1 Dameŋ ira ŋicwofuŋ Herode e kikefuŋte ŋic ŋokac gâcne jopa sipiric ejareocte kâpâcwâru ficko râec-jopawec. 2 Ehuc Johane hahac-ticne Jakobo mume šikazi qâhâmombiŋ. 3 Iŋuc eme Judaŋic jaŋe aŋac-jopame honec-joparâ Petoro iŋuc jaha mume goreŋ sowa hombaŋ maickeme kâpâcwâru bambiŋ. 4 Aakic hombaŋ tarame Judaŋic jowaturâ qaocte manasurâ mume kâpâcwâru ficko râerâ momori 16 jaŋe soŋaŋkembiŋ. 5 Eme Petoro e kâpâcwâru ficko fohame kikefuŋ jaŋeraonec nunumu šušuhuc jaha Anuturao fehuc domawec.

6 Eme Herode e hae fureme ŋic jowatuocte šâfo maickewec ŋafe ira momori jajahec jahe Petoro kâpâcwâru jajaheczi bândeŋnerâ bafopic, â momori gâcne motâc râpeo soŋaŋ domambiŋ wâc. 7 Ehame ficmaŋko mi Wofuŋte aŋelo moczi ututuŋ fuarâ domame fic tamae-fârezejec i¡ Eme aŋelozi Petoro gâjoŋnao qâuahuc wiwickerâ muwec: “Picpac faharec.” Mume izia Petorore meonec kâpâcwâru ŋeŋgoroŋkerâ wahawec. 8 Eme aŋelozi âzâcnewec, “Umbikage jomarâ kikehuhuge hetec huoc.” Iŋuc eme aŋelozi mocwâc âzâcnewec, “Ŋaqige šoricne hetec hume bâjâpecnuc.” 9 Eme bâjâpehuc aŋelozi wiac ecnewec i maname fârine mâcne, guŋko ecnekicne tinac ewec. 10 Eme jahe motâc mocko momori domahapie jowaru raši, motâc mocko iŋuc jaha domahapie jowaru raši, eku hae šoŋaopec kimotâc sâko maickepire e jahac aŋkeme hupic. Hurâ hatao rahuc aŋelo e sipuac ewec. 11 Eme Petoro e maŋne uŋtome šiŋuc muwec: “Ʒi mana-jâmbâŋkekopac, Wofuŋ e aŋelo-ticne soreme Herodere niŋgiŋkonec â Judaŋic jaŋere aarickonec bataracnukac.” 12 Iŋuc mana tarahuc rarâ Johane Marekore neŋgoc, šâŋene Maria, ere ficko fisiwec. Ira bocjahazi tumaŋnerâ numuhuc ŋembiŋ. 13 Eme Petorozi šae motâcko heickeme kiŋaŋ naru moc, šâŋene Rode, e mozi heickekac muhuc waharâ 14 Petoro dâŋ hawari-ticne manarâ motâc mi roro mâc šeri ehuc ficmaŋko ferâ, Petoro warejec domakac muhuc jazawec. 15 Jazame jaŋe manarâ mumbiŋ, “Go maŋge sifuckekac.” Eki ine qizec qahuc muwec, “E jâmbâŋ domakac.” Eme jaŋe mumbiŋ, “I aŋelo-ticnezi mecne.” 16 Eme Petoro e heickehuc jaha domame motâc rorâ e jahacne honerâ maŋjeŋic omaewec. 17 Eme dâŋemâc juniŋte me bazuc ejarerâ Wofuŋzi kâpâcwâru fickonec firuerâ bawahawec irec dâŋ binaŋ ejare-fârerâ muwec, “Ŋoŋe dâŋbiŋe ši Jakobo â âgo gâcne jazaniŋ.” Iŋuc muhuc fâre fâsâerâ mocko rawec.

18 Hae fureme momori jaŋe Petoro basarâ wemo wiaczi weniŋuc ecnejec muhuc mumutucne embiŋ. 19 Eme Herodezi bâfuaniŋte mume basa-bipiepie mu indiŋ ejarerâ momori jaŋe soŋaŋ i qâhâmoc-jopaniŋte mutâcne-jarewec. Erâ Judaia mâreŋ beherâ Kaisarea haeo hurâ juwec.

20 Herode e dameŋ ira Tiro â Sidoŋ haeonec râsi ejarewec. Eme hae irec rune jaŋe qâturehuc fisirâ dâŋ mufâsâeniŋte ŋicwofuŋte ŋicbomboŋ, šâŋene Bilasto, mu bâmunaŋ ecnepie bafic-jopawec. Jaŋe wiac nareŋ gareŋ-jeŋic tâcnewecte i mocwâc šuhuckeniŋte iŋuc embiŋ. 21 Eme Herode e dâŋ bârisie-jareocte šâfo bajarewec i maickeme eri-ticne barâ ŋicwofuŋ ŋeŋe-ticnao waha ŋehuc mu âkeriŋ dâŋ jazawec. 22 Jazame ŋic mâmâc sasawa fânâŋkecnehuc šiŋuc mumbiŋ: “Dâŋ i ŋicdâŋ mâcne, i nemure dâŋ.” 23 Eme mi qatara-jarehuc Anutu âkehockewecte Wofuŋte aŋelozi ɋeŋnea qawec. Eme umbeŋzi nanšaŋneme hâmowec.

24 Anuture dâŋzi ine qazu qâiŋ erâ haŋ barawec. 25 Eme Banaba â Saulo jahe Jerusalem haeo wiac mujactekicne sâc efârerâ Antiokia haeo risienicte Johane Mareko jowapire mâmâc rambiŋ.