌuin ri Rucꞌajuol nikꞌalajin ri ru-gloria ri Dios. Ri Rucꞌajuol can junan riqꞌuin jajaꞌ. Y ja ri Rucꞌajuol jeꞌ ri cꞌuayuon richin nojiel ri icꞌo; y riqꞌuin ri ru-poder ri ruchꞌabꞌal rutzꞌamuon nojiel. Jajaꞌ xcon chi quireꞌ xralasaj ri ka-pecados, y xcꞌastaj-pa chiquicajol ri quiminakiꞌ. Y antok rubꞌanun chic nojiel reꞌ, xbꞌatzꞌuyeꞌ chicaj pa ru-derecha ri Namalaj Dios. 
Ri Rucꞌajuol ri Dios más nem chiquivach ri ángeles. Y ri Dios xuyaꞌ jun rubꞌeꞌ ri más rakalien que chiquivach ri ángeles. 
Ruma ri Dios man jun bꞌay ruꞌeꞌn cha jun ángel: Atreꞌ ri at Nucꞌajuol, inreꞌ niyaꞌ acꞌaslien vacame. Y man jun bꞌay jeꞌ ruꞌeꞌn: Inreꞌ cꞌa ri Rutataꞌ. Y jajaꞌ cꞌa ri Nucꞌajuol. 
Y antok ri Dios xutak-pa ri Rucꞌajuol choch-ulief, ri Dios xuꞌej chica quinojiel ri ru-ángeles: Tiyaꞌ rukꞌij ri Nucꞌajuol. 
Y chiquij ri ángeles joꞌc nuꞌej: Ri nu-ángeles chaꞌnin niquiꞌan ri nusamaj, ruma niꞌan chica chi incheꞌl cakꞌiekꞌ y incheꞌl ruxak-kꞌakꞌ. 
Pero cha ri Rucꞌajuol, ri Dios nuꞌej: Dios, atreꞌ can richin nojiel tiempo naꞌan reinar, y pa ruchojmil naꞌan reinar. 
Can altíra avajoꞌn ri choj, y man nika ta chavach nojiel ri itziel kax. Y rumareꞌ inreꞌ ri A-Dios nubꞌanun chava chi atreꞌ más ncaquicuot que chiquivach ri nicꞌaj chic avachꞌil. 
Y ri Dios xuꞌej jeꞌ cha ri Rucꞌajuol: Ajaf, atreꞌ pa rutzꞌucbꞌal xaꞌan ri roch-ulief, y ri rocaj jeꞌ riqꞌuin ri akꞌaꞌ xaꞌan-ve. 
Ri roch-ulief y ri rocaj can xcaꞌqꞌuis, pero atreꞌ man xcaqꞌuis ta. Quinojiel can xtiquiꞌan vieja, incheꞌl nuꞌon ri tziak. 
Can xtiꞌan quivach, incheꞌl niꞌan cha jun tziak. Can xcaꞌcꞌax incheꞌl niꞌan cha jun tziak ri man otz ta chic. Pero atreꞌ man jun bꞌay xcacꞌax, y man xtiqꞌuis ta jeꞌ ri acꞌaslien. Quireꞌ xuꞌej ri Dios. 
Y ri Dios man jun bꞌay xuꞌej ta cha jun ángel: Catzꞌuyeꞌ pa nu-derecha hasta cꞌa xcaꞌnyaꞌ ri av-enemigos chuxieꞌ avakan. 
Ri ángeles can i-espíritu y i-rusamajiel ri Dios. Y ijejeꞌ ncaꞌrutak ri Dios chi ncaꞌquitoꞌ ri i-choꞌn chi ncaꞌcolotaj.