1 Eme nâŋe jaŋe hetarac-joparâ fâretiŋ jaha raku Ko nucko fisimbeŋ. Hae fureme Rodo nucko raširâ raku Patara haeo fisimbeŋ. 2 Ira woke moc Foinike mâreŋko raocte šawiehame bâfuarâ ira ferâ rambeŋ. 3 Raku Kipiro nuc honerâ qanaopec ŋehame mâc jâurumbeŋ. Erâ Siria mâreŋkopec raku Tiro haeo fisimbeŋ. Ira wokezi mafa hesie-fârehame 4 nâŋe haeo ferâ mitiŋic bâfuac-joparâ jaŋehec šoaŋ 7 jumbeŋ. Eme Mârozi ejareme jaŋe Paulo Jerusalem haeo mi raocte mu hezuc ecnembiŋ. 5 Ira juhapene rara dameŋ maickeme ŋic ŋokac naru motec mâmâc sasawa moŋgeŋko jowac-nâpopie humbeŋ. Erâ moŋgeŋko dieŋzi herâ numumbeŋ. 6 Numurâ mâmâzoc erâ wokeo fehapene jaŋe haeo risiembiŋ.

7 Eme Tiro haeonec raku Tolemai haeo fisipene wokeo rara i tarawec. Eme ira mitiŋic iqic-joparâ ŋafe mocjaha jaŋehec fombeŋ. 8 Hae fureme raku Kaisarea haeo fisirâ Filipo bâfuambeŋ. Filipo e babafic 7 râec-jopakicne jaŋere guruonec. Ere ficko hâcne fembeŋ. 9 E otâfâcne 4 šeŋoŋ jumbiŋ jaŋe findaŋdâŋ mujumbieŋ. 10 Eme ira šuhuckerâ juhapene Judaia mâreŋkonec porofete moc šâŋene Agabo e nâŋerao fâ fisiwec. 11 Fisirâ Paulo umbika-ticne rorâ izi jahacne me kike qarâ muwec, “Tiri Mâro e kecšiŋuc mukac: `Umbika rune e Jerusalem haeo ra fisime Judaŋic jaŋe šiŋuc hâcne ecnerâ qâpuc jaŋere meo râeniŋmu. Ž ” 12 Dâŋ iŋuc mume nâŋe mecne â hae fâri mecne Paulo Jerusalem haeo mi feocte bâmâckehuc âzâcnembeŋ. 13 Âzâcnepene šiŋuc muwec: “Wemocte boc kiohuc bu heheric enareŋgopieŋ? No Jerusalem haeo kâpâcwâruo fepere sawa mâcne, Wofuŋ Jesure erâ hâmopere wâc šawiekopac.” 14 Dâŋ âzâcnepene mi maname beherâ šiŋuc mumbeŋ: `Wofuŋte dâŋ sanaŋkezejec.”

15 Ʒoaŋ gie bapa gâcne tarame Jerusalem haeo fenaŋte šawiembeŋ. 16 Eme Kaisarea haeonec mitiŋic gâcne jaŋe jowac-nâporâ ŋic moc šâŋene Ŋasoŋ, e mitiŋic raŋɋane Kipiro nucko fuawec, ere ficko hâcne râec-nâpombiŋ. 17 Eme raku Jerusalem haeo fisipene irecnec mitiŋic jaŋe 390 jauŋ enârembiŋ. 18 Eme hae fureme Paulozi Jakobore ficko jowac-nâpome fembeŋ. Ferâ juhapene mitire micne bapa gâcne fisi-fârembiŋ. 19 Fisipie Paulozi mejeŋicko barâ, Anutuzi neŋgoc ŋesiŋ ŋecnehame qâpuc jaŋerao miti gie bame fârine fuawec, irec dâŋ binaŋ ninic jaha ejarewec.

20 Paulozi dâŋ binaŋ ejare tarame Anutu muteŋkerâ Paulo šiŋuc âzâcnembiŋ: “Manakic, qomâ-nâŋec Paulo, Judaŋic tauseŋ guru wemo afecnezi Jesure kikefuŋ embiŋ juŋgopieŋ. Eme jaŋe mâmâc sasawa sâcmutâc dâŋ šoɋac erâ dopeckeeŋgopieŋ. 21 Ehame gore dâŋ šiŋuc wareme manaeŋgopieŋ: `Judaŋic qâpuc jaŋere ŋondeŋko juraŋgopieŋ jaŋe Mosere dâŋ qikiŋneniŋte jazaekac, ehuc ɋiefâc-jeŋic jaŋere sahacko ma mi bajareniŋte muac-jopaekac, â Judaŋic juju hata-nâŋec beheniŋte qafeŋ-jopaekac. Ž 22 Hae širec ŋic jaŋe gore iŋuc manaeŋgopieŋte weniŋuc ezo? Go Jerusalem haeo waremec irec biŋe mana-fâreniŋmu. 23 Irec nâŋe dâŋ moc gazapene ezemec. Nâŋerao ŋic 4 juŋgopieŋ, jaŋe Anuturao mumupaŋ-jeŋic râembiŋte qizec-jeŋic mi bâbâtâc mâc jueŋgopieŋ. 24 Eme nâŋe jaŋerao šuhucgupene jaŋere sâcko wiac ehuc tiwâ bâzi furine bajaretec rikerâ qizec-jeŋic bâtâcnenšepieŋ. Go iŋuc etecne honecgurâ gore šiŋuc mananiŋmu: Dâŋticne wareme manambeŋ i fârimâc, e sâcmutâc dâŋ reŋkehuc juekac wâc. 25 Á qâpuckonec opâ ruac jaŋe nemuɋâŋte taha bâzi, qowisoc, qowi bituakicne â sasec boe sau irec sawa bâec baniŋte mupaŋke-jarembeŋ.” 26 Eme Paulo e dâŋjeŋic manarâ ŋic 4 jaŋerao šuhuckeme hae fureme sahac ŋaqi wiac-jeŋic šure emasaŋ erâ taha ufuŋko fembiŋ. Ferâ Paulozi mumupaŋ dameŋ tatarare â bâzi ririkere dâŋ taha bapa jaŋe jazawec.

27 Ʒoaŋ gie bapa 7 wiac ehuc juniŋte mumbiŋ i tarazo eha Paulozi taha ufuŋko ferâ juhame Asia mâreŋkonec Judaŋic jaŋe e honerâ ŋic mâmâc sasawa maŋjeŋic bâiŋnembiŋ. 28 Ehuc Paulo rorâ kuku qajarehuc mumbiŋ, “Oe, Israe ŋicbureŋ, ware bafic-nâponiŋ¡ Ŋic šizi mâreŋ sâc jurahuc Judaŋic nâŋâc râsi enârehuc sâcmutâc dâŋnâŋec â ufuŋ-nâŋec ši mu qâsuac ehuc juekac. Erâ wâc ufuŋ-nâŋecko Grikŋic jowac-jopame wefuhuc furufic ši gâc hecneŋgopieŋ.” 29 Paulo e Efeso haeonec ŋic Trofimo ehec haeo rac warec eme honerâ mana sifuckehuc mumbiŋ, taha ufuŋko jowa wefujec. 30 Paulo e iŋuc ecnepie haeŋic mâmâc sasawa kike saoŋ qajareme ɋuruŋ herâ qâture-fârembiŋ. Ehuc ŋic gâcnezi Paulo rorâ ufuŋkonec fâre wahambiŋ. Fâre wahapie izia motâc hembiŋ.

31 Ŋic jaŋe Paulo rorâ qâhâmozo ehapie biŋe Roma momori jaŋere soŋaŋ sâkorao rame šiŋuc manawec: “Jerusalem ŋic jaŋe mâmâc sasawa râsi roroc eŋgopieŋ.” 32 Dâŋ iŋuc manarâ izia momori fekicne wahakicne rocjopame ɋuruŋ ɋuruŋ rambiŋ. Eme ŋic jaŋe Paulo qahuc juhapie soŋaŋ sâko â momorifâc-ticne fisipie honec-joparâ behembiŋ. 33 Eme momori soŋaŋ sâkozi fisirâ Paulo jowac rorâ mume kâpâcwâru jajaheczi bândeŋnembiŋ. Erâ Paulo šâŋe-ticnere â wemo wiac ewec irec iindiŋ gie bawec. 34 Eme ŋic jaŋe owage owa-nane epie qâsifuo dâŋ fuŋne sâcne mi mana-hâmohuc mume momori jaŋe Paulo ficjeŋicko barambiŋ. 35 Eme Paulo e ririo fezo eme ŋic jaŋe orâŋkerâ bâbâzickepie momori jaŋe Paulo hâporâ reŋke fembiŋ. 36 Ŋic guru sâko jaŋe bâjâpec-jopahuc owac owacke rahuc šiŋuc mumbiŋ: “Ŋic e arictac eoc!” 37 Eme Paulo ficmaŋko bafezo ehapie momori soŋaŋ sâko wiocnerâ muwec, “Manatec dâŋ moc gazape?” Mume soŋaŋzi muwec, “Go Grikdâŋ manaekic? 38 Mârâcko Aigita ŋic moczi šika bâfuaocte râsi 4 tauseŋ rocjopame mâreŋ tuhuo rambiŋ, go ŋic e me moc?” 39 Wiocneme Paulozi šiŋuc âzâcnewec: “No Judaŋic, erâ Kilikia mâreŋko Taso hae sâko ŋekac irec rune. Go mana-naretec ŋic dâŋ piticne jazape.” 40 Eme manacneme Paulo e riri botâŋko domahuc ŋic me bazuc ejareme dâŋemâc efârepie Judaŋic jaŋacne dâŋkoa kecšiŋuc jazawec: